ເອດີບີ ປັບຫຼຸດການເຕີບໂຕເສດຖະກິດລາວ ມາຢູ່ລະດັບ 6,2% - Laoedaily

ເອດີບີ ປັບຫຼຸດການເຕີບໂຕເສດຖະກິດລາວ ມາຢູ່ລະດັບ 6,2%

ທະນາຄານພັດທະນາອາຊີ ຫຼື ( ADB ) ຄາດວ່າເສດຖະກິດລາວໃນປີ 2019 ຈະຂະຫຍາຍຕົວໄດ້ພຽງ 6,2% ເຊິ່ງເປັນການຫຼຸດລົງຈາກທີ່ຄາດໄວ້ເມື່ອເດືອນເມສາຜ່ານມາ ຢູ່ທີ່ 6,5%. ທັງນີ້, ກໍຍ້ອນຂະແໜງອຸດສາຫະກຳ ແລະ ການບໍລິການອ່ອນໂຕລົງ ລວມທັງການຜະລິດໃນຂະແໜງກະສິກຳ, ການສົ່ງອອກໄຟຟ້າ ແລະ ນັກທ່ອງທ່ຽວສາກົນເຂົ້າມາລາວຫຼຸດລົງ.

ທ່ານ ສຸລິນທອງ ເຮືອງຄຳສິງ ນັກເສດຖະສາດອາວຸໂສ ປະຈໍາທະນາຄານພັດທະນາອາຊີ ກ່າວວ່າ: ອີງຕາມບົດລາຍງານສະບັບໃໝ່ຫຼ້າສຸດປະຈໍາປີ 2019 ນີ້ ເຫັນວ່າອັດຕາການຂະຫຍາຍຕົວຂອງເສດຖະກິດລາວຈະຢູ່ໃນ 6,2% ເທົ່ານັ້ນ ເຊິ່ງຫຼຸດລົງ 0,3% ຫາກທຽບໃສ່ແຜນຄາດຄະເນເມື່ອເດືອນເມສາຜ່ານມາ ຢູ່ທີ່ 6,5% ເຫດຜົນກໍມີຫຼາຍປັດໄຈ ໂດຍສະເພາະແມ່ນຂະແໜງກະສິກຳໃນພາກກາງ ແລະ ພາກໃຕ້ ເຊິ່ງເປັນແຫຼ່ງຜະລິດເຂົ້າທີ່ສໍາຄັນຂອງປະເທດໄດ້ຮັບຜົນກະທົບຈາກໄພທໍາມະຊາດ, ການສົ່ງອອກໄຟຟ້າໃນ 6 ເດືອນຕົ້ນປີ 2019 ຕໍ່າກວ່າໄລຍະດຽວກັນຂອງປີ 2018, ການສົ່ງອອກແຮ່ທາດຫຼຸດລົງ, ສ່ວນການທ່ອງທ່ຽວຍັງບໍ່ຄຶກຄັກປານໃດ ເພາະນັກທ່ອງທ່ຽວສາກົນເຂົ້າມາລາວໜ້ອຍ ເຊິ່ງໃນ 6 ເດືອນຕົ້ນປີນີ້ເຕີບໂຕໄດ້ພຽງ 5% ຫາກທຽບໃສ່ກັບໄລຍະດຽວກັນຂອງປີ 2018 ນັກທ່ອງທ່ຽວ ເພີ່ມຂຶ້ນ 6,1%.

ໂອກາດນີ້, ທ່ານ ລັດຕະນະໄຕ ຫຼວງລາດບັນດິດ ຜູ້ຊ່ຽວຊານດ້ານການປົກຄອງບໍລິຫານ ປະຈໍາທະນາຄານພັດທະນາອາຊີ ຍັງໄດ້ອະທິບາຍຕື່ມອີກວ່າ: ຕາມການວິເຄາະພົບວ່າການສົ່ງອອກສິນຄ້າຂອງລາວໄປຍັງຕ່າງປະເທດມີການຂະຫຍາຍຕົວເພີ່ມຂຶ້ນຢູ່ທີ່ 5% ແລະ ການນໍາເຂົ້າຫຼຸດລົງປະມານ 2,5% ຖືເປັນຜົນດີຕໍ່ການຜະລິດພາຍໃນ ເຮັດໃຫ້ສັງຄົມຫັນມາຊົມໃຊ້ສິນຄ້າທີ່ເຮົາຜະລິດໄດ້ຫຼາຍຂຶ້ນ, ສ່ວນການອ່ອນຄ່າຂອງເງິນກີບທຽບໃສ່ສະກຸນເງິນບາດ ແລະ ໂດລາ ຜ່ານມາອັດຕາແລກປ່ຽນຢູ່ທະນາຄານທຸລະກິດກັບຂ້າງນອກຍັງຫຼຸດໂຕນກັນຫຼາຍ ຄາດວ່າເງິນກີບຍັງສືບຕໍ່ອ່ອນລົງແຕ່ນີ້ຫາທ້າຍປີ ແຕ່ຈະບໍ່ອ່ອນຄ່າຫຼາຍປານໃດ.

ທ່ານໃຫ້ສໍາພາດຕື່ມວ່າ: ສໍາລັບເງິນກີບອ່ອນຄ່າທຽບໃສ່ເງິນບາດ ແລະ ໂດລາ ນັບແຕ່ເດືອນມິຖຸນາ ຈົນເຖິງປັດຈຸບັນນີ້ກໍມີປັດໄຈພາຍນອກ ໂດຍສະເພາະແມ່ນການສົ່ງອອກຂອງປະເທດເພື່ອນບ້ານຫຼາຍຂຶ້ນແລະ ການແຂງຄ່າຂອງເງິນບາດເອງ ເຖິງວ່າສົງຄາມການຄ້າຂອງປະເທດມະຫາອໍານາດໃນໂລກຈະບໍ່ກະທົບໂດຍກົງຕໍ່ລາວ, ແຕ່ກະທົບຕໍ່ການສະໜອງວັດຖຸດິບທີ່ເປັນຕ່ອງໂສ້ໃຫ້ກັບຜະລິດຕະພັນໃດໜຶ່ງຂອງສິນຄ້າທີ່ມີຍີ່ຫໍ້ລະດັບໂລກ ຢູ່ປະມານ 1% – 2% ເທົ່ານັ້ນ ເພາະລາວເຮົາຍັງບໍ່ແມ່ນປະເທດອຸດສາຫະກຳຄືກັບຫຼາຍໆປະເທດ, ສ່ວນປັດໄຈພາຍໃນລັດຖະບານກໍພະຍາຍາມຊຸກຍູ້ການສົ່ງອອກເພີ່ມຂຶ້ນ ແລ້ວຫຼຸດການນໍາເຂົ້າສິນຄ້າທີ່ບໍ່ຈໍາເປັນ ລວມທັງມາດຕະການຕ່າງໆເພື່ອແກ້ໄຂສະເພາະໜ້າ ແລະ ຍາວນານ.

ກອງປະຊຸມເຜີຍແຜ່ບົດລາຍງານ ການຄາດຄະເນການພັດທະນາໃນອາຊີປະຈໍາປີ 2019 ສະບັບໃໝ່ຫຼ້າສຸດ ຈັດຂຶ້ນໃນວັນທີ 25 ກັນຍາ 2019 ຜ່ານມາ ທີ່ສໍານັກງານທະນາຄານພັດທະນາອາຊີ ປະຈໍາລາວ ພາຍໃຕ້ການລາຍງານຂອງ ທ່ານ ລັດຕະນະໄຕ   ຫຼວງລາດບັນດິດ ຜູ້ຊ່ຽວຊານດ້ານການປົກຄອງບໍລິຫານ ປະຈໍາທະນາຄານພັດທະນາອາຊີ, ທ່ານ ສຸລິນທອງ ເຮືອງຄຳສິງ ນັກເສດຖະສາດອາວຸໂສ ປະຈໍາທະນາຄານພັດທະນາອາຊີ ພ້ອມດ້ວຍແຂກຖືກເຊີນຈາກກະຊວງ ແລະ ສະຖາບັນຄົ້ນຄວ້າຕ່າງໆເຂົ້າຮ່ວມ.

[ ຂ່າວ – ຮູບ: ສົມສະຫວິນ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ