ມາສດ້າ ຮຸ່ນຊາວໜຸ່ມ ແລະ ຢູ-35 ຂຶ້ນນໍາກຸ່ມ ໃນການແຂ່ງຂັນບານເຕະຊ້າງ ລີກຄັບ 2019 - Laoedaily

ມາສດ້າ ຮຸ່ນຊາວໜຸ່ມ ແລະ ຢູ-35 ຂຶ້ນນໍາກຸ່ມ ໃນການແຂ່ງຂັນບານເຕະຊ້າງ ລີກຄັບ 2019

ທີມ ມາສດ້າ ຈີບີ ເອັບຊີ ດີກຣີແຊ໋ມຂັນຈີເອັດແບັດເຕີຣີ 2019 ມາໃໝ່ໆໝາດໆ ທັງຮຸ່ນຊາວໜຸ່ມ ແລະ ອາວຸໂສ 35 ປີ ຂຶ້ນໄປ ລົງສະໜາມນັດທີ 2 ຍັງຮັກສາຟອມເກັ່ງ ເກັບໄຊຊະນະ 2 ນັດລວດ ໄດ້ເຊັ່ນກັນ ມີ 6 ຄະແນນ ພ້ອມທັງແຊງໜ້າຄູ່ແຂ່ງຂັນຂຶ້ນນຳຈ່າຝຸງ ໃນການແຂ່ງຂັນກິລາເຕະບານ 8 ຄົນ ຊີງຂັນສະໜາມບານເຕະຫຍ້າທຽມ ຊ້າງ ເອັບຊີ ຫຼື ລາຍການ ຊ້າງ ລີກຄັບ 2019 ເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງສະໜາມຫຍ້າທຽມ ຊ້າງ ເອັບຊີ ຄົບຮອບ 7 ປີ.

ເມື່ອວັນທີ 5-6 ຕຸລາ ຜ່ານມາ ທີ່ສະໜາມເຕະບານຫຍ້າທຽມ ຊ້າງ ເອັບຊີ 3 ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ໄດ້ສືບຕໍ່ແຂ່ງຂັນບານເຕະ 2 ຮຸ່ນ ກໍຄື ຮຸ່ນທົ່ວໄປ ແລະ ຮຸ່ນ 35 ປີ ຊີງຂັນສະໜາມເຕະບານຫຍ້າທຽມ ຊ້າງ ເອັບຊີ ຫຼື ລາຍການ ຊ້າງ ລີກຄັບ 2019 ເຊິ່ງມີການແຂ່ງຂັນທັງ ໝົດ 9 ຄູ່ ຢ່າງເປັນປົກກະຕິ, ໃນນັ້ນ ຮຸ່ນ 35 ປີ ລົງສະໜາມ 5 ຄູ່ ແລະ ຮຸ່ນທົ່ວໄປ 4 ຄູ່ ໂດຍສະເພາະຜົນການແຂ່ງຂັນໃນວັນທີ 5 ຕຸລາ 2019 ທີມ ມາສດ້າ ຈີບີ ເອັບຊີ ທັງສອງຮຸ່ນດັ່ງກ່າວ ລົງສະໜາມໃນມື້ດຽວກັນ ສາມາດຮັກສາຟອມເກັ່ງ ໄລ່ຖະຫຼົ່ເອົາຊະນະຄູ່ແຂ່ງຂັນໄປແບບຂາດຮອຍ ສຳລັບ ຮຸ່ນຊາວໜຸ່ມ ມາສດ້າ ຖະຫຼົ່ມເອົາຊະນະ ທີມຟຣາມເມີ ເອັບຊີ 14-2 ປະຕູ ແຊງໜ້າທີມໝູ່ກັນຂຶ້ນເປັນທີ 1 ຂອງກຸ່ມ ເອ ສ່ວນຮຸ່ນ 35 ປີ ມາສດ້າ ກໍບໍ່ນ້ອຍໜ້າທີມຊາວໜຸ່ມເຊັ່ນກັນໄລ່ຖະຫຼົ່ມຊະນະ ທີມໜຶ່ງໃນດວງໃຈ 8-1 ປະຕູ ເກັບເພີ່ມ 6 ຄະແນນ ຫຍັບຂຶ້ນນຳຈ່າຝຸງທັນທີ່.
ສ່ວນຜົນການແຂ່ງຂັນຄູ່ອື່ນໆ ສຳລັບຮຸ່ນ 35 ປີ ທີມສ່ຽວກັນ ຊະນະ ໄອດີ 5-0 ປະຕູ, ຄອບຄົວ ເອີຣົບ ສະເໝີ ຮາດຣ໋ອກ 2-2 ປະຕູ, ເພື່ອນສະນິດ ຊະນະ ອົກສາມສອກ 2-0 ປະຕູ ແລະ ນ້ອງໃໝ່ ຖະຫຼົ່ມ ຮ້ານແກ້ວສົມໃຈ 4-1 ປະຕູ ສ່ວນຮຸ່ນທົ່ວໄປ ທີມສະຖານີລົດເມສາຍໃຕ້ ຖະຫຼົ່ມ ສີເມືອງກຣຸບ 8-1 ປະຕູ, ບໍລິສັດ ອິນທະພອນ ຊະນະ ເອັດ ທີທີ 5-3 ປະຕູ ແລະ ໝູ່ກັນ ສະເໝີ 3ເອັດ 1-1 ປະຕູ.

ລາຍການດັ່ງກ່າວ ມີການກຳນົດເງື່ອນໄຂນັກກິລາ ສຳລັບຮຸ່ນທົ່ວໄປ ຜູ້ທີ່ຕິດທີມຊາດ ແລະ ແຂ່ງເຕະບານລີກສູງສຸດຂອງປະເທດ ຫຼື ລາຍການ ເປບຊີ ລາວ ພຣີເມຍລີກ ລະດູການ 2018-2019 ສາມາດເຂົ້າຮ່ວມທີມໄດ້ພຽງ 5 ຄົນ ແລະ ລົງສະໜາມແຂ່ງຂັນໄດ້ 3 ຄົນ ສ່ວນຮຸ່ນ 35 ແລະ 40 ປີ ຂຶ້ນໄປ ແມ່ນຕ້ອງມີອາຍຸຕາມເງື່ອນໄຂທີ່ກຳນົດໄວ້ ຈຶ່ງຈະສາມາດເຂົ້າຮ່ວມແຂ່ງຂັນໄດ້ ລາຍການນີ້ ໄດ້ຮັບການອຸປະຖຳຫຼັກຈາກຜະລິດຕະພັນ ເບຍຊ້າງ ໂດຍນຳໃຊ້ສະໜາມຊ້າງ 3 ບ້ານສ້າງຄູ້ ເມືອງໄຊທານີ ຈັດແຂ່ງຂັນເປັນຫຼັກ ສະເພາະຮຸ່ນທົ່ວໄປ ມີ 10 ທີມ ຈັດແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດ ຄັດເອົາທີ 1-2 ຜ່ານເຂົ້າຮອບຕໍ່ໄປ ສ່ວນຮຸ່ນ 35 ປີ ມີ 10 ທີມ ຈັດເປັນກຸ່ມດຽວ ແຂ່ງຂັນພົບກັນໝົດ ແບບລະບົບລີກ (ແຂ່ງຂັນຮອບດຽວ) ຄັດເອົາທີມທີ່ມີຄະແນນດີທີ່ສຸດ ໄດ້ແຊ໋ມໄປຄອງ ຂະນະທີ່ຮຸ່ນ 40 ປີ ຂຶ້ນໄປ ແມ່ນຈະດຳເນີນແຂ່ງຂັນໃນເດືອນພະຈິກນີ້.
ສຳລັບລາງວັນຊະນະເລີດ ອັນດັບທີ 1 ທັງ 3 ຮຸ່ນ ຈະໄດ້ຮັບຂັນແຊ໋ມ ແລະ ເງິນລາງວັນ ທີມລະ 5 ລ້ານກີບ, ທີ 2 ຈະໄດ້ຮັບຂັນ ແລະ ເງິນສົດທີມລະ 3 ລ້ານກີບ, ທີ 3 ຈະໄດ້ຮັບຂັນ ແລະ ເງິນສົດທີມລະ 2 ລ້ານກີບ ແລະ ທີ 4 ຈະໄດ້ຮັບລາງວັນຊົມເຊີຍທີມລະ 1 ລ້ານກີບ.
ໂດຍ ສົງການ, ຮຽບຮຽງ: ຄໍາສອນ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ