ບໍລິສັດ Katalyst Partners ເປີດອົບຮົມຍົກລະດັບຄວາມຮູ້ໃນຫົວຂໍ້ ຈາກພະນັກງານສູ່ຜູ້ປະກອບການ - Laoedaily

ບໍລິສັດ Katalyst Partners ເປີດອົບຮົມຍົກລະດັບຄວາມຮູ້ໃນຫົວຂໍ້ ຈາກພະນັກງານສູ່ຜູ້ປະກອບການ

ໃນທ້າຍອາທິດຜ່ານມາ ບໍລິສັດ Katalyst Partners ເຊິ່ງເປັນບໍລິສັດໃຫ້ບໍລິການຝຶກອົບຮົມກ່ຽວກັບການບໍລິຫານທຸລະກິດ ແລະ ການພັດທະນາບຸກຄະລາກອນ ໄດ້ເປີດຊຸດອົບຮົມຊຸດທຳອິດຂຶ້ນຫຼັງຈາກທີ່ເປີດບໍລິສັດມາໄດ້ເດືອນປາຍ ພາຍໃຕ້ຫົວຂໍ້ ຈາກພະນັກງານສູ່ຜູ້ປະກອບການ Employee to Entrepreneur ຂຶ້້ນທີ່ສູນອົບຮົມສະຫະພັນແມ່ຍິງລາວ.

ການຝືກອົບຮົມໃນຄັ້ງນີ້ແມ່ນໃຊ້ເວລາ1 ມື້ເຕັມ ເຊິ່ງມີວິທະຍາກອນ3 ທ່ານທີ່ເປັນຜູ້ກໍ່ຕັ້ງບໍລິສັດ Katalyst Partners ໄດ້ແກ່ທ່ານ ແກ້ວວິສຸກ ດາລາສານ , ທ່ານ ຄຳຮູ້ ປານລືເດດ ແລະ ທ່ານ ໂທນີ ແຄມເບວ (Tony Campbell) ມາໃຫ້ຄວາມຮູ້ລະບົດຮຽນຕ່າງໆ
ເຊັ່ນ: ທັດສະນະໃນການເປັນນັກທຸລະກິດ, ຄວາມແຕກຕ່າງລະຫວ່າງພະນັກງານ ແລະ ຜູ້ປະກອບການ, ຂໍ້ສະດວກ ແລະ ທ້າທາຍໃນການກ້າວຈາກພະນັກງານສູ່ຜູ້ປະກອບການ, ການກຽມຄວາມພ້ອມກ່ອນຈະກ້າວ ສູ່ຜູ້ປະກອບການ ໂດຍສະເພາະກໍແມ່ນວິທີໃນການເອົາຊະນະສິ່ງທ້າທາຍ ໃນການປ່ຽນຈາກການເປັນພະນັກງານສູ່ຜູ້ປະກອບການ.


ສິ່ງສຳຄັນແມ່ນການປຸກຄວາມຄິດ ເພື່ອຄົ້ນຫາໃນສິ່ງທີ່ຕົນເອງມັກເພື່ອສາມາດສ້າງເປັນທຸລະກິດໃດໜຶ່ງຂຶ້ນມາ ເຊິ່ງຕ້ອງເບິ່ງແວດລ້ອມຫຼາຍປັດໄຈ ເພື່ອເຮັດໃຫ້ທຸລະກິດສາມາດເດີນໄປຫນ້າ ແລະ ປະສົບຜົນສຳເລັດ. ບັນດາຄຳຖາມສຳຄັນທີ່ຜູ້ປະກອບການຕ້ອງຕອບໃຫ້ໄດ້.


ໃນຕອນທ້າຍຜູ້ເຂົ້າຮ່ວມຝຶກອົບຮົມຍັງໄດ້ຮຽນຮູ້ການເຮັດແຜນທຸລະກິດໂດຍຫຍໍ້ ເຊິ່ງຕ້ອງຮູ້ຈັກ 9 ປັດໄຈສຳຄັນ ທີ່ບໍ່ຄວນເບິ່ງຂ້າມເປັນຕົ້ນແມ່ນກຸ່ມລູກຄ້າ, ບັນຫາຂອງລູກຄ້າ, ແຫຼ່ງລາຍຮັບ, ຕົ້ນທຶນການຜະລິດ, ຈຸດເດັ່ນຂອງເຮົາແມ່ນຫຍັງ ແລະ ອື່ນໆ ເພື່ອເປັນການປະກອບໃນການວິເຄາະແຜນທຸລະກິດຂອງເຮົາ.

ແຕ່ສິ່ງສຳຄັນທີ່ສຸດຂອງຜູ້ປະສົບຄວາມສຳເລັດກໍແມ່ນການລົມມືເຮັດ ແລະ ຢ່າຢ້ານຄວາມຫຼົມເຫລວ.


ທ່ານ ແກ້ວວິສຸກ ດາລາສານ ຜູ້ຮ່ວມກໍ່ສ້າງບໍລິສັດ ກ່າວໃນພິທີເປີດບໍລິສັດກ່ອນໜ້ານີ້ວ່າ: ພວກເຮົາເຫັນວ່າການພັດທະນາບຸກຄະລາກອນແມ່ນມີຄວາມສໍາຄັນຫຼາຍສໍາລັບອົງກອນ ຫຼື ທຸລະກິດໃດໜຶ່ງ ຈິ່ງເປັນຈຸດເລີ່ມຕົ້ນຂອງການລວມຕົວກັນໃນການສ້າງຕັ້ງບໍລິສັດ ເພື່ອໃຫ້ບໍລິການຈັດຝຶກອົບຮົມ ຫຼື ສໍາມະນາໃນການບໍລິຫານທຸລະກິດ ແລະ ການພັດທະນາບຸກຄະລາກອນ, ເນື່ອງຈາກວ່າການປ່ຽນແປງຂອງໂລກທີ່ໄວຫຼາຍ ເຮັດໃຫ້ບຸກຄະລາກອນທີ່ຈະຈົບຈາກສະຖາບັນການສຶກສາຍັງຄົງຕ້ອງຮຽນຮູ້ຢ່າງຕໍ່ເນື່ອງ ຈຶ່ງຈະທັນ ແລະ ຕອບໂຈດກັບໜ້າວຽກຕາມທີ່ຜູ້ປະກອບການຢາກໄດ້.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ