ເຕືອນ!! ທົ່ວທຸກພາກ ຍັງຈະມີຝົນປົນໜາວ - Laoedaily

ເຕືອນ!! ທົ່ວທຸກພາກ ຍັງຈະມີຝົນປົນໜາວ

ກົມອຸຕຸນິຍົມ ແລະ ອຸທົກະສາດ ໄດ້ລາຍງານພະຍາກອນອາກາດໃນວັນທີ 19 ກັນຍາ 2019ວ່າ:  ຄວາມກົດດັນສູງຂອງອາກາດຍັງສືບຕໍ່ພັດປົກຄຸມພາກເໜືອດ້ານຕາເວັນອອກຂອງປະເທດລາວ, ສ່ວນພາກກາງ ຫາ ພາກໃຕ້ປົກຄຸມດ້ວຍຄວາມກົດດັນອາກາດຕໍ່າ, ສົມທົບກັບກະແສລົມຕາເວັນອອກພັດປົກຄຸມ ເຊິ່ງຈະເຮັດໃຫ້ອາກາດເຢັນໃນຕອນເຊົ້າ ແລະ ຍັງຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍ ໃນແຕ່ລະພາກ ແລະ ມີລົມພັດແຮງເປັນບາງໂອກາດ. ສະນັ້ນ, ຈຶ່ງເຕືອນມາຍັງພໍ່ແມ່ປະຊາຊົນທົ່ວທຸກພາກ ໂດຍສະເພາະຜູ້ເຖົ້າ ແລະ ເດັກນ້ອຍ ຈົ່ງຮັກສາຮ່າງກາຍໃຫ້ອົບອຸ່ນ ເນື່ອງຈາກອາກາດປ່ຽນແປງ ອາດຈະບໍ່ສະບາຍໄດ້.

 

 

ຂະນະທີ່ສະພາບອາກາດໃນ ພາກເໜືອດ້ານຕາເວັນອອກ (ແຂວງ ຜົ້ງສາລີ, ຫົວພັນ ແລະ ຊຽງຂວາງ) ອາກາດເຢັນໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ. ອຸນຫະພູມໃນລະຫວ່າງ17-30 ອົງສາ.

ພາກເໜືອດ້ານຕາເວັນຕົກ (ແຂວງ ຫຼວງນໍ້າທາ, ບໍ່ແກ້ວ, ອຸດົມໄຊ, ຫຼວງພະບາງ ແລະ ໄຊຍະບູລີ) ອາກາດເຢັນໃນຕອນເຊົ້າ ແລະ ມີຝົນຕົກກະຈາຍ ພ້ອມຈະມີລົມພັດແຮງເປັນບາງໂອກາດຢູ່ບາງທ້ອງຖິ່ນ. ອຸນຫະພູມໃນລະຫວ່າງ 18-31 ອົງສາ.

 

ในภาพอาจจะมี ต้นพืช, ต้นไม้, ท้องฟ้า, สถานที่กลางแจ้ง และธรรมชาติ

 

ພາກກາງ ( ແຂວງວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ) ມີເຝື້ອປົກຄຸມເປັນບາງສ່ວນ, ຈະມີຝົນຕົກໃນລະດັບຄ່ອຍ ພ້ອມຈະມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງ ຄຳມ່ວນ ແລະ ສະຫວັນນະເຂດ. ອຸນຫະພູມໃນລະຫວ່າງ 22-32 ອົງສາ. ສ່ວນແຂວງໄຊສົມບູນ ອາກາດເຢັນໃນຕອນເຊົ້າ ພ້ອມມີໝອກບາງປົກຫຸ້ມຢູ່ທົ່ວໄປ. ອຸນຫະພູມໃນລະຫວ່າງ 15-29 ອົງສາ.

ສ່ວນນະຄອນຫຼວງວຽງຈັນ ຈະມີເຝື້ອປົກຄຸມເປັນສ່ວນໃຫຍ່ ອາກາດເຢັນໃນຕອນກາງຄືນ ຫາຕອນເຊົ້າ ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງເປັນບາງໂອກາດຢູ່ບາງບໍລິເວນ. ອຸນຫະພູມໃນລະຫວ່າງ 23-32 ອົງສາ.

 

ในภาพอาจจะมี ท้องฟ้า, ภูเขา, สถานที่กลางแจ้ง, ธรรมชาติ และน้ำ

 

ພາກໃຕ້: (ຈຳປາສັກ, ສາລະວັນ, ເຊກອງ ແລະ ອັດຕະປື) ຈະມີຝົນຕົກ, ຟ້າຮ້ອງ ມໃນລະດັບຄ່ອຍ ຫາ ປານກາງຢູ່ບາງທ້ອງຖິ່ນແຂວງຈຳປາສັກ ແລະ ອັດຕະປື ພ້ອມມີລົມພັດແຮງເປັນບາງໂອກາດ. ອຸນຫະພູມໃນລະຫວ່າງ 23-33 ອົງສາ. ສໍາລັບເຂດພູພຽງບໍລິເວນ ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງເປັນບາງໂອກາດ. ອຸນຫະພູມໃນລະຫວ່າງ 13-27 ອົງສາ.

 

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ