ເທື່ອນີ້ກັບມາແບບຍິ່ງໃຫຍ່ຂອງນັກສະແດງສາວຫຸ່ນໃຫຍ່ Angelina Jolie ຫຼັງຈາກຫ່າງຫາຍໄປດົນເກືອບ 5 ປີ ໃນບົດບາດແມ່ມົດຜູ້ໃຈຮ້າຍ ( Maleficent ) ແຕ່ການກັບມາໃນຄັ້ງນີ້ “ Maleficent Mistress of Evil ” ພາກ 2 ຈະເລົ່າເລື່ອງຫວນຄືນເຖິງທີ່ມາວ່າເປັນຫຍັງຊາວເມືອງຈຶ່ງເວົ້າໃຫ້ນາງວ່າເປັນ “ ນາງພະຍາຜີສາດ ” ກ່ອນທີ່ເຈົ້າຍິງ “ ອໍໂຣຣ່າ ” ຈະຂຶ້ນເປັນລາຊະນີ ໂດຍຈະເຂົ້າສາຍວັນທີ 17 ຕຸລານີ້ທຸກໂຮງຮູບເງົາທົ່ວປະເທດ.
ຮູບເງົາ “ Maleficent ນາງພະຍາຜີສາດ ” ພາກ 2 ຫຼື “ Maleficent Mistress of Evil ” ເປັນຜົນງານການກໍາກັບຂອງ Joachim Ronning ທີ່ເຄີຍສ້າງຜົນງານໃນຮູບເງົາ “ Pirates of the Caribbean: Dead Men Tell No Tales ” ເຊິ່ງຮູບເງົາ “ Maleficent ນາງພະຍາຜີສາດ ” ພາກ 2 ເປັນການນໍາເລື່ອງເລົ່າຈາກເທບນິຍາຍ Sleeping Beauty ມາດັດແປງໃໝ່ ໂດຍມີນັກສະແດງນໍາຈາກ Angelina Jolie, Elle Fanning ແລະ Michelle Pfeiffer.
ພາກນີ້ເປັນການເລົ່າເລື່ອງຕໍ່ຈາກພາກທໍາອິດເມື່ອເຈົ້າຍິງ “ ອໍໂຣຣ່າ ” ຮັບບົດໂດຍ Elle Fanning ທີ່ຕ້ອງການແຕ່ງດອງກັບເຈົ້າຊາຍແຕ່ “ ມາເລຟິເຊັນ ( Maleficent ) ” ຮັບບົດໂດຍ Angelina Jolie ບໍ່ເຫັນດີນໍາຈຶ່ງເປັນຕົ້ນເຫດທີ່ກໍ່ໃຫ້ເກີດສົງຄາມຄັ້ງໃໝ່ ເມື່ອລາຊະນີ “ ອິງກຣິດ ” ທີ່ຮັບບົດໂດຍ Michelle Pfeiffer ຜູ້ເປັນແມ່ຂອງເຈົ້າຍິງ “ ອໍໂຣຣ່າ ” ຕັ້ງກອງກໍາລັງທະຫານເພື່ອສູ້ກັບ “ ມາເລຟິເຊັນ ( Maleficent ) ” ແລະ ເຜົ່າພັນສັດວິເສດ ເຊິ່ງເປັນເລື່ອງເລົ່າການກ້າວຜ່ານເທບນິຍາຍສູ່ຮູບເງົາຜະຈົນໄພທີ່ຍິ່ງໃຫຍ່ ແລະ ເປັນການກັບມາອີກຄັ້ງຂອງ Angelina Jolie ໃນສາຍານາງຟ້າປີກປີສາດ.
ຢາກຮູ້ວ່າເລື່ອງລາວຈະເປັນແນວໃດ, ສົງຄາມລະຫວ່າງເທບກັບມະນຸດໃຜຈະເປັນຜູ້ຊະນະ ແລະ ເຈົ້າຍິງ “ ອໍໂຣຣ່າ ” ຈະໄດ້ແຕ່ງດອງ ຫຼື ບໍ່ ສາມາດເຂົ້າເບິ່ງໄດ້ທຸກໂຮງຮູບເງົາທົ່ວປະເທດລາວເຂົ້າສາຍໃນວັນທີ 17 ຕຸລາ 2019.
( ຂໍ້ມູນຈາກ: www.majorcineplex.com )
( ຮຽບຮຽງ: ນຸ້ມນິ້ມ )
