ລາຍການອາຫານວ່າງມື້ນີ້ຂໍແນະນໍາຈືນມັນຝຣັ່ງບົດຍັດໄສ້ ຊີສ ( Cheese Croquettes ) ໂດຍຈະໄດ້ປະໂຫຍດຈາກມັນຝຣັ່ງ ແລະ ຊີສ ແຕ່ບໍ່ຄວນກິນຫຼາຍເກີນໄປເພາະຊີສຈະເຮັດໃຫ້ນໍ້າໜັກຂຶ້ນ.
ສ່ວນປະສົມ: ຝຣັ່ງ 300 ກຣາມ, ນົມສົດ 2 ບ່ວງແກງ, ເນີຍເຄັມ 1 ບ່ວງແກງ, ແຮັມ ( Ham ) 2 ແຜ່ນ, ເບຄອນ ( Bacon ) 2 ຕ່ອນ, ເກືອ 1 ບ່ວງກາເຟ, ພິກໄທ 1/2 ບ່ວງກາເຟ, ໄຂ່ແດງ 1 ໜ່ວຍ, ອີດາມຊີສ ( Edam Cheese ) 3 ແຜ່ນ, ໄຂ່ໄກ່ ( ສຳລັບຊຸບແປ້ງ ) 1 ໜ່ວຍ, ແປ້ງສາລີ 1 ຖ້ວຍ, ເກັດເຂົ້າໜົມປັງ 1 ຖ້ວຍ, ນ້ຳມັນສຳລັບຈືນ.
ວິທີປຸງແຕ່ງ:
ລ້າງມັນໃຫ້ສະອາດແລ້ວນຳໄປຕົ້ມຈົນສຸກດີ ປະໄວ້ໃຫ້ເຢັນລອກເປືອກອອກ ແລະ ນຳໄປບົດ, ເມື່ອບົດຮຽບຮ້ອຍກໍເອົາໃສ່ຊາມໃຫຍ່ປະສົມກັບນົມ, ເນີຍເຄັມ, ເກືອ, ພິກໄທ ແລະ ໄຂ່ແດງຄົນໃຫ້ເຂົ້າກັນ. ຈາກນັ້ນ, ຈຶ່ງຊອຍແຮັມ ແລະ ເບຄອນໃຫ້ເປັນຕ່ອນນ້ອຍໆລົງໃສ່ຊາມແລ້ວຄົນໃຫ້ເຂົ້າກັນດີອີກເທື່ອໜຶ່ງ.
ຫຼັງຈາກນັ້ນກໍເອົາມັນບົດມາປັ້ນເປັນກ້ອນວົງມົນ ຫຼື ຈະປັ້ນແບບໃດກໍໄດ້ແລ້ວແຕ່ມັກ ແລະ ຊອຍຊີສໃສ່ທາງໃນພ້ອມ, ເມື່ອປັ້ນແລ້ວນໍາໄປແຊ່ຊ່ອງແຂງປະມານ 30 – 60 ນາທີ ຈຶ່ງເອົາອອກມາ ແລະ ເອົານ້ຳມັນໃສ່ໝໍ້ຄ້າງໄຟປານກາງ ເອົາກ້ອນມັນບົດໄປຊຸບແປ້ງສາລີແລ້ວຊຸບໄຂ່ສຸດທ້າຍຊຸບເກັດເຂົ້າໜົມປັງ ແລະ ເອົາລົງຈືນໃຫ້ເປັນສີເຫຼືອງງາມຕັກຂຶ້ນມາປະໄວ້ໃຫ້ສະເດັດນ້ຳມັນ ຈັດໃສ່ຈານເສີບພ້ອມກັບຊ໋ອດໝາກເຫຼ່ນ ຫຼື ໝາກເຜັດ.
( ຂໍ້ມູນຈາກ: thairath.co.th, ຮຽບຮຽງ: ນຸ້ມນິ້ມ )
