ເນື່ອງໃນໂອກາດ ວັນສັກຢາປ້ອງພະຍາດສັດລ້ຽງປະຈຳປີ 2019 ນີ້ ຫຼາຍຂົງເຂດໃນທົ່ວປະເທດໄດ້ ພ້ອມກັນເອົາໃຈໃສ່ປະຕິບັດ ຈັດຈັດພິທີສັກຢາໃຫ້ສັດລ້ຽງ ເພື່ອປ້ອງກັນພະຍາດ ທີ່ຈະເກີດກັບສັດລ້ຽງໃນແຕ່ລະດູການເປັນຕົ້ນແມ່ນ: ພະຍາດປາກເປື່ອຍລົງເລັບ, ພະຍາດເຕົ້າໂຮມເລືອດງົວ, ຄວາຍ. ທັງນີ້,ກໍ່ເພື່ອເຮັດໃຫ້ສັດລ້ຽງມີແຂງແຮງ ແລະ ຫ່າງໄກຈາກພະຍາດຕ່າງໆ.
ໃນວັນທີ 12 ພະຈິກ 2019 ຜ່ານມາທີ່ບ້ານ ດອນມີໄຊ ເມືອງປາກທາ ແຂວງບໍ່ແກ້ວ ໄດ້ຈັດພິທີສັກຢາປ້ອງກັນພະຍາດສັດແຫ່ງຊາດຂຶ້ນ ໂດຍການເຂົ້າຮ່ວມຂອງທ່ານ ສາລີ ວັນນະສານ ຮອງເຈົ້າເມືອງປາກທາ, ທ່ານ ຄຳຊອນ ແກ້ວປະເສີດ ຫົວໜ້າພະແນກກະສິກຳ ແລະ ປ່າໄມ້ແຂວງບໍ່ແກ້ວ ມີຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງ ພ້ອມດ້ວຍພະນັກງານວິຊາການທີ່ກ່ຽວຂ້ອງ ອໍານາດການປົກຄອງບ້ານ ຕະຫຼອດຮອດປະຊາຊົນພາຍໃນບ້ານເຂົ້າຮ່ວມ.
ເນື່ອງໃນໂອກາດວັນສັກຢາປ້ອງກັນພະຍາດສັດລ້ຽງແຫ່ງຊາດ ວັນທີ 11 ພະຈິກ ຂອງທຸກໆປີ ທາງຄະນະຮັບຜິດຊອບຂັ້ນເມືອງກໍ່ຄື ຫ້ອງການກະສິກຳ ແລະ ປ່າໄມ້ເມືອງ ໄດ້ເອົາໃຈໃສ່ປະຕິບັດ ເຊິ່ງການສັກຢາປ້ອງກັນພະຍາດສັດຄັ້ງນີ້ ປະຊາຊົນມີຄວາມຕື່ນຕົວ ນໍາເອົາສັດລ້ຽງຂອງຕົນມາຮັບການສັກຢາປ້ອງກັນພະຍາດ. ໃນນັ້ນ: ມີງົວ 118 ໂຕ, ຄວາຍ 51 ໂຕ, ແບ້ 104 ໂຕ, ໝາ 63 ໂຕ ແລະ ແມວ 8 ໂຕ.
ເຊິ່ງຢາທີ່ນຳມາສັກປະກອບມີ: ຢາປ້ອງກັນພະຍາດເຕົ້າໂຮມເລືອດງົວ, ຄວາຍ, ຢາປ້ອງກັນພະຍາດປາກເປື່ອຍລົງເລັບສັກໃຫ້ ງົວ, ຄວາຍ ແລະ ແບ້, ຢາປ້ອງກັນພະຍາດວໍ້ ສັກໃຫ້ໝາ ແລະ ແມວ. ພາຍຫຼັງສັກຢູ່ໃນພິທີສຳເລັດແລ້ວ ທາງຫ້ອງການກະສິກຳ ແລະ ປ່າໄມ້ເມືອງກໍ່ຄື ໜ່ວຍງານ ລ້ຽງສັດ ແລະ ການປະມົງ ຍັງຈະສືບຕໍ່ສັກຢູ່ແຕ່ລະບ້ານພາຍໃນເມືອງປາກທາ ໃຫ້ທົ່ວເຖິງ ແລະ ຄົບຕາມຈຳນວນທີ່ໄດ້ກຳນົດໄວ້.
ໂອກາດດັ່ງກ່າວນີ້ ທ່ານ ສາລີ ວັນນະສານ ແລະ ທ່ານ ຄໍາຊອນ ແກ້ວປະເສີດ ໄດ້ຮຽກຮ້ອງໃຫ້ປະຊາຊົນໃຫ້ເອົາໃຈໃສ່ດູແລປ້ອງກັນສັດລ້ຽງຂອງຕົນໃຫ້ດີທີ່ສຸດ ໂດຍໃຫ້ໄດ້ຮັບການສັກຢາປ້ອງກັນຢ່າງເປັນປົກກະຕິ ຖືເອົາການປູກການລ້ຽງເປັນອາຊີບຕົ້ນຕໍ. ທັງນີ້, ກໍ່ເພື່ອປຸກລະດົມໃຫ້ຊາວກະສິກອນຜູ້ລ້ຽງສັດພາຍໃນເມືອງປາກທາ ຫັນມາຊົມໃຊ້ການສັກຢາກັນພະຍາດສັດ ເພື່ອປ້ອງກັນການລະບາດຂອງພະຍາດສັດທີ່ມັກເກີດຂຶ້ນຕາມລະດູການ ໂດຍຮັບປະກັນໃຫ້ສັດລ້ຽງແຂງແຮງ ແລະ ຫ່າງໄກຈາກພະຍາດຕ່າງໆ.
ທີ່ມາ: ໜັງສືພິມບໍແກ້ວ
