ໂຄງການປະກວດ Mister International Laos 2019 ເດີນທາງມາຮອດຮອບ 20 ຄົນສຸດທ້າຍແລ້ວ ມາລຸ້ນນຳກັນວ່າໜຸ່ມໃດຈະສາມາດ ຄວ້າຕຳແໜ່ງດັ່ງກ່າວໄປຄອງ.
ຄໍລຳບັນເທີງມື້ນີ້ຜູ້ຂຽນຈະພາຜູ້ອ່ານມາຮູ້ຈັກກັບໜຸ່ມ ເຈ ໜຶ່ງໃນຜູ້ຜ່ານເຂົ້າຮອບ 20 ຄົນສຸດທ້າຍ.
ທ້າວ ຕິ່ງ ລີ MR20 ຫຼື ເຈ ອາຍຸ 20 ປີ ໃຫ້ສໍາພາດວ່າ: ປັດຈຸບັນຮຽນຢູ່ມະຫາວິທະຍາໄລແຫ່ງຊາດ ຄະນະອັກສອນສາດ ປີ 1 ແລະ ອາໄສຢູ່ບ້ານຮ່ອງຄ້າ ເມືອງຈັນທະບູລີ ນະຄອນຫຼວງວຽງຈັນ. ຕົນເອງຮູ້ສຶກດີໃຈຫຼາຍ ພ້ອມທັງເປັນກຽດສຸດທີ່ຄະນະກຳມະການໃຫ້ໂອກາດໂດຍນ້ອງເອງໄດ້ມີຄວາມພ້ອມທາງຮ່າງກາຍ ແລະ ຈິດໃຈ 100% ລວມທັງເອົາຄວາມໝັ້ນໃຈທາງດ້ານບຸກຄະລິກກະພາບ, ທັດສະນະຄະຕິ, ພິບໄຫວ ແລະ ອື່ນໆມາສະແດງໃຫ້ກໍາມະການໄດ້ເຫັນເຖິງຄວາມຕັ້ງໃຈປະຕິບັດ.
ສໍາລັບຄວາມຄາດຫວັງນ້ອງກໍບໍ່ໄດ້ຫວັງຫຍັງຫຼາຍ ເພາະໄດ້ມາຮອດຈຸດນີ້ແມ່ນໄກກວ່າທີ່ຫວັງໄວ້ແລ້ວ ໂດຍບໍ່ຄິດວ່າຕົນເອງຈະຜ່ານເຂົ້າຮອບ 20 ຄົນ ໄດ້ຊໍ້າ ແລະ ຖ້ານ້ອງໄດ້ເຂົ້າໃນຮອບຊີງຊະນະເລີດມັນກໍຈະເປັນ ຄວາມພາກພູມໃຈທີ່ສຸດໃນຕົວຂອງນ້ອງ ເພາະໄດ້ປະສົບກັບຄວາມສຳເລັດ ແຕ່ຖ້າບໍ່ຜ່ານຕົນເອງກໍຈະນຳເອົາປະສົບການນີ້ ລວມທັງຄຳຕິຊົມຂອງຄະນະກຳມະການໄປປັບປຸງ ແລະ ພັດທະນາຕົນເອງໃນປີໜ້າ ເພາະເຊື່ອ ແລະ ເຄົາລົບຄຳຕັດສິນຂອງຄະນະກຳມະການ.
ສ່ວນກິດຈະກຳເວລາວ່າງແມ່ນມັກໄປອອກກຳລັງກາຍ ເພາະວ່າການອອກກຳລັງກາຍເຮັດໃຫ້ເຮົາມີສຸຂະພາບແຂງແຮງ, ມີຄວາມໝັ້ນໃຈ, ມີອາລົມດີສົດຊື່ນແຈ່ມໃສທັງກາຍ ແລະ ຈິດໃຈ.
ສາມາດຕິດຕາມນ້ອງ ເຈ ໄດ້ທາງ facebook: adios c Jj ແລະ ຮ່ວມເຊຍພວກນ້ອງທັງ 20 ຄົນ ໄດ້ໃນຮອບຕັດສິນວັນທີ 13 ຕຸລາ 2019 ທີ່ໂຮງແຮມແລນມາກ ນະຄອນຫຼວງວຽງຈັນ ຫຼື ຕິດຕາມທາງ page: Mister International Laos.
( ຂ່າວ: ນຸ້ມນິ້ມ, ຮູບ: ເຈ )
