ການແຂ່ງຂັນຍິງປືນ ໄອພີເອັສຊີ ຊີງແຊັມນາໆຊາດ ແລະ ແຂ່ງຂັນສະເພາະພາຍໃນປະເທດ ຊີງຂັນພະນະທ່ານປະທານປະເທດ ແຫ່ງ ສປປ ລາວ ຄັ້ງທີ l ປະຈຳປີ 2019 ເປັນການແຂ່ງຂັນລະດັບນາໆຊາດ ລະດັບ 3 ( ເລໂວ 3 ) ແລະ ແຂ່ງຂັນພາຍໃນປະເທດຈັດຂຶ້ນລະຫວ່າງວັນທີ 25 – 27 ຕຸລາຜ່ານມາ ທີ່ສະໜາມຝຶກຊ້ອມກີລາຍິງປືນ 5 ເມສາ ເມືອງໄຊເສດຖາ ນະຄອນຫຼວງວຽງຈັນ.
ລາຍການດັ່ງກ່າວມີນັກກີລາທັງໝົດ 148 ຄົນ ມາຈາກ 10 ປະເທດ ປະກອບມີ: ເຈົ້າພາບ ສປປ ລາວ 41 ຄົນ, ໄທ 36 ຄົນ, ສປ ຈີນ 49 ຄົນ, ຮົງກົງ 9 ຄົນ, ອິນໂດເນເຊຍ 2 ຄົນ, ກຳປູເຈຍ 3 ຄົນ, ການາດາ 1 ຄົນ, ອົສຕຣາລີ 1 ຄົນ, ຣັດເຊຍ 5 ຄົນ ແລະ ອາເມຣິກາ 1 ຄົນ ໃນຈຳນວນ 148 ຄົນ ຕ້ອງແຂ່ງຂັນ 15 ສະໜາມ ໃນ 6 ລາຍການ.
ຜ່ານການແຂ່ງຂັນໃນໄລຍະ 3 ວັນ ຜົນປາກົດວ່າ:
ລາຍການພາຍໃນ ປະເພດປືນສະແຕນດາດ ທີ 1 ແມ່ນ ທ້າວ ຕຸ້ຍ ພານຸວົງ, ທີ 2 ພານາລິນ ພາມີສິດ, ທີ 3 ທ້າວ ຕ່າມ ໄຊມະນີ.
ປະເພດໂອເພັນ ທີ 1 ຫົງພະຈັນ ດາລາວົງ, ທີ 2 ໄກສຸພົນ ສຸລິໂຍ, ທີ 3 ພູທອນ ກໍລະສັກ.
ໂປດັກຊັ່ນ ທີ 1 ທ້າວ ເພັດນະຄອນ ພາມີສິດ, ທີ 2 ທ້າວ ດາວພະຈັນ ພຸດທະບັນດິດ ແລະ ທີ 3 ທ້າວ ຄຳຊະນະ ຈະເລີນໄຊ.
ສ່ວນການແຂ່ງຂັນລະດັບສາກົນ ປະເພດປືນໂປດັກຊັ່ນ ອ໋ອບຕິກ ປະກອບມີ:
ຮຸ່ນເຍົາວະຊົນ ຫຼື ລາຍການ ຊຸບເປີຈູເນຍທີ 1 ແມ່ນຕົກເປັນຂອງ ທ້າວ ຕົ້ນຄຳ ເມືອງມະນີ ( ລາວ ).
ລາຍການໂອເພັນ ທີ 1 ຣານະກຸນ ພັດທະນາເສບ ( ໄທ ), ທີ 2 ຕິຕິນັດ ( ໄທ ), ທີ 3 ວັດ ສີຈິນຕາອັງກຸນ ( ໄທ ).
ລາຍການຄລາສສິກ ທີ 1 ແມ່ນ ໂອລິເວີ ມາກ ( ຈາກອົສຕຣາລີ ), ທີ 2 ເອກ ວັງມີ ( ໄທ ), ທີ 3 ສານີ ລັງສີຣັດຕະນະວົງ ( ໄທ ).
ລາຍການສະແຕນດາດ ທີ 1 ວີສິດ ສີຍະໄພ ( ໄທ ), ທີ 2 ນາວັດ ເຊກເພືອກສາ ( ໄທ )ແລະ ທີ 3 ອາທິບ ອານັນຕາວັນ ( ໄທ ).
( ຂ່າວ – ຮູບ: ສົງການ + ຄໍາສອນ )