ຫົວໜ້າກົມສື່ມວນຊົນຮຽກຮ້ອງໃຫ້ສື່ມວນຊົນລາວ ທຸກສຳນັກທັງສື່ໃໝ່ ແລະ ສື່ເກົ່າ ຈົ່ງພ້ອມກັນເຜີຍແຜ່, ຮັກສາ ແລະ ສົ່ງເສີມຄຸນຄ່າຂອງສຽງແຄນລາວ ໃຫ້ນັບມື້ກວ້າງຂວາງ, ພ້ອມປຸກລະດົມໃຫ້ພໍ່ແມ່ປະຊາຊົນຈົ່ງອະນຸຮັກ ແລະ ໂຄສະນາກ່ຽວກັບຄວາມສຳຄັນໃຫ້ສາກົນຮັບຮູ້ ເພື່ອການພັດທະນາແບບຍືນຍົງຂອງສຽງແຄນລາວ ໃຫ້ຄົງຢູ່ຄູ່ກັບສັງຄົມລາວຕະຫຼອດໄປ.
ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ຮູ້ວ່າ: ແຄນເປັນສັນຍະລັກຂອງວົງການສິລະປະວັນນະຄະດີ ແລະ ວັດທະນະທຳຂອງລາວ, ການໂຄສະນາເຜີຍແຜ່ແຄນ ຫຼື ສຽງແຄນລາວ ຜ່ານສື່ມວນຊົນ ເປັນການບົ່ງບອກເຖິງລັກສະນະຊາດລາວ ແລະ ລັກສະນະຂອງສື່ມວນຊົນ ປະຕິວັດລາວ ເພື່ອໃຊ້ເປັນເຄື່ອງໝາຍຂອງວຽກງານແນວຄິດ, ໂຄສະນາ, ຖະແຫຼງຂ່າວ ແລະ ສື່ມວນຊົນ.
ຕະຫຼອດໄລຍະຜ່ານມາ, ສື່ມວນຊົນລາວ ໄດ້ຕັ້ງໜ້າຈັດຕັ້ງປະຕິບັດໜ້າທີ່ໃນການໂຄສະນາ, ເຜີຍແຜ່ແຄນລາວ ໂດຍຕະຫຼອດ ເປັນຕົ້ນວັນທີ 1 ທັນວາ 1983 ພັກ – ລັດ ໄດ້ຕົກລົງສ້າງໂທລະພາບແຫ່ງຊາດ, ສື່ມວນຊົນລາວທີ່ນໍາຍຸກນຳສະໄໝ ເຊິ່ງເປັນໄລຍະທີ່ແຄນລາວໄດ້ຮັບການເຜີຍແຜ່ດ້ວຍເນື້ອໃນທີ່ເລິກເຊິ່ງ, ຫຼາຍຮູບຫຼາຍສີ ແລະ ກວ້າງຂວາງ. ພ້ອມນັ້ນ, ຍັງຖືກນຳເຂົ້າເກືອບທຸກລາຍການສື່ມວນຊົນຄືວິທະຍຸ, ໂທລະພາບ, ໂທລະໂຄ່ງ ແລະ ສື່ສິ່ງພິມຕ່າງໆ. ພິເສດແມ່ນໂທລະພາບລາວທຸກຊ່ອງ ໄດ້ນຳເອົາສຽງແຄນລາວ ເປັນສັນຍານສຽງເຕືອນຂອງໂທລະພາບ. ນອກນັ້ນ, ຍັງນຳເອົາສຽງແຄນລາວເຂົ້າໃນຫຼາຍລາຍການ ເຊັ່ນ: ລາຍການສຽງແຄນເຂົ້າໜຽວ, ສຽງແຄນແດນຈຳປາ, ລາຍການວັດທະນະທຳ ແລະ ລາຍການອື່ນໆ ເພື່ອເປັນເວທີສົ່ງເສີມແຄນລາວ ດ້ວຍການເຈາະເລິກຊີວິດ ແລະ ຜົນງານຂອງໝໍແຄນ, ຜູ້ຜະລິດແຄນ, ນັກຄົ້ນຄວ້າແຄນ ທັງພາຍໃນ ແລະ ຕ່າງປະເທດ, ສ່ອງແສງຂະບວນການເປົ່າແຄນໃນໝູ່ເຍົາວະຊົນ, ຊາວໜຸ່ມ, ຄົນຮຸ່ນໃໝ່, ຜູ້ຟັງ ແລະ ຜູ້ຊົມ.
ເຖິງຢ່າງໃດກໍຕາມ, ຫຼັງຈາກທີ່ອົງການ ອຸຍເນສໂກ ໄດ້ຮັບຮອງເອົາສຽງແຄນເຊື້ອຊາດລາວເປັນມໍລະດົກນາມມະທຳຂອງມວນມະນຸດ ໃນວັນທີ 14 ມີນາ 2018 ທີ່ນະຄອນຫຼວງປາຣີ ປະເທດຝຣັ່ງ, ພ້ອມກັບການພັດທະນາຢ່າງໄວວາຂອງສື່ແບບໃໝ່ ເຫັນວ່າການເຜີຍແຜ່ ແລະ ສົ່ງເສີມແຄນລາວ ແລະ ວົງການແຄນຜ່ານສື່ມວນຊົນ ຍັງບໍ່ທັນຕອບສະໜອງໄດ້ຄວາມຮຽກຮ້ອງຕ້ອງການຂອງມວນຊົນ.
ດັ່ງນັ້ນ, ເພື່ອເຮັດໃຫ້ສາກົນຮັບຮູ້ ແລະ ເຂົ້າໃຈ ເຖິງຄຸນຄ່າສຽງແຄນເຊື້ອຊາດລາວເພີ່ມຕື່ມ, ສື່ມວນຊົນລາວທຸກປະເພດຕ້ອງໄດ້ເອົາໃຈໃສ່ພະຍາຍາມຕື່ມໃນການປັບປຸງເນື້ອໃນ ແລະ ຮູບການນຳສະເໜີຂໍ້ມູນ – ຂ່າວສານກ່ຽວກັບແຄນລາວ ນຳໃຊ້ສື່ແບບໃໝ່ກະຈາຍຂ່າວການປະກາດສຽງແຄນ, ອອກຂ່າວຂະບວນແຫ່ແຄນ ແລະ ສ່ອງແສງກິດຈະກຳຕ່າງໆປິ່ນອ້ອມຫົວຂໍ້ແຄນ.
ຂ່າວ: ກາວຊົ່ງ
