ບໍລິສັດ ດາວຄຳ ຄອນກີດ ແລະ ບໍລິສັດ ດີເຄ ຈຽງຄອນກີດ ໃຫ້ການຊຸກຍູ້ນໍ້າທດື່ມ ຈຳນວນ 50 ແກັດ ໃຫ້ພະແນກຕຳຫຼວດຈາລະຈອນ ນະຄອນຫຼວງວຽງຈັນ (ນວ) ນຳໃຊ້ເຂົ້າໃນການປະກອບສ່ວນປ້ອງກັນຄວາມສະຫງົບ ແລະ ປ້ອງກັນຄວາມໄພ ສ້າງຄວາມສະດວກໃນການທ່ຽວຊົມງານບຸນຊວງເຮືອປະເພນີ ບຸນອອກພັນສາປະວໍລະນາ ປະຈຳປີ 2019 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ລະຫວ່າງວັນທີ 10-14 ຕຸລາ 2019
ພິທີມອບ-ຮັບນໍ້າດື່ມດັ່ງກ່າວ ໄດ້ມີຂຶ້ນ ເມື່ອວັນທີ 10 ຕຸລາ 2019 ທີ່ພະແນກຕຳຫຼວດ ຈາລະຈອນ ນະຄອນຫຼວງວຽງຈັນ ເປັນການກ່າວມອບຂອງທ່ານ ສຸຕ່າ ຄຳພັນທອງ ປະທານ ບໍລິສັດ ດາວຄຳ ຄອນກີດ ແລະ ບໍລິສັດ ດີເຄ ຈຽງຄອນກີດ ແລະ ຕາງໜ້າກ່າວຮັບແມ່ນທ່ານ ພັນໂທ ບຸນມາກ ສູນດາໄລ ຮອງຫົວໜ້າພະແນກຕຳຫຼວດ ຈາລະຈອນ ນະຄອນຫຼວງວຽງຈັນ, ມີທ່ານ ພັນໂທ ຄຳໄຕ ໝັ້ນໂນລິນ ຮອງຫົວໜ້າພະແນກຕຳຫຼວດ ຈາລະຈອນ ພ້ອມດ້ວຍກອງກຳລັງຕຳຫຼວດ ຈາລະຈອນ ນວ ແລະ ພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ນອກຈາກການອຸປະຖຳໃນຄັ້ງນີ້ ແລ້ວ ບໍລິສັດ ດາວຄຳ ຄອນກີດ ແລະ ບໍລິສັດ ດີເຄ ຈຽງຄອນກີດ ກໍຍັງໄດ້ໃຫ້ການຊຸກຍູ້ເຄື່ອງກິລາ ໃຫ້ຈຳນວນ 193 ຊຸດລວມມູນຄ່າ 20 ລ້ານກວ່າກີບ, ໃນນັ້ນ ມອບໃຫ້ພະແນກຕຳຫຼວດຈາລະຈອນ ນະຄອນຫຼວງວຽງຈັນ, ຈຳນວນ 68 ຊຸດ ກອງບັນຊາການປ້ອງກັນຄວາມສະຫງົບ ເມືອງໄຊທານີ (ປກສ) ແລະ ຈຳນວນ 90 ຊຸດ ໃຫ້ເມືອງໄຊເຊດຖາ ນະຄອນຫຼວງວຽງຈັນ ເພື່ອມີຄວາມສະດວກໃນການຈັດກິດຈະກຳ ແລະ ເຄື່ອນໄຫວແຂ່ງຂັນກັບບັນດາພາກສ່ວນຕ່າງໆ ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຂອງໜ່ວຍພັກທັງສອງພາກສ່ວນດັ່ງກ່າວ ທີ່ຈະໄຂຂຶ້ນ ໃນມໍ່ໆນີ້ ອີກດ້ວຍ.
ຂ່າວ: ສົງການ, ຮຽບຮຽງ: ຄໍາສອນ
