ສູນປິ່ນປົວ ແລະ ຮັກສາສຸກຂະພາບຕາທົ່ງປົ່ງ ຮ່ວມກັບ ສະພາອຸດສະຫະກຳ ແລະ ການຄ້າ ນະຄອນຫຼວງວຽງຈັນ, ມູນນິທິ ເອິນິວວີເຊິນ ແລະ ສະມາຄົມທຸລະກິດສິງກະໂປຢູ່ໃນ ສປປ ລາວ ຮ່ວມກັນຈັດໂຄງການ ຜ່າຕັດແກ່ນຕາຂຸ້ນ ໂດຍບໍ່ໄດ້ເສຍຄ່າ ໂດຍສະເພາະປະຊາຊົນຜູ້ທຸກຍາກ ແລະ ຜູ້ບໍ່ມີເງື່ອນໄຂໃນການປິ່ນປົວ ໃນທົ່ວນະຄອນຫຼວງວຽງຈັນ ແລະ ບັນດາແຂວງທີ່ໃກ້ຄຽງ.
ເຊິ່ງໂຄງການດັ່ງກ່າວ ຈະໄດ້ຈັດຂຶ້ນໃນລະຫວ່າງວັນທີ 11-13 ຕຸລາ 2019 ທີ່ສູນປິ່ນປົວ ແລະ ຮັກສາສຸຂະພາບຕາທົ່ງປົ່ງ ໂຮງໝໍເມືອງ 9 ແຫ່ງ ໃນນະຄອນຫຼວງວຽງຈັນ ເຊິ່ງໄດ້ເປີດໃຫ້ລົງທະບຽນແຕ່ ວັນທີ 4-9 ຕຸລາ 2019.
ມູນນິທິ ເອິນິວວີເຊິນ ແມ່ນອົງການຊ່ວຍເຫຼືອລ້າ, ບໍ່ຈຳກັດສາສະໜາ, ບໍ່ຈຳກັດສັນຊາດ ໂດຍໄດ້ຮັບການສະໜັບສະໜູນຈາກປະເທດສິງກະໂປ ເຊິ່ງໄດ້ດຳເນີນການຜ່າຕັດແກ່ນຕາຂຸ້ນໂດຍບໍ່ເສຍຄ່າ ສຳລັບຄົນທຸກຍາກ ແລະ ຜູ້ບໍ່ມີເງື່ອນໄຂ ຢູ່ສປປ ລາວ ໂດຍການຜ່າຕັດຕາທີ່ມີຄຸນນະພາບ ໃຊ້ເວລາພຽງ 5 ນາທີ, ປະກອບດ້ວຍທີມງານທ່ານໝໍຈາກປະເທດເນປານ ແລະ ສິງກະໂປ.
ມູນນິທິດັ່ງກ່າວ ມີທ່ານໝໍຜ່າຕັດຕາ ແລະ ພະຍາບານທີ່ມີຄຸນນະວຸດຫຼາຍກວ່າ 50 ທ່ານ, ນັບແຕ່ປີ 2011 ເປັນຕົ້ນມາ ໄດ້ຟື້ນຟູສາຍຕາຫຼາຍກວ່າ 30.000 ຄົນ ສໍາລັບຜູ້ທີ່ທຸກຍາກໃນປະເທດເນປານ, ມຽນມາ, ກຳປູເຈຍ ແລະ ອິນໂດເນເຊຍ.
ສຳລັບຜູ້ທີ່ມາລົງທະບຽນ ຜ່າຕັດຕາ ທີ່ໂຮງໝໍທົ່ງປົ່ງ ຈະມີທີ່ພັກ, ອາຫານ ແລະ ນ້ຳດື່ມສຳລັບຄົນເຈັບທຸກຄົນ, ສ່ວນຜູ້ທີ່ຜ່າຕັດຕາໃນມື້ທີໜຶ່ງ ຈະໄດ້ເປີດຕາໃນມື້ທີສອງ. ຫຼັງການຜ່າຕັດ ທາງມູນນິທິເອິນິວ ວີເຊິນ ຈະສະໜອງຢາ, ເລນ, ຢາຢອດຕາ ທີ່ມີຄວາມຈຳເປັນໃຫ້ແກ່ຜູ້ທີ່ມາປິ່ນປົວ. ສຳລັບຄົນເຈັບຜູ້ທີ່ສົນໃຈສາມາດຕິດຕໍ່ເບີໂທ: 030 572 9168, 020 5598 4248 ຫລື ຕິດຕໍ່ໂດຍກົງທີ່ໂຮງໝໍເມືອງ 9 ຕົວເມືອງ ຫຼື ໂຮງໝໍປົວຕາທົ່ງປົ່ງ.