ເມືອງແກ່ນທ້າວ ສະຫຼຸບຖອດຖອນບົດຮຽນການຈັດສັນລະບຽບສັງຄົມ - Laoedaily

ເມືອງແກ່ນທ້າວ ສະຫຼຸບຖອດຖອນບົດຮຽນການຈັດສັນລະບຽບສັງຄົມ

ກອງປະຊຸມສະຫຼຸບຖອດຖອນບົດຮຽນການຈັດສັນລະບຽບສັງຄົມ ໄດ້ຈັດຂຶ້ນໃນວັນທີ 4 ພະຈິກ 2019 ນີ້ ທີ່ເມືອງແກ່ນທ້າວ ແຂວງໄຊຍະບູລີ ໂດຍການເປັນກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ  ເຈົ້າແຂວງໄຊຍະບູລີ, ທ່ານ ພົຈວ ຄໍາສາຍ ຈັນທະວົງ ຄະນະພັກກະຊວງປ້ອງກັນຄວາມສະຫງົບ, ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ທ່ານ ອໍາຄາ ລັດສະໝີ ວ່າການເລຂາພັກເມືອງ, ວ່າການເຈົ້້າເມືອງແກ່ນທ້າວ, ມີກໍາມະການພັກແຂວງ, ຫົວໜ້າພະແນກ, ຮອງພະແນກ, ກົມ 509, ເລຂາພັກເມືອງ, ເຈົ້າເມືອງ, ຄະນະກອງບັນຊາການ ປກສ ແຂວງທົ່ວປະເທດ, ຫົວໜ້າຫ້ອງການ, ກົມກອງ, ອົງການຈັດຕັ້ງ, ຄະນະພັກຮາກຖານ, ເລຂາໜ່ວຍພັກບ້ານ-ນາຍບ້ານເທດສະບານເມືອງແກ່ນທ້າວເຂົ້າຮ່ວມ 140 ກວ່າຄົນ.


ໃນກອງປະຊຸມທ່ານ ອໍາຄາ ລັດສະໝີ ວ່າການເລຂາພັກເມືອງ, ວ່າການເຈົ້້າເມືອງແກ່ນທ້າວ ໄດ້ຜ່ານບົດສະຫຼຸບຖອດຖອນບົດຮຽນໂຄງການຈັດລະບຽບສັງຄົມຢູ່ເມືອງແກ່ນທ້າວ ວ່າ: ເມືອງແກ່ນທ້າວ ມີທັງໝົດ 47 ບ້ານ, ມີບ້ານລຽບຕາມຊາຍແດນ 15 ບ້ານ, ຈັດຕັ້ງເປັນ 9 ຫ້ອງການ ປກສ ບໍລິການປະຊາຊົນ, ມີ 660 ກວ່າໜ່ວຍຄອບຄົວ, ມີ 8.570 ກວ່າຄອບຄົວ, ມີພົນລະເມືອງ 42.450 ຄົນ, ຍິງ 20.980 ກວ່າຄົນ(ໃນນີ້ເຜົ່າລາວ 42.350 ກວ່າຄົນ, ຍິງ 20.860 ກວ່າຄົນ) ກວມເອົາ 99,77 ສ່ວນຮ້ອຍ ແລະ ເຜົ່າອື່ນໆ ຈໍານວນໜຶ່ງ;  ມີຕ່າງດ້າວ 40 ກວ່າຄົນ, ຍິງ 8 ຄົນ.ອາຍຸ 15 ປີຂຶ້ນໄປມີ 32.530 ກວ່າຄົນ, ຍິງ 18.000 ກວ່າຄົນ ອາຊີບຕົ້ນຕໍຂອງປະຊາຊົນແມ່ນເຮັດນາ, ປູກຝັງ-ລ້ຽງສັດ ແລະ ຄ້າຂາຍຈໍານວນໜຶ່ງ.

ທົ່ວເມືອງໄດ້ຂຶ້ນທະບຽນສໍາມະໂນຄົວສໍາເລັດແລ້ວ 47 ບ້ານ, ເກັບກໍາຂໍ້ມູນເຂົ້າລະບົບ PIM ສໍາເລັດ 8.560 ກວ່າຄອບຄົວ, ມີ 42.170 ກວ່າຄົນ, ຍິງ 20.880 ກວ່າຄົນ ເທົ່າກັບ 99,86 ສ່ວນຮ້ອຍ, ມີບັດປະຈໍາຕົວແລ້ວ 24.300 ກວ່າຄົນ. ໃນນີ້ ບັດລະບົບໃໝ່ 450 ກວ່າບັດ ເທົ່າກັບ 74,76 ສ່ວນຮ້ອຍ, ຍັງບໍ່ທັນມີບັດປະຈໍາຕົວ 8.200 ກວ່າຄົນ ເທົ່າກັບ 25,23 ສ່ວນຮ້ອຍ, ຕິດປ້າຍເຮືອນສໍາເລັດແລ້ວ 8.430 ກວ່າຫຼັງຄາເຮືອນ ເທົ່າກັບ 90,44 ສ່ວນຮ້ອຍ, ຍັງບໍ່ທັນຕິດ 890 ກວ່າຫຼັງຄາ. ສະເພາະການແກ້ໄຂປະກົດການຫຍໍ້ທໍ້ແມ່ນໄດ້ດໍາເນີນຕາມ 5 ບາດກ້າວຄື: ບາດກ້າວກະກຽມ, ບາດກ້າວຈັດຕັ້ງເຊື່ອມຊຶມເອກະສານໃຫ້ພະນັກງານທີ່ຈະລົງເຮັດຕົວຈິງ, ບາດກ້າວວິໄຈຂໍ້ມູນ ແລະ ບາດກ້າວແກ້ໄຂກໍລະນີ. ຈາກນັ້ນ, ໄດ້ຮັບຟັງການປະກອບຄໍາເຫັນຂອງຫົວໜ້າຫ້ອງການກະສິກໍາ ແລະ ປ່າໄມ້ເມືອງ, ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ, ຫ້ອງການອຸດສາຫະກໍາ ແລະ ການຄ້າເມືອງ ແລະ ປກສ ບໍລິການປະຊາຊົນກຸ່ມບ້ານເທດສະບານເມືອງແກ່ນທ້າວ.


ກອງປະຊຸມຄັ້ງນີ້, ຍັງໄດ້ຮັບຟັງການມີຄໍາເຫັນຊີ້ນໍາຂອງທ່ານ ພົຈວ ຄໍາສາຍ ຈັນທະວົງ ຄະນະພັກກະຊວງປ້ອງກັນຄວາມສະຫງົບ, ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ແລະ ຮັບຟັງການໂອ້ລົມຂອງທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໄຊຍະບູລີ ເຊິ່ງທ່ານໄດ້ຊີ້ທິດເຍືອງທາງອັນປະເສີດໃຫ້ແກ່ຄະນະພັກ, ອົງການປົກຄອງເມືອງ, ແຂກ ແລະ ຜູ້ແທນກອງປະຊຸມ ເພື່ອນໍາໄປຈັດຕັ້ງປະຕິບັດໃຫ້ໄດ້ຮັບຜົນດີກວ່າເກົ່າ.


ໃນຕອນທ້າຍກອງປະຊຸມ ທ່ານ ພົຈວ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ຍັງໄດ້ນຳເອົາຫຼຽນກາທີ່ລະນຶກມອບໃຫ້ທ່ານ ພົງສະຫວັນ ສິດທະວົງເຈົ້າແຂວງໆ ໄຊຍະບູລີ ແລະ ຄອມພິວເຕີ ຈຳນວນ 2 ຊຸດ, ປີ່ນເຕີ 2 ໜ່ວຍ, ລວມມູນຄ່າ 11,000,000 ກີບ, ມອບໃຫ້ຫ້ອງວ່າການເມືອງ ແລະ ກອງບັນຊາການ ປກສ ເມືອງແກ່ນທ້າວ.


ໃນຕອນບ່າຍຂອງວັນດຽວກັນທ່ານ ພົຈວ ຄໍາສາຍ ຈັນທະວົງ ຄະນະພັກກະຊວງປ້ອງກັນຄວາມສະຫງົບ, ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ພ້ອມດ້ວຍຜູ້ແທນກອງປະຊຸມຍັງໄດ້ລົງພົບປະຢ້ຽມຢາມພໍ່ແມ່ປະຊາຊົນຢູ່ບ້ານຫາດແດງ ແລະ ບ້ານນາບອນຕື່ມອີກ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ