ສະມາຄົມຮ້ານອາຫານນະຄອນຫຼວງວຽງຈັນ-ເບຍລາວ ມອບເຄື່ອງນຸ່ງກິລາ 20 ຊຸດ ໃຫ້ທີມສື່ມວນຊົນສາຍກິລາ - Laoedaily

ສະມາຄົມຮ້ານອາຫານນະຄອນຫຼວງວຽງຈັນ-ເບຍລາວ ມອບເຄື່ອງນຸ່ງກິລາ 20 ຊຸດ ໃຫ້ທີມສື່ມວນຊົນສາຍກິລາ

ສະມາຄົມຮ້ານອາຫານ ນະຄອນຫຼວງວຽງຈັນ (ນວ) ພາຍໃຕ້ການສະໜັບສະໜູນຂອງບໍລິສັດ ເບຍລາວ ຈຳກັດ ໄດ້ຊຸກຍູ້ເຄື່ອງນຸ່ງກິລາບານເຕະ ຈຳນວນ 20 ຊຸດ ໃຫ້ແກ່ທີມສື່ມວນຊົນສາຍກິລາລາວ ໄດ້ມີຄວາມສະດວກໃນການເຄື່ອນໄຫວຫຼິ້ນກີລາຮ່ວມກັບບັນດາພາກສ່ວນຕ່າງໆ

ພິທີມອບ-ຮັບເຄື່ອງດັ່ງກ່າວ ໄດ້ມີຂຶ້ນ ເມື່ອວັນທີ 13 ພະຈິກ ຜ່ານມາ ທີ່ສະໜາມກິລາເຈົ້າອານຸວົງ ນະຄອນຫຼວງວຽງຈັນ ຕາງໜ້າກ່າວມອບໂດຍທ່ານ ສຸລະສິດ ພາບມີໄຊ ຜູ້ຈັດການໂປໂມຊັນ ແລະ ສົ່ງເສີມການຂາຍໃນຮ້ານຄ້າ ບໍລິສັດ ເບຍລາວ ຈຳກັດ ແລະ ຕາງໜ້າກ່າວຮັບແມ່ນທ່ານ ສີພອນ ຈັນທະດາລາ ຮອງປະທານກຸ່ມສື່ມວນຊົນສາຍກິລາລາວ.

ມີທ່ານ ພູວົງ ອິນທະວົງສາ ປະທານສະມາຄົມຮ້ານອາຫານ ນະຄອນຫຼວງວຽງຈັນ-ເບຍລາວ ແລະ ທ່ານ ພຸດດາມອນ ຈັນທະລາສີ ພິທີກອນຊື່ດັງຈາກສະຖານີລາວສະຕຣາ ທັງເປັນຫົວໜ້າທີມສື່ມວນຊົນສາຍກິລາລາວ ພ້ອມດ້ວຍບັນດາສະມາຊິກຂອງທັງສອງພາກສ່ວນດັ່ງກ່າວເຂົ້າຮ່ວມເປັນສັກຂີພິຍານ.

ໃນພິທີດັ່ງກ່າວ ກໍຍັງໄດ້ມີການແຂ່ງຂັນກິລາເຕະບານມິດຕະພາບ ຜ່ານການແຂ່ງຂັນຜົນປະກົດວ່າ: ສະມາຄົມຮ້ານອາຫານ ນະຄອນຫຼວງວຽງຈັນ-ເບຍລາວ ເປັນຝ່າຍເອົາຊະນະ ທີມສື່ມວນຊົນສາຍກິລາລາວ ໄປແບບສຸດມ່ວນ 6-4 ປະຕູ.

ໂດຍ ສົງການ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ