ນະຄອນຫຼວງຈາກາຕາ ຂອງປະເທດອິນໂດເນເຊຍ ຍັງມີປາກົດການດິນຍຸບລົງຕໍ່ເນື່ອງ ປີລະປະມານ 12 ຊັງຕີແມັດ ໂດຍສະເພາະບໍລິເວນທາງເໜືອຂອງເມືອງເຖິງວ່າລະດັບນໍ້າໃຕ້ດິນ ເຊິ່ງຖືກລະບຸວ່າເປັນຕົວການທີ່ເຮັດໃຫ້ແຜ່ນດິນຍຸບລົງຈະປັບຕົວດີຂຶ້ນກໍຕາມ.
ການທີ່ລັດຖະບານອິນໂດເນເຊຍ ຈໍາກັດການສູບນໍ້າໃຕ້ດິນມາໃຊ້ໃນໄລຍະ 3 ປີທີ່ຜ່ານມາ ເຮັດໃຫ້ລະດັບນໍ້າໃຕ້ດິນຢູ່ໃນສະພາບດີຂຶ້ນ, ແຕ່ເນື້ອທີ່ທາງເໜືອຂອງເມືອງຫຼວງອິນໂດເນເຊຍ ຍັງຍຸບລົງປີລະ 12 ຊັງຕີແມັດ ເຊິ່ງເປັນຜົນມາຈາກການເຄື່ອນທີ່ຂອງແຜ່ນດິນ.
ສ່ວນອີກທາງໜຶ່ງນັ້ນ, ລັດຖະບານອິນໂດເນເຊຍ ຕັດສິນໃຈຈ້າງ ບໍລິສັດ ແມກຄິນຊີ ແອນ ຄອມພານີ ໃຫ້ມາເຮັດໜ້າທີ່ໃຫ້ຄໍາປຶກສາຄວາມເປັນໄປໄດ້ໃນການຍ້າຍເມືອງຫຼວງໄປ ແຂວງກາລີມັນຕັນ ຕາເວັນອອກໃນເກາະບໍນຽວ ໂດຍບໍລິສັດດັ່ງກ່າວຈະມາຮັບໄລຍະການສຶກສາທີ່ລັດຖະບານເຮັດໄປແດ່ແລ້ວ.
ໃນດ້ານສັງຄົມ, ວັດທະນະທໍາ, ສິ່ງແວດລ້ອມ ແລະ ຜົນກະທົບທາງເສດຖະກິດ ຫາກຍ້າຍເມືອງຫຼວງຕາມລັດຖະບານອິນໂດເນເຊຍ ປະກາດໄວ້ກ່ອນໜ້ານີ້, ການສຶກສາຈະໃຊ້ເວລາ 3 ເດືອນຈະໄປເບິ່ງເລື່ອງເງິນລົງທຶນທີ່ຈະໃຊ້ໃນການຍ້າຍເມືອງຫຼວງຄັ້ງນີ້ນໍາອີກ.