ວັນທີ 22 ຕຸລາ 2019 ນີ້ທີ່ຫ້ອງວ່າການປົກຄອງເມືອງສະໝ້ວຍ ແຂວງສາລະວັນ ໄດ້ມີພິທີມອບ – ຮັບໜ້າທີ່ຜູ້ຮັກສາການເລຂາພັກເມືອງ – ເຈົ້າເມືອງ ລະຫວ່າງ ສະຫາຍ ບຸນນານ ປັນຍາຈັກ ຮັກສາການເລຂາພັກເມືອງ ເຈົ້າເມືອງສະໝ້ວຍ ຜູ້ເກົ່າ ກັບ ສະຫາຍ ບຸນເຕີ້ຍ ດວງສຸລິຍະວົງສາ ເລຂາພັກເມືອງ ຮັກສາການເຈົ້າເມືອງ ຜູ້ໃໝ່ ໂດຍໃຫ້ກຽດເຂົ້າຮ່ວມຂອງ ສະຫາຍ ບົວທອງ ຄຸນຍອດປັນຍາ ຮອງເລຂາພັກແຂວງ ຮອງເຈົ້າແຂວງສາລະວັນ, ມີການນຳຂັ້ນແຂວງ, ພະນັກງານກໍ່ສ້າງຮາກຖານ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດການນຳຂັ້ນເມືອງ, ພະນັກງານຫຼັກແຫຼ່ງພາຍໃນເມືອງເຂົ້າຮ່ວມ.
ໂດຍປະຕິບັດຕາມຂໍ້ຕົກລົງຂອງຄະນະປະຈຳພັກແຂວງສາລະວັນ ເລກທີ 405/ຄຈພຂ.ສວ ລົງວັນທີ 4 ຕຸລາ 2019 ວ່າດ້ວຍການຮັບຮອງເອົາຜົນສຳເລັດການເລືອກຕັ້ງເອົາຄະນະບໍລິຫານງານພັກເມືອງສະໝ້ວຍ ຊຸດໃໝ່ ຄັ້ງທີ VIII ແລະ ຂໍ້ຕົກລົງຂອງທ່ານເຈົ້າແຂວງສາລະວັນ ສະບັບເລກທີ 651/ຈຂ.ສວ ລົງວັນທີ 18 ຕຸລາ 2019 ວ່າດ້ວຍການແຕ່ງຕັ້ງ ທ່ານ ບຸນເຕີ້ຍ ດວງສຸລິຍະວົງສາ ເລຂາພັກເມືອງ ເປັນຜູ້ຮັກສາການເຈົ້າເມືອງສະໝ້ວຍ ຄົນໃໝ່.
ຈາກນັ້ນ, ສະຫາຍ ບຸນນານ ປັນຍາຈັກ ຮັກສາການເຈົ້າເມືອງສະໝ້ວຍ ຜູ້ເກົ່າ ກໍໄດ້ຜ່ານບົດລາຍງານການຈັດຕັ້ງປະຕິບັດວຽກງານໃນໄລຍະ 5 ເດືອນຜ່ານມາ ທີ່ໄດ້ຮັບໜ້າທີ່ໃນການຊີ້ນຳໆພາ ເຊິ່ງມີຜົນສຳເລັດຫຼາຍດ້ານ ໂດຍສະເພາະແມ່ນໄລຍະການສຸມໃສ່ກະກຽມກອງປະຊຸມໃຫຍ່ຂອງອົງຄະນະພັກເມືອງ ຄັ້ງທີ VIII ທີ່ໄດ້ຮັບຜົນສຳເລັດຫຼາຍດ້ານ, ພ້ອມທັງໄດ້ມອບສິດ ແລະ ໜ້າທີ່ ໃຫ້ຜູ້ຮັກສາການເຈົ້າເມືອງຄົນໃໝ່ ສືບຕໍ່ຈັດຕັ້ງປະຕິບັດ ແລະ ຊີ້ນຳໆພາ, ຊຸກຍູ້ການພັດທະນາເມືອງສະໝ້ວຍ ໃຫ້ກ້າວໄປເລື້ອຍໆ. ຈາກນັ້ນ, ສະຫາຍ ບຸນເຕີ້ຍ ດວງສຸລິຍະວົງສາ ກໍໄດ້ຂຶ້ນຮັບໜ້າທີ່ ພ້ອມທັງໃຫ້ຄຳໝັ້ນສັນຍາວ່າ: ຈະສຸມທຸກເຫື່ອແຮງ, ສະຕິປັນຍາ ແລະ ຄວາມສາມາດ ສືບຕໍ່ເອົາໃຈໃສ່ຊີ້ນຳໆພາໃຫ້ເມືອງສະໝ້ວຍ ໄດ້ຮັບການພັດທະນາດີຂຶ້ນເລື້ອຍໆ, ເພີ່ມທະວີເຕົ້າໂຮມຄວາມສາມັກຄີເປັນປຶກແຜ່ນໃນໝູ່ຄະນະ, ປະຊາຊົນ ແລະ ຍອມຮັບຄຳຕຳໜິຕິຊົມ ເພື່ອຖອດຖອດບົດຮຽນເຊິ່ງກັນ ແລະ ກັນ ເພື່ອປັບປຸງລະບົບການຈັດຕັ້ງໃຫ້ດີ ແນໃສ່ຊຸກຍູ້ການພັດທະນາເສດຖະກິດສັງຄົມຂອງເມືອງ ໃຫ້ຂະຫຍາຍຕົວຢ່າງຕໍ່ເນື່ອງ ແລະ ນຳພາປະຊາຊົນຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ໂອກາດດຽວກັນນັ້ນ, ສະຫາຍ ບົວທອງ ຄຸນຍອດປັນຍາ ຮອງເຈົ້າແຂວງສາລະວັນ ກໍໄດ້ໂອ້ລົມ ແລະ ເນັ້ນໜັກໃຫ້ຄະນະບໍລິຫານງານພັກເມືອງ ຊຸດໃໝ່ ກໍຄືຜູ້ຮັກສາການເຈົ້າເມືອງສະໝ້ວຍ ຄົນໃໝ່ ເອົາໃຈໃສ່ສືບຕໍ່ໃນການຊີ້ນຳໆພາວຽກງານຕ່າງໆ ໃຫ້ດີຂຶ້ນເລື້ອຍໆ, ເຕົ້າໂຮມຄວາມສາມັກຄີໃນໝູ່ຄະນະ ແລະ ປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາ, ພ້ອມທັງເອົາໃຈໃສ່ປັບປຸງລະບົບການຈັດຕັ້ງໃຫ້ສອດຄ່ອງ, ເໝາະສົມ ຄວບຄູ່ກັບຄວາມຮູ້ – ຄວາມສາມາດ, ຮັບປະກັນລັກສະນະສືບທອດຕໍ່ເນື່ອງ ແລະ ເຮັດໃຫ້ການຈັດຕັ້ງໃນແຕ່ລະຂັ້ນສົມສ່ວນ, ມີການເຄື່ອນໄຫວຢ່າງຕັ້ງໜ້າ ແລະ ມີປະສິດທິພາບ.
( ຂ່າວ – ຮູບ: ວິໄລວອນ ສິດທິໄຊ )
