ຈະເລີ່ມລົງມືກໍ່ສ້າງສະຖານີຂົນສົ່ງໂດຍສານແຂວງສາລະວັນ ຫຼັງໃໝ່ໃນໄວໆນີ້ - Laoedaily

ຈະເລີ່ມລົງມືກໍ່ສ້າງສະຖານີຂົນສົ່ງໂດຍສານແຂວງສາລະວັນ ຫຼັງໃໝ່ໃນໄວໆນີ້

ແຂວງສາລະວັນ ໄດ້ອະນຸມັດໃຫ້ ບໍລິສັດ ບຸນນົງບໍລິການ ຂົນສົ່ງໂດຍສານ ສ່ວນບຸກຄົນ ດຳເນີນໂຄງການກໍ່ສ້າງສະຖານີຂົນສົ່ງໂດຍສານ ແລະ ຕໍ່ເຕີມອາຄານຫຼັງເກົ່າ ເຊິ່ງມີອາຍຸການສຳປະທານ 30 ປີ ນັບແຕ່ປີ 2019 – 2049 ຈະໄດ້ລົງມືປະຕິບັດໃນເດືອນພະຈິກ 2019 ໂດຍໃນວັນທີ 13 ກັນຍາຜ່ານມາ ໄດ້ມີພິທີເຊັນສັນຍາສຳປະທານດິນເພື່ອດຳເນີນໂຄງການ.

ທ່ານ ບຸນນົງ ສຸວິມົນ ປະທານ ບໍລິສັດ ບຸນນົງບໍລິການ ຂົນສົ່ງໂດຍສານ ສ່ວນບຸກຄົນ ໄດ້ລາຍງານໃຫ້ຮູ້ວ່າ: ໂຄງການດັ່ງກ່າວແມ່ນຕັ້ງຢູ່ ບ້ານຫຼັກສອງ ເມືອງ ແລະ ແຂວງສາລະວັນ ໄດ້ສຳປະທານເນື້ອທີ່ດິນທັງໝົດ 1,5 ເຮັກຕາ ຕາມຂອບເຂດເກົ່າຂອງສະຖານີຂົນສົ່ງໂດຍສານແຂວງສາລະວັນ, ເປັນການລົງທຶນຂອງເອກະຊົນພາຍໃນ 100% ແລະ ມີໄລຍະເວລາສຳປະທານ 30 ປີ ( ນັບແຕ່ປີ 2019 – 2049 ).

ໄດ້ກຳນົດແຜນດຳເນີນງານໂຄງການອອກເປັນ 2 ໄລຍະ ຄື: ໄລຍະການກໍ່ສ້າງປັບປຸງ, ຕໍ່ເຕີມອາຄານ ບໍ່ໃຫ້ກາຍປີ 2020 ນັບແຕ່ມື້ເຊັນສັນຍາເປັນຕົ້ນໄປ ເຊິ່ງມີ 4 ໜ້າວຽກໃຫຍ່ ຄື: ສ້ອມແປງຫ້ອງສະຖານີ, ອາຄານປ່ອຍລົດ – ບ່ອນລົງລົດ, ປູເບຕົງພາຍໃນເດີ່ນ, ສ້ອມແປງຮົ້ວອ້ອມ ແລະ ປະດັບປະດາສະຖານທີ່, ໄລຍະທີ 2 ແມ່ນໃຫ້ບໍລິການເປັນປົກກະຕິ 29 ປີ ເຊິ່ງມີມູນຄ່າການລົງທຶນທັງໝົດ 8 ຕື້ກີບ. ສຳລັບກິດຈະການພັດທະນາໂຄງລ່າງ ເຊັ່ນ: ສະຖານີຈອດລົດຜູ້ໂດຍສານ, ຕະຫຼາດ ແມ່ນໄດ້ເສຍຄ່າເຊົ່າ – ສຳປະທານດິນ ຈຳນວນ 5 ພັນໂດລາສະຫະລັດຕໍ່ເຮັກຕາຕໍ່ປີ ຫຼື ໄດ້ເສຍພັນທະ 7.500 ໂດລາສະຫະລັດຕໍ່ປີ. ນອກນັ້ນ, ທາງບໍລິສັດແມ່ນມີງົບປະມານພຽງພໍທີ່ຈະດຳເນີນການກໍ່ສ້າງຕາມມູນຄ່າການຄິດໄລ່ຂອງ ພະແນກ ຍທຂ ແຂວງ ແລະ ມີຄວາມພ້ອມທາງດ້ານກຳລັງແຮງງານ, ວິຊາການ ແລະ ເຄື່ອງມືເຕັກນິກຕ່າງໆ ກະກຽມດຳເນີນການກໍ່ສ້າງໃນໄວໆນີ້.

ໃນຕອນທ້າຍ, ກໍໄດ້ມີການລົງນາມເຊັນສັນຍາຢ່າງເປັນທາງການ, ຝ່າຍຄະນະກຳມະການຄຸ້ມຄອງການລົງທຶນຂັ້ນແຂວງ ເຊັນໂດຍ ທ່ານໂພສີ ແກ້ວສີພັນດອນ ຫົວໜ້າພະແນກແຜນການ ແລະ ການລົງທຶນແຂວງ, ມີ ທ່ານ ທຶງ ຈອມມະນີ ເຈົ້າເມືອງສາລະວັນ ຕາງໜ້າອົງການປົກຄອງເມືອງ ພ້ອມດ້ວຍພະແນກການທີ່ກ່ຽວຂ້ອງ ແລະ ທ່ານ ບຸນນົງ ສຸວິມົນ ປະທານ ບໍລິສັດ ບຸນນົງບໍລິການ ຂົນສົ່ງໂດຍສານ ສ່ວນບຸກຄົນ ໂດຍຊ້ອງໜ້າ ທ່ານ ວິຊຽນ ນະວິກຸນ ຮອງເຈົ້າແຂວງສາລະວັນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

( ຂ່າວ – ຮູບ: ວິໄລວອນ ສິດທິໄຊ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ