ຮູບເງົາ “ ດອກຈໍາປາບານ ” ເປັນຮູບເງົາທີ່ພັນລະນາເຖິງຄວາມຮັກທີ່ສວຍງາມຂອງບ່າວສາວ ລາວ – ຈີນ ຂອງຄົນສາມຮຸ່ນ ພ້ອມທັງຍົກໃຫ້ເຫັນເຖິງຄວາມຮັກທີ່ສວຍງາມຍິ່ງໃຫຍ່ຂອງທັງ 2 ປະເທດອ້າຍນ້ອງ ລາວ – ຈີນ ແລະ ຍັງສະແດງໃຫ້ເຫັນເຖິງທິວທັດທຳມະຊາດທີ່ສວຍງາມຂອງລາວອີກ.
ນາງ ຈັນດາລີ ສິດພະໄຊ ຫຼື ໝໍແນ່ງ ໃຫ້ສໍາພາດວ່າ: ພູມໃຈທີ່ໄດ້ຮັບບົດເປັນນາງເອກຂອງຮູບເງົາ “ ດອກຈໍາປາບານ ” ຄູ່ກັບພະເອກຈີນ Zhiluo Ma ທີ່ໄດ້ສື່ ແລະ ຖ່າຍທອດຄວາມອ່ອນຫວານຮຽບຮ້ອຍ ເປັນເດັກນ້ອຍທີ່ຟັງ ຄວາມ, ຮັກຄອບຄົວ ແລະ ປະເທດຊາດຫຼາຍ.
ບົດບາດຂອງນາງເອກ ຫຼື ຈຳປາ ເປັນຜູ້ຍິງຮຽບຮ້ອຍ ແລະ ອ່ອນຫວານ ເຊິ່ງຕົນເອງເປັນຜູ້ຍິງບໍ່ຫວານປານນັ້ນ ລວມທັງເປັນຮູບເງົາເລື່ອງທຳອິດຈຶ່ງມີ ຄວາມຍາກ ແລະ ຕົນເອງບໍ່ເຄີຍຮຽນ ຫຼື ຜ່ານການສະແດງມາກ່ອນ ໂດຍຮ່ວມງານກັບນັກສະແດງມືອາຊີບ ແລະ ທີມງານທີ່ມີປະສົບການຫຼາຍສິບປີ ເຮັດໃຫ້ຖືກຮ້າຍຫຼາຍເທື່ອ. ສໍາລັບຂໍ້ງ່າຍແມ່ນການເວົ້າພາສາຈີນ ທີ່ສື່ສານກັບຜູ້ກໍາກັບໄດ້ສະດວກເຮັດໃຫ້ສາມາດເຂົ້າໃຈບົດເລື່ອງ ແລະ ເຖິງອາລົມໄດ້ດີ.
ຮູບເງົາເລື່ອງນີ້ໃຫ້ແງ່ຄິດແກ່ສັງຄົມຫຼາຍດ້ານ ຄື: ສົງຄາມຖິ້ມໄວ້ແຕ່ຄາບນ້ຳຕາຈາກຮຸ່ນພໍ່ເຖົ້າແມ່ເຖົ້າຈົນຊົ່ວລູກຫຼານ, ຄວາມຄຽດແຄ້ນບໍ່ໃຫ້ອະໄພ ສ້າງຄວາມພັດພາກ ແລະ ເຂົ້າໃຈຜິດແກ່ທຸກຝ່າຍ, ຄວາມຮັກບໍ່ມີພົມແດນ, ປະຫວັດສາດ, ສາຍພົວພັນ, ການຊ່ວຍເຫຼືອຂອງ 2 ຊາດຜ່ານທັງສຸກ ແລະ ທຸກນຳກັນຈົນມີມື້ນີ້.
ຮູບເງົາເລື່ອງນີ້ກຳກັບໂດຍ: Tao Jin ແລະ Quanwei Liu, ຂຽນບົດໂດຍ: Wei Zhou ແລະ Weiting Liu, ຜະລິດໂດຍ: ສະຕູດີໂອພາບພະຍົນຊາວໜຸ່ມ/Shanghai Bahe Asset Management Co,Ltd Ltd ແລະ ບໍລິສັດ ຈົງສື້ຢາໄທ້ ( ປັກກິ່ງ ) ສື່ວັດທະນະທຳຈີນສາກົນ ຈຳກັດ. ສຳລັບການຖ່າຍທຳສ່ວນໃຫຍ່ແມ່ນຖ່າຍຢູ່ປະເທດລາວ ໂດຍມີການຖ່າຍຢູ່ຫຼາຍເມືອງ ເຊັ່ນ: ນະຄອນຫຼວງວຽງຈັນ, ວັງວຽງ, ຫຼວງພະບາງ ແລະ ໃນປະເທດຈີນ ເຊັ່ນ: ຄຸນໝິງ ແລະ ໄຕ້ຫວັນ.
ຮູບເງົາເລື່ອງນີ້ບໍ່ແມ່ນເລົ່າເຖິງແຕ່ ຄວາມຮັກຂອງບ່າວ – ສາວເທົ່ານັ້ນ ແຕ່ເປັນການເລົ່າເລື່ອງລາວຕັ້ງແຕ່ສະໄໝເກີດສົງຄາມ ໂດຍມີທະຫານຈີນ ເຂົ້າມາຊ່ວຍລາວ ແລະ ເກີດຄວາມຮັກກັບແມ່ເຖົ້າຂອງນາງເອກ ແຕ່ດ້ວຍເຫດສຸດວິໄສພໍ່ເຖົ້າທີ່ເປັນທະຫານຈີນ ໄດ້ສັນຍາກັບແມ່ເຖົ້າໃຫ້ລໍຖ້າຢູ່ກ້ອງຕົ້ນຈຳປາຕົ້ນນີ້ ແມ່ເຖົ້າກໍໄດ້ແຕ່ເຝົ້າລໍຖ້າແລ້ວຖ້າອີກ ແຕ່ດ້ວຍເຫດຜົນບາງຢ່າງໄດ້ເຮັດໃຫ້ພໍ່ເຖົ້າ ແລະ ແມ່ເຖົ້າພັດພາກຈາກກັນ ອັນເປັນເຫດເຮັດໃຫ້ເດັກນ້ອຍອາຍຸພຽງ 5 ປີ ( ແມ່ນາງເອກ ) ທີ່ໄດ້ຈື່ຄຳສັນຍານັ້ນ ແລະ ຄຽດແຄ້ນໃຫ້ກັບພໍ່ຄົນຈີນ ວ່າເປັນຄົນຈີນທີ່ບໍ່ຮັກສາສັນຍາ, ບໍ່ມີສັດຈະ, ປະຖິ້ມລູກເມຍ ແລະ ບໍ່ຫວນກັບຄືນມາອີກເລີຍ. ຈົນຕົກມາສະໄໝຂອງຫຼານສາວຜູ້ເປັນນາງເອກ ( ຈຳປາ ) ທີ່ເຮັດວຽກເປັນຜູ້ນຳທ່ຽວທີ່ຖືກໜຸ່ມຈີນ ພະເອກ ( Shen Xiang ) ຕົກຂຸມຮັກໃນຄວາມງາມຂອງຍິງສາວຄົນນີ້ ແຕ່ຊ້ຳພັດຖືກກີດກັນຈາກຜູ້ເປັນແມ່ ເພາະແມ່ຄຽດວ່າພໍ່ບໍ່ກັບມາ ຄົນຈີນບໍ່ຮັກສາສັນຍາຈຶ່ງຢ້ານລູກສາວເສຍໃຈຄືກັບແມ່ເຖົ້າ.
ສຸດທ້າຍ, ຂໍໃຫ້ທຸກຄົນມາເບິ່ງນຳກັນເພາະລາຍໄດ້ຈະແບ່ງໄປສົມທົບຊ່ວຍເຫຼືອຜູ້ປະສົບໄພນ້ຳຖ້ວມພາກໃຕ້ ເຊິ່ງຮູບເງົາເລື່ອງນີ້ຖ່າຍທອດຄວາມຮັກຂອງຄົນສາມຮຸ່ນຄົນ ແລະ ຖ່າຍທອດເຖິງຄວາມຮັກ 2 ຊາດ ພ້ອມທິວທັດທີ່ງົດງາມຂອງທໍາມະຊາດ ໝໍແນ່ງ ໃນນາມນັກສະແດງຂາດຕົກບົກຜ່ອງກໍໃຫ້ອະໄພແດ່ເດີ ສັນຍາວ່າເລື່ອງຕໍ່ໄປຈະເຮັດໃຫ້ດີຂຶ້ນ. ເລື່ອງລາວຈະເປັນແນວໃດເປັນຫຍັງພໍ່ເຖົ້ານາງເອກຈຶ່ງບໍ່ກັບມາ ແລະ ນາງເອກຈະໄດ້ສົມຫວັງໃນຮັກຄັ້ງນີ້ບໍ່ ຕິດຕາມຊົມໄດ້ທຸກໂຮງຮູບເງົາທົ່ວປະເທດ ເຂົ້າສາຍວັນທີ 19 ກັນຍາ 2019.
( ຂ່າວ: ນຸ້ມນິ້ມ; ຮູບ: ໝໍແນ່ງ )
