ຈຳປາສັກ ລົງກວດຕົວຈິງຜູ້ລະເມີດລະບຽບ ແລະ ເອົາປຽບຜູ້ບໍລິໂພກຂາຍສິນຄ້າເກີນລາຄາ - Laoedaily

ຈຳປາສັກ ລົງກວດຕົວຈິງຜູ້ລະເມີດລະບຽບ ແລະ ເອົາປຽບຜູ້ບໍລິໂພກຂາຍສິນຄ້າເກີນລາຄາ

ຈຳປາສັກເປັນແຂວງທໍາອິດທີ່ໄດ້ຮັບລາຍງານຈາກປະຊາຊົນຜູ້ທີ່ລົງໄປຊ່ວຍເຫຼືອກູ້ໄພ ວ່າມີການສວຍໂອກາດຂຶ້ນລາຄາສິນຄ້າເກີນລາຄາຕະຫຼາດ ຕາມການລະບຸຂອງແຟນຂ່າວທີ່ສົ່ງມາແມ່ນມີຫຼາຍຢ່າງພວກເຂົ້າປາອາຫານ ແຕ່ທີ່ໜັກສຸດຄືໄຂ່ໄກ່ອາຫານທີ່ກິນງ່າຍຕະຫຼາດຂາຍໜ່ວຍ 1000 ກີບ, ແຕ່ຮ້ານຂາຍເຄື່ອງແຖວນັ້ນໂພນງາມຂາຍ 3 ໜ່ວຍ 10.000 ກີບ, ເມື່ອມີລາຍງານເຈົ້າໜ້າທີ່ການຄ້າແຂວງຈຳປາສັກ ໄດ້ລົງຕະຫຼາດກວດກາລາຄາສິນຄ້າທັນທີ ເພື່ອບໍ່ໃຫ້ມີການສວຍໂອກາດໄປຫຼາຍກວ່ານີ້.

 

ກ່ອນໜ້ານີ້, ລັດຖະບານ ກໍ່ຄືກະຊວງອຸດສາຫະກຳ ແລະ ການຄ້າໄດ້ອອກແຈ້ງການ ສະບັບເລກທີ 1151/ອຄ.ກຄພນ ລົງວັນທີ 6 ກັນຍາ 2019 ເຖິງທ່ານ ຫົວໜ້າພະແນກອຸດສາຫະກຳ ແລະ ການຄ້າແຂວງ ແລະ ນະຄອນຫຼວງວຽງຈັນ ໃຫ້ເອົາໃຈໃສ່ຄຸ້ມຄອງລາຄາສິນຄ້າ ໃນທ້ອງຕະຫຼາດຢູ່ພາຍໃນແຂວງຂອງຕົນ ເພື່ອຫຼີກເວັ້ນການສວຍໂອກາດຂຶ້ນລາຄາສິນຄ້າຕາມລຳພັງໃຈໃນຊ່ວງໄລຍະນໍ້າຖ້ວມ. ທັງນີ້, ກໍ່ເພື່ອເປັນການປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ຊົມໃຊ້ ໂດຍສະເພາະຜູ້ທີ່ກຳລັງຕົກທຸກໄດ້ຍາກໃນສະຖານະການບ້ານເມືອງພົບຄວາມຫຍຸ້ງຍາກ, ຜູ້ໃດພົບເຫັນການລະມີດໂທສາຍດ່ວນ 1510 ໄດ້ 24 ຊົ່ວໂມງ.

 

ເພື່ອເປັນເຈົ້າການ ໃນການປະຕິບັດແຈ້ງການສະບັບດັ່ງກ່າວ ເຈົ້າໜ້າທີ່ການຄ້າ ໃນແຕ່ລະທ້ອງຖິ່ນກໍ່ໄດ້ເອົາໃຈໃສ່ຕັ້ງຈັດຕັ້ງປະຕິບັດ, ຂະນະທີ່ ແຂວງຈຳປາສັກ,​ ເຈົ້າໜ້າທີ່ກວດກາການຄ້າ​ ຂະ ແໜງການຄ້າພາຍໃນ​ ພະແນກອຸດສາຫະກໍາ ແລະ​ ການຄ້າ ແຂວງຈໍາປາສັກ​ ກໍ່ໄດ້ ລົງຕິດຕາມ​ກວດກາ​ການຊື້-ຂາຍສິນຄ້າຢູ່ຕະຫຼາດແຫ່ງຕ່າງໆໃນນະຄອນປາກເຊ ເພື່ອບໍ່ໃຫ້ຜູ້ຄ້າຂາຍສວຍໂອກາດຂຶ້ນລາຄາສິນຄ້າ ໃນໄລຍະບ້ານເມືອງເກີດວິກິດແບບນີ້​ ໂດຍສະເພາະແມ່ນສິນຄ້າທີ່ມີການກະທົບໄວຕໍ່ຊີວິດການເປັນຢູ່ຂອງພໍ່ແມ່ປະຊາຊົນ ແລະ​ ບຸກຄົນຜູ້ທີ່ມີລາຍຮັບຕໍ່າ​ ເປັນຕົ້ນແມ່ນຊີ້ນ,​ ປາ,​ ອາຫານ,​ ເຂົ້າສານ​ ແລະ​ ອື່ນໆ.

ຫາກບຸກຄົນໃດລະເມີດ ຈະຖືກປັບໃໝຕາມປະມວນກົດໝາຍອາຍາ ສະບັບເລກທີ 26/ສພຊ ລົງວັນທີ 17 ພຶດສະພາ 2017 ໃນມາດຕາ 277 ການສວຍໂອກາດຂຶ້ນລາຄາສິນຄ້າ ແລະ ຄ່າບໍລິການ ລະບຸວ່າ: ບຸກຄົນໃດ ຫາກສວຍໂອກາດຂຶ້ນລາຄາສິນຄ້າ, ຄ່າບໍລິການ ຫຼື ໄດ້ຂາຍສິນຄ້າແພງເກີນຂອບເຂດໃນເວລາເກີດໄພແຫ້ງແລ້ວ, ໄພນໍ້າຖ້ວມ ຫຼື ໃນເວລາທີ່ມີສະພາບການຫຍຸ້ງຍາກ ເກີດຂຶ້ນໃນທ້ອງຖິ່ນໜຶ່ງ ຈະຖືກລົງໂທດຕັດອິດສະຫຼະພາບແຕ່ ຫົກເດືອນ ຫາ ສອງປີ ແລະ ຈະຖືກປັບໃໝແຕ່ 3.000.000 ກີບ ຫາ 10.000.000 ກີບ.

 

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ