ກຸ່ມບໍລິສັດ ລົງທຶນພັດທະນາຫາຍເຊິ່ງ ລາວ ຈໍາກັດ ໄດ້ຈັດພິທີລາຍງານຜົນສໍາເລັດການກໍ່ສ້າງ ໂຄງສ້າງຕຶກອາຄານສໍານັກງານໄລຍະທີ 1 ຂອງໂຄງການພັດທະນາສູນການຄ້າ ແລະ ການທ່ອງທ່ຽວ ເມືອງຫ້ວຍຊາຍ ມີສະຖານທີ່ຕັ້ງຢູ່ສົ້ນຂົວມິດຕະພາບ ລາວ – ໄທ ແຫ່ງທີ 4 ຄາດວ່າຈະເປີດທົດລອງນໍາໃຊ້ໃນເດືອນກັນຍາ 2020.
ທ່ານ ຫານ ຈາເວີຍ ຜູ້ອໍານວຍການໃຫຍ່ ກຸ່ມບໍລິສັດ ລົງທຶນພັດທະນາຫາຍເຊິ່ງ ລາວ ຈໍາກັດ ກ່າວວ່າ: ໂຄງການພັດທະນາສູນການຄ້າ ແລະ ການທ່ອງທ່ຽວ ເມືອງຫ້ວຍຊາຍ ເຊິ່ງການກໍ່ສ້າງໄດ້ແບ່ງເປັນສອງໄລຍະ ຄື: ໄລຍະທີ 1 ແມ່ນໄດ້ເລີ່ມລົງມືກໍ່ສ້າງມາແຕ່ເດືອນມັງກອນ 2019 ເປັນຕົ້ນມາ ປະກອບມີ: ການກໍ່ສ້າງໂຮງແຮມ, ສໍານັກງານຫ້ອງການ, ອາພາດເມັນ, ຮ້ານກິນດື່ມ ແລະ ເຮືອນພັກລຽບຕາມແຄມນໍ້າຂອງ. ສ່ວນໄລຍະທີ 2 ແມ່ນກໍ່ສ້າງສູນການຄ້າປອດພາສີ ຈໍານວນ 5 ຕຶກ, ທ່າເຮືອທ່ອງທ່ຽວ ແລະ ສະຖານີຂົນສົ່ງໂດຍສານ.
ໂຄງການດັ່ງກ່າວມີເນື້ອທີ່ 13,8 ເຮັກຕາ ໂດຍແມ່ນບໍລິສັດໃນເຄືອຂອງ ກຸ່ມບໍລິສັດ ລົງທຶນພັດທະນາຫາຍ ເຊິ່ງເປັນຜູ້ຮັບເໝົາກໍ່ສ້າງດ້ວຍມູນຄ່າການລົງທຶນ 100 ລ້ານໂດລາສະຫະລັດ. ເວົ້າສະເພາະການກໍ່ສ້າງໂຄງສ້າງອາຄານສູງ 17 ຊັ້ນ ຈໍານວນ 2 ຫຼັງ ມີມູນຄ່າການກໍ່ສ້າງ 40 ລ້ານໂດລາ ໃຊ້ເວລາການກໍ່ສ້າງໄລຍະທໍາອິດພຽງແຕ່ 10 ເດືອນ ແລະ ຄາດວ່າຈະເປີດທົດລອງນໍາໃຊ້ໃນເດືອນກັນຍາ 2020.
ໂອກາດນີ້, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ໄດ້ມີຄໍາເຫັນວ່າ: ການລົງທຶນຂອງບໍລິສັດແມ່ນເປັນການປະກອບສ່ວນເຂົ້າໃນການຈັດຕັ້ງປະຕິບັດຍຸດທະສາດການພັດທະນາແຂວງບໍ່ແກ້ວ ຫຼື ສ້າງແຂວງບໍ່ແກ້ວ ໃຫ້ເປັນໃຈກາງດ້ານການບໍລິການ – ການຄ້າທີ່ເຊື່ອມຕໍ່ລະຫວ່າງແຂວງບໍ່ແກ້ວ ກັບ ພາກເໜືອຂອງໄທ ເຊິ່ງການລົງທຶນໄດ້ເປັນການເສີມສ້າງສາຍພົວພັນອັນດີງາມລະຫວ່າງ ສປປ ລາວ ແລະ ສປ ຈີນ. ພາຍຫຼັງສໍາເລັດການກໍ່ສ້າງແລ້ວຈະນໍາຜົນປະໂຫຍດອັນຫຼວງຫຼາຍມາສູ່ແຂວງບໍ່ແກ້ວ ແລະ ສ້າງວຽກເຮັດງານທໍາໃຫ້ແກ່ປະຊາຊົນ ເຮັດໃຫ້ນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວແຂວງບໍ່ແກ້ວ ນັບມື້ຫຼາຍຂຶ້ນ.
ພິທີລາຍງານຜົນສໍາເລັດການກໍ່ສ້າງ ໂຄງສ້າງຕຶກອາຄານສໍານັກງານໄລຍະທີ 1 ຈັດຂຶ້ນໃນທ້າຍອາທິດຜ່ານມາ ຢູ່ທີ່ສົ້ນຂົວມິດຕະພາບ ລາວ – ໄທ ແຫ່ງທີ 4 ເມືອງຫ້ວຍຊາຍ ແຂວງບໍ່ແກ້ວ ເປັນກຽດເຂົ້າຮ່ວມຂອງ ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ມີບັນດາການນໍາຂອງແຂວງ, ເມືອງ, ພະແນກການກ່ຽວຂ້ອງ ແລະ ຕາງໜ້າບໍລິສັດເຂົ້າຮ່ວມ.
[ ຂ່າວ: ສົມສະຫວິນ; ຮູບ: ບຸນເພັດ ]
