ນັກວິທະຍາສາດຄົ້ນພົບວັດຖຸດໍາທີ່ສຸດໃນໂລກ

80

ສະຖາບັນເຕັກໂນໂລຊີແຫ່ງແມດຊາຊູເຊດ ຫຼື ເອັມໄອທີ ຂອງອາເມຣິກາ ເປີດຕົວວັດຖຸຊະນິດໃໝ່ທີ່ມີສີດໍາທີ່ສຸດໃນໂລກ ໂດຍສາມາດດູດກືນແສງໄດ້ຫຼາຍກວ່າ 99,99% ທໍາລາຍສະຖິຕິຂອງສີແວ່ນຕາແບຼັກ ທີ່ເຄີຍຄອງຕໍາແໜ່ງຄວາມມືດທຶບມາກ່ອນໜ້ານີ້ ແຕ່ດູດກືນແສງໄດ້ສູງສຸດທີ່ 99,96% ເທົ່ານັ້ນ.

ເອັມໄອທີ ຍັງໃຫ້ຮູ້ວ່າ: ຍັງບໍ່ມີການຕັ້ງຊື່ໃຫ້ກັບວັດຖຸດັ່ງກ່າວ ເຊິ່ງຈັດເປັນຄາບອນນາໂນ ປະເພດໜຶ່ງໂດຍນັກວິທະຍາສາດໄດ້ຄົ້ນພົບວັດຖຸນີ້ໂດຍບັງເອີນ ຂະນະເຮັດການທົດລອງສາຍຄາບອນນາໂນທິວ ໃຫ້ຂະຫຍາຍຕົວຂຶ້ນເທິງວັດຖຸຊັກນໍາໄຟຟ້າ ເຊັ່ນ: ອະລູມີຍົມ.

ລາຍງານການຄົ້ນພົບທີ່ຕີພິມໃນວາລະສານ ACS Applied Materials & Interfaces ລະບຸວ່າ: ເມື່ອຄາບອນນາໂນທິວ ລຽງຕົວກັນເປັນເສັ້ນໃນແນວຕັ້ງເທິງແຜ່ນອະລູມີຍົມ ຟອຍ ທີ່ຢູ່ໃນພາວະພິເສດຈົນເບິ່ງຄ້າຍຄືກັບຕົ້ນໄມ້ນ້ອຍໆທີ່ຂະຫຍາຍຕົວຂຶ້ນໃນປ່າດົງປາກົດວ່າມັນເບິ່ງເປັນສີດໍາມືດຜິດປົກກະຕິຊະນິດທີ່ນັກວິທະຍາສາດບໍ່ເຄີຍເຫັນມາກ່ອນ.

ເມື່ອທົດລອງວັດແທກເບິ່ງການດູດກືນແສງຄາບອນນາໂນທິວ ຊະນິດນີ້ພົບວ່າມັນສາມາດດູດກືນແສງໄດ້ຫຼາຍກວ່າສີດໍາຂອງແວ່ນຕາແບຼັກ ອັນມີຊື່ສຽງ ເຊິ່ງເປັນຜົນງານຂອງບໍລິສັດໃນ ອັງກິດ ເມື່ອຫຼາຍປີກ່ອນ ໂດຍວັດຖຸຊະນິດໃໝ່ນີ້ສະທ້ອນແສງທີ່ສາຍຕາມະນຸດເບິ່ງເຫັນໄດ້ອອກມາໜ້ອຍກວ່າເຖິງ 10 ເທົ່າ.