ໃນວັນເສົາ 19 ຕຸລາ 2019 ທ່ານ Gianni Infantino ປະທານສະຫະພັນບານເຕະນາໆຊາດ (FIFA) ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ເຊິ່ງໃນຕອນເຊົ້າ ວັນດຽວກັນນັ້ນ ໄດ້ເຂົ້າພົບປະກັບ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ຫລັງຈາກນັ້ນແມ່ນໄດ້ເດີນທາງໄປສະຫນາມກິລາແຫ່ງຊາດຫລັກ 16 ແລະ ໃນຕອນແລງແມ່ນໄດ້ເຂົ້າມາຢ້ຽມຢາມ ຫ້ອງການ ສະຫະພັນບານເຕະແຫ່ງຊາດລາວ ແລະ ເຂົ້າຮ່ວມພິທີເປີດ ການແຂ່ງຂັນບານເຕະເຍົາວະຊົນ ຊີງຂັນ ສຕລ ລຸ້ນອາຍຸ 15 ປີ ປະຈຳປີ 2019.
ຈຸດປະສົງມາໃນຄັ້ງນີ້ກໍເພື່ອມາຢ້ຽມຢາມບັນດາແຕ່ລະປະເທດທີ່ເປັນສະມາຊິກສະຫະພັນບານເຕະນາຯຊາດ ເຊິ່ງ ສປປ ລາວ ເປັນປະເທດທີ 6 ທີ່ ປະທານ ສະຫະພັນບານເຕະນາຯຊາດມາຢ້ຽມຢາມຕໍ່ຈາກ ເລບານອນ, ສປປ ເກົາຫລີ, ມົງໂກລີ, ບັງກະລາເທດ, ສປ ຈີນ ແລະ ສປປ ລາວ.
ທ່ານ Gianni Infantino ປະທານສະຫະພັນບານເຕະນານາຊາດ (FIFA) ແມ່ນຢ້ຽມຢາມ ສປປ ລາວ ເປັນຄັ້ງທໍາອິດເຊິ່ງເປັນຄົນສັນຊາດ: ສະວິດ ຖືກເລືອກຕັ້ງເປັນປະທານສະຫະພັນບານເຕະນາໆຊາດ (FIFA) ກາງສະໄໝ ໃນປີ 2016-2019 ແລະ ຖືກເລືອກຕັ້ງອີກຄັ້ງ ໃນປີ 2019-2023, ຄັ້ງລ່າສຸດທີ່ປະທານ ສະຫະພັນບານເຕະນາໆຊາດ (FIFA) ໄດ້ມາຢ້ຽມຢາມ ສປປ ລາວ ແມ່ນປີ 2011 ໂດຍທ່ານ Joseph Blatter ສັນຊາດສະວິດ.
ຂອບໃຈຮູບຈາກ: ສຕລ
