ຫຼາຍພື້ນທີ່ປັບຫຼຸດເນື້ອທີ່ການຜະລິດເຂົ້ານາແຊງລົງ

72

ຊົນລະປະທານຫຼາຍພື້ນທີ່ໄດ້ຮັບຜົນກະທົບຈາກໄພນ້ຳຖ້ວມຢ່າງໜັກໜ່ວງເມື່ອລະດູຝົນຜ່ານມາ. ຄຽງຄູ່ກັນນັ້ນ, ກໍຍັງປະເຊີນໜ້າກັບໄພແລ້ງ ເຮັດໃຫ້ແມ່ນ້ຳຫຼາຍສາຍບົກແຫ້ງຈົນບໍ່ສາມາດດູດນ້ຳຂຶ້ນເພື່ອ ເຮັດການຜະລິດລະດູແລ້ງ ເຮັດໃຫ້ຫຼາຍພື້ນທີ່ຫຼຸດເນື້ອທີ່ການຜະລິດເຂົ້ານາແຊງລົງຕາມຄວາມສາມາດໃນການສະໜອງນ້ຳ.

ຂໍ້ມູນຈາກຂະແໜງປູກຝັງ ພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ ໃຫ້ຮູ້ວ່າ: ການຜະລິດນາແຊງປີນີ້ຕັ້ງເປົ້າໄວ້ 14.300 ເຮັກຕາ ເຊິ່ງຫຼຸດລົງຈາກປີຜ່ານມາ 1.600 ເຮັກຕາ ເນື່ອງຈາກຕ້ອງກໍານົດຕາມຄວາມອາດສາມາດການສະໜອງນໍ້າຂອງຊົນລະປະທານ. ປັດຈຸບັນທົ່ວນະຄອນຫຼວງວຽງຈັນ ມີລະບົບຊົນລະປະທານທີ່ໃຊ້ໄດ້ທັງໝົດ 54 ແຫ່ງ. ໃນນັ້ນ,  ມີຈັກສູບນໍ້າ 67 ແຫ່ງ, ມີອ່າງເກັບນໍ້າ 12 ແຫ່ງ, ມີປະຕູນໍ້າ 3 ແຫ່ງ, ມີຝາຍນໍ້າລົ້ນ 2 ແຫ່ງ ແລະ ໜອງປາ 27 ແຫ່ງ ເຊິ່ງໃນຈໍານວນດັ່ງກ່າວແມ່ນກຽມພ້ອມສະໜອງນໍ້າໃຫ້ແກ່ການຜະລິດລະດູແລ້ງປີນີ້.

ເຖິງຢ່າງໃດກໍຕາມ, ມາໃນວັນທີ 4 ພະຈິກ 2019 ຜ່ານມາ ຢູ່ນະຄອນຫຼວງ ໄດ້ມີພິທີມອບ – ຮັບການໃຊ້ຈັກສູບນໍ້າ ໂຄງການຊົນລະປະທານດົງໂພສີ ແລະ ທ່າພະ – ໜອງພົງ ເມືອງຫາດຊາຍຟອງ ເພື່ອຮັບໃຊ້ການຜະລິດລະດູແລ້ງ 2019 – 2020 ເຊິ່ງໂຄງການດັ່ງກ່າວແມ່ນໂຄງການຮ່ວມມືແບບພິເສດລະຫວ່າງລັດຖະບານລາວ ແລະ ຫວຽດນາມ.

ສະເພາະໂຄງການຊົນລະປະທານດົງໂພສີ ມີຈັກສູບນໍ້າທັງໝົດ 4 ເຄື່ອງ, ໃຊ້ງານໄດ້ພຽງ 1 ເຄື່ອງ ພ້ອມສະໜອງນໍ້າໃຫ້ແກ່ການຜະລິດລະດູແລ້ງ ໃນເນື້ອທີ່ 430 ເຮັກຕາ, ສ່ວນໂຄງການຊົນລະປະທານທ່າພະ – ໜອງພົງ ມີຈັກສູບນໍ້າທັງໝົດ 4 ເຄື່ອງໃຊ້ງານໄດ້ 2 ເຄື່ອງ ພ້ອມສະໜອງນໍ້າໃຫ້ແກ່ການຜະລິດລະດູແລ້ງປີນີ້ 1.044 ເຮັກຕາ.

ທ່ານ ຄໍາອາລິສອນ ເທບປັນຍາ ຫົວໜ້າຂະແໜງປູກຝັງແຂວງວຽງຈັນ ໃຫ້ຮູ້ວ່າ: ແຂວງວຽງຈັນ ວາງຄາດໝາຍຜະລິດເຂົ້ານາແຊງໃນປີນີ້ 8 ພັນເຮັກຕາ ຫຼຸດຈາກປີຜ່ານມາ 2 ພັນເຮັກຕາ ເນື່ອງຈາກສະພາບໄພແຫ້ງແລ້ງປົກຄຸມຫຼາຍພື້ນທີ່, ແມ່ນ້ຳຫຼາຍສາຍເຫືອດແຫ້ງຈົນບໍ່ສາມາດສູບນ້ຳຂຶ້ນມາທຳການຜະລິດ ລວມທັງຊົນລະປະທານໃນຈຳນວນ 410 ແຫ່ງ ຜ່ານການໃຊ້ງານມາດົນເຮັດໃຫ້ເປ່ເພ ແລະ ສາມາດໃຊ້ງານໄດ້ຈໍານວນໜຶ່ງເທົ່ານັ້ນ. ດັ່ງນັ້ນ, ໃນການສະໜອງນໍ້າເຂົ້າໃນເນື້ອທີ່ຜະລິດນາແຊງປີນີ້ຖືເປັນສິ່ງທ້າທາຍຫຼາຍ.

ທ່ານ ລັດຕະນະ ໄຊສົມບັດ ຫົວໜ້າຂະແໜງປູກຝັງແຂວງສະຫວັນນະເຂດ ໃຫ້ຮູ້ວ່າ: ປີນີ້ສະຫວັນນະເຂດ ຈະຜະລິດນາແຊງໃຫ້ໄດ້ 30 ພັນເຮັກຕາ ເພີ່ມຂຶ້ນຈາກປີຜ່ານມາ 1 ພັນເຮັກຕາ ເຊິ່ງປັດຈຸບັນກໍາລັງກະກຽມແນວພັນເພື່ອຕົກກ້າ ຫຼັງເກັບກ່ຽວເຂົ້ານາປີສໍາເລັດ. ສໍາລັບການສະໜອງນໍ້າໃຫ້ແກ່ການຜະລິດລະດູແລ້ງປີນີ້ຖືວ່າເປັນສິ່ງທ້າທາຍຫຼາຍ ເນື່ອງຈາກຊົນລະປະທານ 82 ແຫ່ງ ຈາກຊົນລະປະທານທັງໝົດ 414 ແຫ່ງ ຖືກກະທົບ ເຮັດໃຫ້ການສະໜອງນໍ້າປີນີ້ອາດບໍ່ເຕັມເມັດເຕັມໜ່ວຍ.

ຂະນະທີ່ ທ່ານ ຄໍາຈັນ    ໄຊປັນຍາ ຫົວໜ້າພະແນກກະສິກໍາ ແລະ ປ່າໄມ້ ແຂວງຄໍາມ່ວນ ເປີດເຜີຍວ່າ: ປັດຈຸບັນພວມລໍຖ້າງົບປະມານໃນການສ້ອມແປງຊົນລະປະທານທີ່ເປ່ເພຈາກໄພນໍ້າຖ້ວມ, ສ່ວນໂຕທີ່ຍັງສາມາດໃຊ້ງານໄດ້ ຫຼື ສາມາດສ້ອມແປງໄດ້ແບບປະຖົມປະຖານ ຈະສາມາດສະໜອງນໍ້າເຂົ້າການຜະລິດນາແຊງໄດ້ພຽງ 7 ພັນກວ່າເຮັກຕາເທົ່ານັ້ນ, ສໍາລັບແຜນການຜະລິດນາແຊງຂອງແຂວງປີນີ້ແມ່ນ 11 ພັນເຮັກຕາ ເພີ່ມຈາກປີຜ່ານມາ 1 ເຮັກຕາ ກັບສະພາບການຄວາມຫຍຸ້ງຍາກໃນການສະໜອງນໍ້າ ອາດເຮັດໃຫ້ການຜະລິດບໍ່ບັນລຸເປົ້າ.