ມື້ນີ້ມາເຮັດອາຫານປະເພດຕົ້ມເປື່ອຍ ໃຊ້ເວລາໃນການປຸງແຕ່ງດົນແຕ່ຮັບຮອງວ່າລົດຊາດເຂັ້ມຂຸ້ນແຊບແນ່ນອນ ໂດຍໃຊ້ກະດູກໝູ, ກະດູກງົວ ຫຼື ຊີ້ນຕິດມັນກໍນໍາມາຕົ້ມເປື່ອຍໄດ້ເຊັ່ນກັນແລ້ວແຕ່ຜູ້ມັກ.
ສ່ວນປະສົມ:
1 ກະດູກໝູ 1 ກິໂລກຣາມ.
2 ນ້ຳປາ 2 ບ່ວງແກງ.
3 ນ້ຳຕານ 1 ບ່ວງແກງ.
4 ນໍ້າສະອິວດໍາ 1 ບ່ວງແກງ.
5 ໝາກຖົ່ວເນົ່າ 1 ບ່ວງແກງ.
6 ພິກໄທເມັດ 1/2 ບ່ວງແກງ.
7 ຫົວກະທຽມ 6 ຫົວ.
8 ຮາກຜັກຫອມປ້ອມ 5 ຮາກ.
9 ນ້ຳມັນ 2 ບ່ວງແກງ.
10 ນ້ຳສະອາດ 8 ຖ້ວຍນ້ອຍ.
11 ຫົວຜັກກາດຂາວ 1 ຫົວ.
12 ຫົວກະຣົດ 1 ຫົວ.
13 ເຫັດຫອມ 5 – 10 ດອກ.
14 ຜັກເຊີເນຣີ 1 ຕົ້ນ.
ວິທີປຸງແຕ່ງ:
ລ້າງກະດູກໃຫ້ສະອາດແລ້ວສັບເປັນຕ່ອນພໍປະມານ, ເອົາພິກໄທ, ຮາກຜັກຫອມປ້ອມ ແລະ ກະທຽມໃສ່ຄົກຕຳໃຫ້ລະອຽດ. ຈາກນັ້ນ, ເອົານ້ຳມັນໃສ່ໝໍ້ຄ້າງໄຟປານກາງ ເມື່ອນ້ຳມັນຮ້ອນເອົາເຄື່ອງທີ່ຕຳລົງໄປຂົ້ວຈົນຫອມຈຶ່ງເອົາກະດູກລົງໄປຂົ້ວພ້ອມກັບໝາກຖົ່ວເນົ່າ ຂົ້ວພໍປະມານໜຶ່ງແລ້ວປົງລົງ.
ຫຼັງຈາກນັ້ນ, ເອົານ້ຳໃສ່ໝໍ້ຄ້າງໄຟປານກາງ ເມື່ອນ້ຳຟົດເອົາກະດູກໝູທີ່ຂົ້ວແລ້ວລົງໄປຕົ້ມປຸງລົດຊາດດ້ວຍນ້ຳຕານ, ນໍ້າສະອິວດໍາ ແລະ ນ້ຳປາ ຕົ້ມຕໍ່ຈົນກະດູກເປື່ອຍຈຶ່ງເອົາຜັກທັງໝົດລົງແລ້ວຕົ້ມຕໍ່ຈົນຜັກເປື່ອຍເທົ່ານີ້ກໍສຳເລັດ.
ຂໍ້ມູນຈາກ: Cooking.com
ຮຽບຮຽງ: ນຸ້ມນິ້ມ