ສິ່ງໃໝ່ໃນວົງການ ການຄ້າລາວ-ມຽນມາ ບ້ານເຮົາຈະຊື້ເຂົ້າສານຈາກເຂົາ 8 ປີຕິດຕໍ່ກັນ - Laoedaily

ສິ່ງໃໝ່ໃນວົງການ ການຄ້າລາວ-ມຽນມາ ບ້ານເຮົາຈະຊື້ເຂົ້າສານຈາກເຂົາ 8 ປີຕິດຕໍ່ກັນ

ຈາກສະພາບຄວາມເປັນຈີງຢູ່ປະເທດເຮົາທີ່ປະສົບໄພທຳມະຊາດໃນແຕ່ລະປີ ເຊິ່ງປະຊາຊົນມີຄວາມສ່ຽງຕໍ່ບັນດາລາຄາເຂົ້າແພງ ຫຼື ບໍ່ມີເຂົ້າກ່ຽວໃນບາງພື້ນທີ່ ສະນັ້ນ ບໍລິສັດເອກະຊົນລາວຈະຮ່ວມມືກັບບໍລິສັດໄທ ຈະຊື້ເຂົ້າສານຈາກປະເທດມຽນມາຈຳນວນ 10ລ້ານໂຕນເພື່ອສະໜອງໃຫ້ຕະຫລາດລາວ, ຫລັງຈາກເນື້ອທີ່ນາ ຂອງສປປລາວ ຖືກເສຍຫາຍຈາກໄພນໍ້າຖ້ວມໃນປີນີ້.

 

ໂດຍບໍລິສັດ ໂຮມໄຊ ການກະເສດ ຂາອອກ-ຂາເຂົ້າ ແລະ ບໍລິການຈຳກັດ ຜູ້ດຽວ ຂອງລາວ ຮ່ວມກັບ ບໍລິສັດ ສະຫຍາມ ມ້າທອງ ຈຳກັດ ແຫ່ງປະເທດໄທ ໄດ້ສັ່ງຊື້ເຂົ້າສານ ຈາກ ບໍລິສັດ ນາເຣສ໌ ຈຳກັດ ແຫ່ງປະເທດ ມຽນມາ ບໍ່ຕໍ່າກວ່າ 10 ລ້ານໂຕນໃນໄລຍະເວລາ 8 ປີນັບຕັ້ງແຕ່ເດືອນມັງກອນ ປີ 2020 ເປັນຕົ້ນໄປ. ປະລິມານເຂົ້າທີ່ຈະນຳເຂົ້າຈາກ ປະເທດມຽນມາ ໃນເຄີ່ງປີທຳອິດ ຈະໃຫ້ບັນລຸ 980.000 ໂຕນ.

 

ຕາມການລາຍງານຂອງສຳນັກຂ່າວ ວຽງຈັນທາມໃຫ້ຮູ້ວ່າ: ການຮ່ວມມືກັນໃນຄັ້ງນີ້ຖືວ່າເປັນຍຸດທະສາດອັນສຳຄັນໃນການຄໍ້າປະກັນສະບຽງອາຫານໃຫ້ແກ່ປະເທດ ໂດຍສະເພາະໃນສະພາບການປັດຈຸບັນ ທີ່ໄດ້ຮັບຜົນກະທົບຈາກໄພທຳມະຊາດ ຍ້ອນການປ່ຽນແປງຂອງດິນຟ້າອາກາດ. ສິ່ງສຳຄັນອີກປະການໜຶ່ງ, ການຮ່ວມມືກັນຂອງພາກເອກະຊົນ ຂອງສາມປະເທດໃນຄັ້ງນີ້ ພາຍໃຕ້ການຊີ້ນຳຈາກຂະແໜງການຂອງພາກລັດຢ່າງໄກ້ຊິດ.

 

ຖືວ່າເປັນເຫດການທີ່ສຳຄັນ ໃນຂະແໜງການຄ້າ ດ້ານກະສິກຳ-ອຸດສາຫະກຳ ແລະ ຍັງສະແດງໃຫ້ເຫັນເຖິງການຂະຫຍາຍຕົວຂອງພາກເອກະຊົນເຊິ່ງເປັນຫົວໜ່ວຍສຳຄັນໜື່ງໃນການກະຕຸ້ນເສດຖະກິດໃຫ້ເຂັ້ມແຂງ ແລະ ເຕີບໃຫຍ່ຂະຫຍາຍຕົວຢ່າງໝັ້ນຄົງ ແລະ ເປັນຈຸດເລີ້ມຕົ້ນ ຂອງການເປີດກວ້າງ ແລະ ຂະຫຍາຍການຮ່ວມມື ບໍ່ວ່າຢູ່ໃນ ອາຊຽນ ກໍ່ຄື ສາກົນ.

 

ພິທີເຊັນສັນຍາການຊື້-ຂາຍ ເຂົ້າສານດັ່ງກ່າວໄດ້ຈັດຂື້ນໃນວັນທີ 02 ພະຈິກ 2019 ທີ່ ໂຮງແຮມ ລັດສະໝີ, ນະຄອນຫລວງວຽງຈັນ ລະຫວ່າງຜູ້ຕາງໜ້າຂອງ ສາມບໍລິສັດ.

ຂ່າວຈາກຫນັງສືພິມວຽງຈັນທາຍ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ