ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່ – ເດັກ ຮ່ວມກັບອົງການຢູນີເຊັບ ປະຈຳລາວ ໄດ້ຈັດງານສະເຫຼີມສະຫຼອງວັນເດັກໂລກ ແລະ ສົນທິສັນຍາວ່າດ້ວຍສິດທິເດັກ ຄົບຮອບ 30 ປີ ຂຶ້ນທີ່ສວນປະຕູໄຊ ໃນວັນທີ 20 ພະຈິກ 2019 ໂດຍການເປີດແສງສີຟ້າສ່ອງກະຈາຍໄປທົ່ວປະຕູໄຊ.
ໃຫ້ກຽດເຂົ້າຮ່ວມມີ ທ່ານ ນາງ ບັນດິດ ປະທຸມວັນ ຮອງປະທານສູນກາງສະຫະພັນແມ່ຍິງລາວ ທັງເປັນຮອງປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່ – ເດັກ, ທ່ານ ນາງ ບີເອເຕ ດັດສະເທວ ຕາງໜ້າອົງການຢູນີເຊັບ ປະຈຳລາວ ພ້ອມດ້ວຍບັນດາພາກສ່ວນກ່ຽວຂ້ອງ ແລະ ນ້ອງນັກຮຽນທັງຫຼາຍເຂົ້າຮ່ວມ.
ໂອກາດດັ່ງກ່າວ ທ່ານ ນາງ ບັນດິດ ປະທຸມວັນ ໄດ້ກ່າວວ່າ: ວັນທີ 20 ພະຈິກຂອງແຕ່ລະປີ ເປັນວັນເພື່ອໂຄສະນາສົນທິສັນຍາວ່າດ້ວຍສິດທິເດັກ ແລະ ລະດົມທຶນຊ່ວຍເຫຼືອເດັກໃນທົ່ວໂລກ ທີ່ຍັງບໍ່ທັນເຂົ້າເຖິງການບໍລິການດ້ານສາທາລະນະສຸກທີ່ເໝາະສົມ, ປັບປຸງວຽກງານໂພຊະນາການ, ການສຶກສາ ແລະ ປົກປ້ອງເດັກ. ໄລຍະຜ່ານມາລັດຖະບານລາວກໍໄດ້ເອົາໃຈໃສ່ຢ່າງຕັ້ງໜ້າຕໍ່ບັນຫາສິດທິເດັກ ສະເພາະແມ່ນໄດ້ຈັດກອງປະຊຸມຄົນລາວ ຮຸ່ນປີ 2030 ເພື່ອລົງທຶນໃສ່ເດັກ, ໄວໜຸ່ມ ເຊິ່ງເປັນພາກສ່ວນສຳຄັນໃນການປະຕິບັດແຜນພັດທະນາເສດຖະກິດ – ສັງຄົມແຫ່ງຊາດ.
ການສະເຫຼີມສະຫຼອງວັນເດັກໂລກ ແລະ ສົນທິສັນຍາ ວ່າດ້ວຍສິດທິເດັກ ຄົບຮອບ 30 ປີ ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່ – ເດັກ ໄດ້ເລືອກເອົາສວນປະຕູໄຊເປັນສະຖານທີ່ ເພາະເປັນສັນຍະລັກຂອງປະເທດໃຫ້ກາຍເປັນສີຟ້າ ແລະ ເປັນສັນຍະລັກບົ່ງບອກເຖິງການໃຫ້ຄວາມສຳຄັນແກ່ສິດທິເດັກໃນ ສປປ ລາວ.
ທ່ານ ນາງ ບີເອເຕ ດັດສະເທວ ໄດ້ກ່າວວ່າ: ສີຟ້າເປັນສັນຍະລັກໃນການສະໜັບສະໜູນສິດທິເດັກ. ສະນັ້ນ, ຈຶ່ງຢາກໃຫ້ທຸກຄົນນຸ່ງເຄື່ອງສີຟ້າ ເຊິ່ງຕະຫຼອດໄລຍະຜ່ານມາໃນ ສປປ ລາວ ເຫັນວ່າສະຖານະການຂອງເດັກມີຄວາມຄືບໜ້າຫຼາຍດ້ານ, ແຕ່ຍັງຕ້ອງເລັ່ງລັດໃຫ້ມີການປ່ຽນແປງທີ່ດີສຳລັບເດັກທຸກຄົນກ່ອນປີ 2030 ໂດຍການສ້າງຊັບພະຍາກອນມະນຸດ, ການລົງທຶນໃສ່ເດັກເປັນຂໍກຸນແຈສຳຄັນໃນການຮັບປະກັນ ວ່າເດັກທຸກຄົນຈະໄດ້ຮັບທຸກສິດກ່ອນປີ 2030.
ນາງ ປານີພອນ ວົງມາລາ ອາຍຸ 15 ປີ ໃຫ້ສຳພາດວ່າ: ນ້ອງເຊື່ອໝັ້ນວ່າເດັກນ້ອຍລາວທຸກຄົນຕ້ອງໄດ້ຮັບສິດທິໃນການເຂົ້າເຖິງການສຶກສາທີ່ມີຄຸນນະພາບ ເປັນຕົ້ນແມ່ນການສິດສອນຮໍ່າຮຽນແບບມີສ່ວນຮ່ວມ ແລະ ນຳໃຊ້ຄອມພິວເຕີ, ໄດ້ຮຽນຮູ້ທັກສະທີ່ແທດເໝາະ ເພື່ອຈະສາມາດຫາວຽກງານທີ່ດີໄດ້ໃນອະນາຄົດ.
( ຂ່າວ: ກາວຊົ່ງ; ຮູບ: ສຸກສະຫວັນ )
