ກອງທຶນການເງິນສາກົນ ຫຼື ໄອເອັມເອັຟ ຊີ້ວ່າ: ອັດຕາການວ່າງວຽກ ແລະ ບັນຫາເສດຖະກິດບໍ່ຂະຫຍາຍຕົວເປັນປັດໄຈ ເຮັດໃຫ້ຫຼາຍປະເທດຕາເວັນອອກກາງ ເກີດຄວາມເຄັ່ງຕຶງທາງສັງຄົມ ແລະ ປະຊາຊົນໂຮມຊຸມໃຫຍ່.
ບົດລາຍງານທ່າອ່ຽງການຂະຫຍາຍຕົວທາງເສດຖະກິດໃນຕາເວັນອອກກາງ ແລະ ອາຟຣິກກາເໜືອ ຂອງ ໄອເອັມເອັຟ ທີ່ເຜີຍແຜ່ເມື່ອບໍ່ດົນມານີ້ ລະບຸວ່າ: ຄວາມບໍ່ສະຫງົບທີ່ເກີດຈາກອັດຕາການວ່າງວຽກສູງ ແລະ ເສດຖະກິດບໍ່ຂະຫຍາຍຕົວ ໄດ້ສົ່ງຜົນກະທົບເຮັດໃຫ້ເສດຖະກິດໃນພາກພື້ນແຫ່ງນີ້ຂະຫຍາຍຕົວຊ້າລົງໄປອີກນອກເໜືອຈາກຄວາມເຄັ່ງຕຶງທາງການຄ້າໂລກ, ລາຄານໍ້າມັນປັ່ນປ່ວນ ແລະ ກໍລະນີ ອັງກິດ ອອກຈາກ ອີຢູ ບໍ່ເປັນໄປຕາມກໍານົດ.
ກ່ອນໜ້ານີ້ ໄອເອັມເອັຟ ໄດ້ປັບຫຼຸດປະລິມານການຂະຫຍາຍຕົວຂອງເສດຖະກິດໃນພາກພື້ນນີ້ລົງເຫຼືອ 0,1% ຈາກ 1,1% ເມື່ອປີກ່ອນ ໂດຍໄດ້ຫຼຸດທ່າອ່ຽງຂອງເສດຖະກິດໃຫຍ່ທີ່ສຸດ 3 ປະເທດ ຄື: ອາຣັບບີ ຊາອຸດິດ, ອີຣານ ແລະ ຢູເອອີ ເພາະປັດໄຈໂລກເປັນຫຼັກ.
ການຂະຫຍາຍຕົວຂອງພາກພື້ນນີ້ຕໍ່າກວ່າລະດັບທີ່ຈໍາເປັນຕໍ່ການແກ້ໄຂບັນຫາການວ່າງວຽກ ໂດຍອັດຕາການວ່າງວຽກຂອງໄວໜຸ່ມກາຍ 25 – 30% ແລ້ວ, ເສດຖະກິດຕ້ອງຂະຫຍາຍຕົວກວ່ານີ້ທີ່ 1 – 2% ຈຶ່ງຈະສາມາດແກ້ໄຂບັນຫາໄດ້, ຂະນະທີ່ອັດຕາການວ່າງວຽກສະເລ່ຍຢູ່ທີ່ 11% ເມື່ອປຽບທຽບກັບ 7% ໃນປະເທດກໍາລັງພັດທະນາອື່ນໆ.