ໂລກຄວນສ້າງຄວາມຫຼາກຫຼາຍດ້ານອາຫານ - Laoedaily

ໂລກຄວນສ້າງຄວາມຫຼາກຫຼາຍດ້ານອາຫານ

ນັກເສດຖະສາດ ແລະ ນັກວິທະຍາສາດ ບາງກຸ່ມເຕືອນປະເທດຕ່າງໆທົ່ວໂລກວ່າຕ້ອງສ້າງຄວາມຫຼາກຫຼາຍເລື່ອງການຜະລິດ ແລະ ບໍລິໂພກອາຫານບໍ່ດັ່ງນັ້ນສ່ຽງຈະເກີດເລື່ອງປະລິມານອາຫານ ເຊິ່ງຈະເຮັດໃຫ້ເກີດ ຄວາມເດືອດຮ້ອນ ແລະ ຄວາມບໍ່ສະຫງົບທາງສັງຄົມ.

ປະໂຫຍດທາງສຸຂະພາບ ແລະ ສິ່ງແວດລ້ອມ ທີ່ໄດ້ຈາກການປັບປ່ຽນວິທີການຜະລິດ ແລະ ບໍລິິໂພກອາຫານຈະຫຼາຍກວ່າເງິນທີ່ໃຊ້ລົງທຶນດ້ານນີ້ ຂໍໃຫ້ລັດຖະບານຕ່າງໆເພີ່ມການສະໜັບສະໜູນເລື່ອງກະສິກໍາຢ່າງຍືນຍົງ ເພາະປະລິມານຫຼຸດລົງພຽງໜ້ອຍດຽວອາດຈະສ້າງຄວາມເສຍຫາຍຫຼວງຫຼາຍ ແລະ ເຮັດໃຫ້ອາຫານມີລາຄາແພງ ເຮັດໃຫ້ເກີດຄວາມເດືອດຮ້ອນ ແລະ ຄວາມບໍ່ສະຫງົບທາງສັງຄົມນໍາມາເຊິ່ງຄວາມອຶດຢາກ ແລະ ບໍ່ມີສະຖຽນລະພາບ.

ອາຫານຫຼັກ 60% ຂອງປະຊາກອນໂລກມາຈາກພືດພັນທັນຍາຫານພຽງ 4 ຊະນິດເທົ່ານັ້ນ ຄື: ເຂົ້າຈ້າວ, ເຂົ້າສາລີ, ສາລີ ແລະ ມັນຝຣັ່ງ. ການເພິ່ງພາອາຫານຫຼັກພຽງບໍ່ເທົ່າຊະນິດຫຼາຍເກີນໄປເຮັດໃຫ້ຜູ້ຄົນຕົກຢູ່ໃນຄວາມສ່ຽງຫາກການປູກຝັງມີບັນຫາ, ອີກທັງມີປັດໄຈຊໍ້າຕື່ມຈາກເລື່ອງການປ່ຽນແປງສະພາບອາກາດນໍາອີກ.

ຜົນການສຶກສາປະເມີນວ່າ ຫາກອຸດສາຫະກໍາອາຫານສະໄໝໃໝ່ເກີດບັນຫາຈະສ້າງຄວາມເສຍຫາຍຕໍ່ສຸຂະພາບຄົນ, ການພັດທະນາ ແລະ ສິ່ງແວດລ້ອມຄິດເປັນມູນຄ່າເຖິງ 12 ພັນຕື້ໂດລາສະຫະລັດຕໍ່ປີ ເທົ່າກັບ ຈີດີພີ ຂອງຈີນ ຈຶ່ງສະເໜີທາງອອກຫຼາຍຢ່າງຕັ້ງແຕ່ສົ່ງເສີມຄວາມຫຼາກຫຼາຍດ້ານອາຫານໄປຈົນເຖິງເພີ່ມການສະໜັບສະໜູນການກະສິກໍາທີ່ຊ່ວຍປົກປ້ອງປ່າໄມ້.

ປັດຈຸບັນມີບາງປະເທດຢຸດໃຫ້ເງິນອຸດໜູນຜູ້ລ້ຽງສັດແລ້ວປ່ຽນໄປໃຫ້ເງິນກະສິກອນທີ່ເບິ່ງແຍງດິນຢ່າງຍືນຍົງຜົນປາກົດວ່າ ເນື້ອທີ່ປ່າເພີ່ມຂຶ້ນເປັນກວ່າເຄິ່ງປະເທດຈາກທີ່ມີພຽງ 1/4 ເມື່ອຫຼາຍປີກ່ອນ.

ຜົນການສຶກສາຊີ້ວ່າການປະຕິຮູບອາດຈະຕ້ອງໃຊ້ງົບປະມານສູງເຖິງ 350.000 ລ້ານໂດລາຕໍ່ປີ ແຕ່ຈະສ້າງໂອກາດທາງທຸລະກິດມູນຄ່າສູງເຖິງ 4,5 ພັນຕື້ໂດລາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ