ແຂວງສາລະວັນ ຈູດທຳລາຍສິ່ງເສບຕິດ - Laoedaily

ແຂວງສາລະວັນ ຈູດທຳລາຍສິ່ງເສບຕິດ

ເນື່ອງໃນໂອກາດວັນແຫ່ງການຕ້ານຢາເສບຕິດ ຄົບຮອບ 18 ປີ ( ວັນທີ 12/10/2001 – 12/10/2019 ), ກອງບັນຊາການປ້ອງກັນຄວາມສະຫງົບແຂວງສາລະວັນ ໄດ້ຈັດພິທີຈູດທຳລາຍຢາເສບຕິດທີ່ຢຶດມາໄດ້ຈາກຜູ້ຄ້າຂາຍໃນໄລຍະຜ່ານມາ ຈຳນວນ 64.718 ເມັດ ແລະ ຢາໄອສ໌ 0,47 ກິໂລກຣາມ.

ພິທີທຳລາຍໄດ້ຈັດຂຶ້ນໃນວັນທີ 7 ພະຈິກ ທີ່ເດີ່ນໂຮງຮຽນ ມສ ອົງແກ້ວ, ໂດຍການເຂົ້າຮ່ວມຂອງ ທ່ານ ບົວທອງ ຄຸນຍອດປັນຍາ ຮອງເຈົ້າແຂວງສາລະວັນ, ທ່ານ ພັນເອກ ສີເສີດ ສອນດາລາ ຫົວໜ້າກອງບັນຊາການປ້ອງກັນຄວາມສະຫງົບແຂວງ, ມີຄະນະພັກແຂວງ, ຄະນະພັກເມືອງ, ພະນັກງານ, ທະຫານ, ຕຳຫຼວດ ພ້ອມດ້ວຍຄູ – ອາຈານ, ນັກຮຽນ – ນັກສຶກສາ ແລະ ປະຊາຊົນເຂົ້າຮ່ວມ.

ທ່ານ ພັນເອກ ສີເສີດ ສອນດາລາ ໄດ້ລາຍງານການຈັດຕັ້ງປະຕິບັດວຽກງານຜ່ານມາວ່າ: ວຽກງານການສະກັດກັ້ນ ແລະ ຕ້ານຢາເສບຕິດໃນໜຶ່ງປີຜ່ານມາ ແມ່ນໄດ້ເອົາໃຈໃສ່ເຄື່ອນໄຫວຢ່າງຕັ້ງໜ້າ ໂດຍສະເພາະການສະກັດກັ້ນບັນຫາຢາເສບຕິດທົ່ວແຂວງສາລະວັນ ໃຫ້ຫຼຸດໜ້ອຍຖອຍລົງ ແລະ ໄດ້ຮັບການແກ້ໄຂ.

ປັດຈຸບັນທົ່ວແຂວງສາລະວັນ ໄດ້ສ້າງ ແລະ ປະກາດເປັນບ້ານປອດຢາເສບຕິດໄດ້ 3 ບ້ານ, ກວດນໍ້າປັດສາວະໄດ້ 329 ຄັ້ງ ມີຜູ້ເຂົ້າຮ່ວມທັງໝົດ 329 ຄົນ ( ຍິງ 132 ຄົນ ) ພົບສານເສບຕິດ 6 ຄົນ, ໄດ້ລົງໂຄສະນາເຜີຍແຜ່ຜົນຮ້າຍຂອງຢາເສບຕິດຢູ່ໂຮງຮຽນ 8 ຕົວເມືອງໄດ້ 4 ຄັ້ງ, ເກັບກຳຂໍ້ມູນຜູ້ເສບ ແລະ ຜູ້ຂາຍຢູ່ 8 ຕົວເມືອງທັງໝົດ 2 ພັນກວ່າຄົນ ( ຍິງ 20 ຄົນ ), ຜູ້ເສບຢາເສບຕິດ 1 ພັນກວ່າຄົນ ( ຍິງ 1 ຄົນ ), ຜູ້ຂາຍ 585 ຄົນ ( ຍິງ 20 ຄົນ ). ນອກນັ້ນ, ເຈົ້າໜ້າທີ່ກ່ຽວຂ້ອງກໍໄດ້ສຸມໃສ່ຕັ້ງໜ້າສະກັດກັ້ນ ແລະ ຕ້ານຢາເສບຕິດ ໂດຍສະເພາະການຊື້ – ຂາຍ, ການເຄື່ອນຍ້າຍຂົນສົ່ງ.

ຜ່ານມາສາມາດມ້າງຄະດີໄດ້ທັງໝົດ 56 ເລື່ອງ, ມີນັກໂທດ 79 ຄົນ ( ຍິງ 9 ຄົນ ), ຢຶດຂອງກາງຢາບ້າໄດ້ 64.718 ເມັດ, ຢາໄອສ໌ 0,47 ກິໂລກຣາມ, ລົດຈັກ 5 ຄັນ, ໂທລະສັບ 50 ໜ່ວຍ, ວັດຖຸສີເຫຼືອງຄ້າຍຄືຄຳແຫວນ ນໍ້າໜັກປະມານ 2 ສະຫຼຶງ 1 ວົງ, ຢຶດເງິນໄດ້ເກືອບ 8 ລ້ານກີບ, ເງິນບາດ 2 ພັນກວ່າບາດ ແລະ ຂອງກາງອື່ນໆ.

ຈາກນັ້ນ, ໃນພິທີກໍໄດ້ຮັບຟັງຄຳໂອ້ລົມຂອງ ທ່ານ ບົວທອງ ຄຸນຍອດປັນຍາ ໂດຍທ່ານໄດ້ເນັ້ນບາງບັນຫາສໍາຄັນ ຄື: ຕ້ອງສູ້ຊົນລຶບລ້າງການຂົນສົ່ງ, ເຄື່ອນຍ້າຍຄ້າຂາຍ ແລະ ເສບຢາເສບຕິດປະເພດຕ່າງໆໃຫ້ໝົດໄປ, ຕ້ອງໄດ້ສຶກສາອົບຮົມ, ເຜີຍແຜ່, ເຊື່ອມຊຶມບັນດາມາດຕະການທາງດ້ານກົດໝາຍຢ່າງເຂັ້ມງວດ. ໃນນັ້ນ, ຕ້ອງເດັດຂາດປະຕິບັດກົດໝາຍອາຍາ ມາດຕາ 146 ວ່າດ້ວຍການລົງໂທດຂັ້ນປະຫານຊີວິດຕໍ່ຜູ້ກະທຳຜິດທີ່ມີຢາເສບຕິດປະເພດຢາບ້າ ຫຼື ສານເຄມີ ເພື່ອຜະລິດຢາເສບຕິດໄວ້ຄອບຄອງ ແລະ ບັນຫາສຳຄັນອື່ນໆ ໃຫ້ບັນດາສາຖາບັນການສຶກສາ, ໂຮງຮຽນ ແລະ ພໍ່ແມ່ປະຊາຊົນຮັບຮູ້, ເຂົ້າໃຈເຖິງຜົນຮ້າຍຂອງຢາເສບຕິດ.

( ຂ່າວ – ຮູບ: ທິດລານີ ໂຄດໂຍທາ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ