ສ້າງສາຍພົວພັນແໜ້ນແຟ້ນ! ຈີນ - ຣັດເຊຍ ສຳເລັດຮ່ວມສ້າງຂົວເຊື່ອມ 2 ປະເທດ - Laoedaily

ສ້າງສາຍພົວພັນແໜ້ນແຟ້ນ! ຈີນ – ຣັດເຊຍ ສຳເລັດຮ່ວມສ້າງຂົວເຊື່ອມ 2 ປະເທດ

ຣັດເຊຍ ແລະ ຈີນ ຮ່ວມກັນກໍ່ສ້າງຂົວສາຍທຳອິດ ເຊື່ອມຕໍ່ລະຫວ່າງ 2 ປະເທດ ສຳເລັດແລ້ວ ຈາກການເປີດເຜີຍຂອງລັດຖະບານຣັດເຊຍ ຖືເປັນສັນຍານຄວາມຮ່ວມມືສາຍສຳພັນທີ່ຮັດແໜ້ນແຟ້ນ.

ສຳນັກຂ່າວຣອຍເຕີ ລາຍງານຈາກນະຄອນຫຼວງມອສໂກ ປະເທດຣັດເຊຍ ເມື່ອວັນເສົາ ທີ 29 ພະຈິກ ວ່າ ຂົວຂ້າມແມ່ນໍ້າອາມູ ຈະເຊື່ອມຕໍ່ລະຫວ່າງເມືອງບລາໂກເວສເຊັນສ໌ ທາງພາກຕາເວັນອອກໄກຂອງຣັດເຊຍ ແລະ ເມືອງໄຫເຫີ ມົນທົນເຮຫຼົງຈຽງ ທາງພາກຕາເວັນອອກສຽງເໜືອຂອງຈີນ ແລະ ມີດ້ວຍເປົ້າໝາຍເພີ່ມປະລິມານການຂົ່ງອອກ-ເຂົ້າສິນຄ້າ ແລະ ຜະລິດຕະພັນດ້ານກະເສດລະຫວ່າງ 2 ປະເທດ.

ຖະແຫຼງການຂອງກະຊວງດ້ານການພັດທະນາຕາເວັນອອກໄກ ແລະ ອາກຕິກຣັດເຊຍ ກ່າວວ່າ ຂົວເຊື່ອມຕໍ່ລະຫວ່າງສອງປະເທດ ຄາດວ່າ ຈະເລີ່ມເປີດໃຊ້ຢ່າງເປັນທາງການ ລະຫວ່າງເດືອນມີນາ-ມິຖຸນາ ປີ 2020. ທ່ານວາຊິລີ ອໍລອຟ ເຈົ້າຄອງພາກພື້ນອາມູ ກ່າວວ່າ ຣັດເຊຍ ແລະ ຈີນ ຮ່ວມກັນສ້າງເສັ້ນທາງຂົນສົ່ງສາກົນແຫ່ງໃໝ່ ໂດຍຂົວແຫ່ງນີ້ ຈະຊ່ວຍໃຫ້ທັງສອງປະເທດ ສາມາດເຂົ້າເຖິງຈຸດກະຈາຍສິນຄ້າຂອງກັນ ແລະ ກັນ ໄດ້ຢ່າງມີປະສດທິພາບ.

ຂົວຂ້າມແມ່ນໍ້າອາມູ ມີຄວາມຍາວ 1.080 ແມັດ ສ້າງໂດຍບໍລິສັດຮ່ວມທຶນ ຣັດເຊຍ – ຈີນ ລວມທັງການກໍ່ສ້າງເສັ້ນທາງສາຍໃໝ່ 20 ກິໂລແມັດ ການກໍ່ສ້າງເສັ້ນທາງຢູ່ຝັ່ງປະເທດຈີນ ແມ່ນສຳເລັດຕັ້ງແຕ່ເດືອນຕຸລາ 2018 ແຕ່ຝັ່ງຣັດເຊຍໃຊ້ເວລາໃນການກໍ່ສ້າງດົນກວ່າ ແລະ ຄ່າໃຊ້ຈ່າຍຫຼາຍກວ່າ ປະມານ 13,6 ຕື້ຣູເບີລຣັດເຊຍ (ກວ່າ 1.870 ຕື້ກີບ), ສ່ວນຈີນໃຊ້ງົບປະມານການກໍ່ສ້າງ ມູນຄ່າ 5,2 ຕື້ຣູເບີລ (ກວ່າ 715 ຕື້ກີບ).

ຣັດເຊຍ ພະຍາຍາມເພີ່ມທະວີການພົວພັນ ກັບ ຈີນ ຫຼັງຖືກກຸ່ມປະເທດຕາເວັນຕົກຂວໍ້າບາດ ເນື່ອງມາຈາກຣັດເຊຍໄດ້ຜະໜວກດິນແດນຄາບສະໝຸດໄຄເມຍຂອງຢູເຄຣນ ເມື່ອປີ 2014 ແລະ ໃນວັນຈັນ ທີ 2 ທັນວາ ນີ້ ປະທານາທິບໍດີຣັດເຊຍ ທ່ານວະລາດິເມຍ ປູຕິນ ແລະ ປະທານປະເທດຈີນ ທ່ານສີ ຈິ້ນຜິງ ໄດ້ມີເປົ້າໝາຍຈະຮ່ວມກັຍເປັນປະທານໃນພິທີເປີດ ທໍ່ສົ່ງກາຊທຳມະຊາດ “ພະລັງງານແຫ່ງອາຊີ” ເປັນໂຄງການຕາມຂໍ້ຕົກລົງຮ່ວມມືທີ່ມີມູນຄ່າ 400 ຕື້ໂດລາສະຫະລັດ (3,5 ລ້ານຕື້ກີບ) ໃນໄລຍະເວລາ 30 ປີ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ