ໄຊຍະບູລີ ປະກາດອະນຸມັດໃຫ້ນາຍຕໍາຫຼວດອອກສ້າງເສດຖະກິດຄອບຄົວ - Laoedaily

ໄຊຍະບູລີ ປະກາດອະນຸມັດໃຫ້ນາຍຕໍາຫຼວດອອກສ້າງເສດຖະກິດຄອບຄົວ

ກອງບັນຊາການ ປກສ ແຂວງໄຊຍະບູລີ ໄດ້ຈັດພິທີປະກາດອະນຸມັດໃຫ້ນາຍຕໍາຫຼວດອອກສ້າງເສດຖະກິດຄອບຄົວ ແລະ ເລື່ອນຊັ້ນໃຫ້ນາຍ ແລະ ພົນຕຳຫຼວດ ຜູ້ທີ່ມີຜົນງານ ແລະ ຮອດກຳນົດການເລື່ອນຊັ້ນ ພິທີດັ່ງກ່າວໄດ້ຈັດຂຶ້ນໃນວັນທີ 18 ກັນຍານີ້ ທີ່ສະໂມສອນກອງບັນຊາການ ປກສ ແຂວງ ໂດຍການເປັນກຽດເຂົ້າຮ່ວມຂອງ ທ່ານ ພັນເອກ ຄໍາແພງ ເພັດ ຫົວໜ້າກອງບັນຊາການ ປກສ ແຂວງໄຊຍະບູລີ, ມີບັນດາສະຫາຍຄະນະພັກ, ຄະນະບັນຊາ, ຫົວໜ້າຫ້ອງ, ຮອງຫ້ອງ, ພະນັກງານຫຼັກແຫຼ່ງ ພ້ອມດ້ວຍພະນັກງານນັກຮົບເຂົ້າຮ່ວມ.

ທ່ານ ພັນໂທ ຄໍາສິນ ຜິວວັນນາ ຫົວໜ້າຫ້ອງການເມືອງ ປກສ ແຂວງ ໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີ ກະຊວງປ້ອງກັນຄວາມສະຫງົບ ເລກທີ 1413, 1414, 1415/ປກສ ລົງວັນທີ 22 ກໍລະກົດ 2019 ວ່າດ້ວຍການອະນຸມັດໃຫ້ນາຍຕໍາຫຼວດ ອອກສ້າງເສດຖະກິດຄອບຄົວ.

ໃນນີ້, ໄດ້ອະນຸມັດໃຫ້ສະຫາຍ ພັນຕີ ປ້ອມ ສາລີ ສັງກັດຢູ່ຫ້ອງພາລາທິການ ປກສ ແຂວງ, ສະຫາຍ ຮ້ອຍເອກ ນາວິນ ສອນສຸພາບ ສັງກັດຢູ່ກອງບັນຊາການ ປກສ ເມືອງແກ່ນທ້າວ ແລະ ສະຫາຍ ຮ້ອຍເອກ ສະໄໝ ແສງສຸກດາ ສັງກັດຢູ່ກອງບັນຊາການ ປກສ ເມືອງປາກລາຍ ອອກສ້າງເສດຖະກິດຄອບຄົວ ຕາມແນວທາງນະໂຍບາຍຂອງພັກ – ລັດວາງອອກ ພ້ອມທັງຜ່ານຂໍ້ຕົກລົງຂອງກົມໃຫຍ່ການເມືອງ ປ້ອງກັນຄວາມສະຫງົບ ເລກທີ 2824/ກມປສ ລົງວັນທີ 03 ກັນຍາ 2019 ແລະ ຂໍ້ຕົກລົງຂອງກອງບັນຊາການ ປກສ ແຂວງໄຊຍະບູລີ ເລກທີ 5417/ປຊຍ ລົງວັນທີ 17 ກັນຍາ 2019 ວ່າດ້ວຍການເລື່ອນຊັ້ນໃຫ້ນາຍ ແລະ ພົນຕໍາຫຼວດ ໃນກໍາລັງປ້ອງກັນ ຄວາມສະຫງົບ ແຂວງໄຊຍະບູລີ ເຊິ່ງມີຜູ້ທີ່ໄດ້ຮັບການເລື່ອນຊັ້ນທັງໝົດ 144 ສະຫາຍ. ໃນນີ້, ຮ້ອຍຕີ ຂຶ້ນ ຮ້ອຍໂທ 69 ສະຫາຍ, ວາທີຮ້ອຍຕີ ຂຶ້ນ ຮ້ອຍຕີ 12 ສະຫາຍ, ສິບເອກ ຂຶ້ນ ວາທີຮ້ອຍຕີ 58 ສະຫາຍ, ສິບໂທ ຂຶ້ນ ສິບເອກ 4 ສະຫາຍ, ສິບຕີ ຂຶ້ນ ສິບໂທ 1 ສະຫາຍ ເຊິ່ງໃຫ້ກຽດປະດັບຊັ້ນໂດຍ ພັນເອກ ຄໍາແພງ ເພັດ ຫົວໜ້າກອງບັນຊາການ ປກສ ແຂວງ.

ໂອກາດນີ້ ທ່ານ ພັນເອກ ຄໍາແພງ ເພັດ ໄດ້ສະແດງ ຄວາມຍ້ອງຍໍຊົມເຊີຍຕໍ່ບັນດາສະຫາຍ ນາຍ ແລະ ພົນຕຳຫຼວດ ທີ່ໄດ້ຮັບການເລື່ອນຊັ້ນຄັ້ງນີ້ ພ້ອມທັງເນັ້ນໜັກໃຫ້ບັນດາສະຫາຍຈົ່ງຍົກສູງຄວາມເປັນເຈົ້າການ ຈັດຕັ້ງປະຕິບັດໜ້າທີ່ວຽກງານວິຊາສະເພາະ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງໜັກແໜ້ນ, ຄຸນສົມບັດສິນທຳປະຕິວັດ, ເພີ່ມ ຄວາມຫ້າວຫັນ, ຄວາມກະຕືລືລົ້ນເຂົ້າໃນການຈັດຕັ້ງປະຕິບັດໜ້າທີ່ວຽກງານ ແລະ ແບບຢ່າງ ນຳໜ້າທຸກຂົງເຂດວຽກງານ ພ້ອມກັນຈັດຕັ້ງປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ປະສົບຜົນສຳເລັດເປັນກ້າວໆ.

( ຂ່າວ: ສາຄອນ ໄຊສົມຮັກສາ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ