ທ້າຍອາທິດຜ່ານມາໄດ້ມີກອງປະຊຸມການພົບປະແລກປ່ຽນວຽກງານປ້ອງກັນຄວາມສະຫງົບບໍລິເວນຊາຍແດນ ປະຈໍາປີ 2019 ຂອງສອງກອງບັນຊາການ ປກສ ແຂວງສາລະວັນ ສປປ ລາວ ກັບ ກອງບັນຊາການຕໍາຫຼວດແຂວງ ກວາງຈິ ສສ ຫວຽດນາມ ພິທີໄດ້ຈັດຂຶ້ນຢູ່ທີ່ກອງບັນຊາການຕໍາຫຼວດແຂວງກວາງຈິ ໃຫ້ກຽດເຂົ້າຮ່ວມມີ ທ່ານ ພັນເອກ ເຈິ໋ນດຶກຫວຽດ ຫົວໜ້າກອງບັນຊາການຕໍາຫຼວດແຂວງກວາງຈິ, ຝ່າຍແຂວງສາລະວັນ ນຳໂດຍ ທ່ານ ພັນເອກ ສີເສີດ ສອນດາລາ ຮັກສາການຫົວໜ້າກອງບັນຊາການ ປກສ ແຂວງສາລະວັນ ພ້ອມດ້ວຍຄະນະທັງສອງຝ່າຍເຂົ້າຮ່ວມ.
ກອງປະຊຸມຄັ້ງນີ້ໄດ້ຕີລາຄາສູງກ່ຽວກັບໝາກຜົນການປະສານງານການພົວພັນລະຫວ່າງຄະນະພັກ, ວິຊາການສອງແຂວງ ທີ່ໄດ້ພ້ອມກັນເຄື່ອນໄຫວ ແລະ ຈັດຕັ້ງປະຕິບັດວຽກງານວິຊາສະເພາະ ກໍຄືການປ້ອງກັນຊາຍແດນໃຫ້ມີຄວາມສະຫງົບ, ອໍານວຍຄວາມສະດວກໃຫ້ປະຊາຊົນສອງແຂວງໄປ – ມາຫາສູ່ກັນຢ່າງສະດວກ ໂດຍສະເພາະແມ່ນມີການໄປ – ມາຢ້ຽມຢາມພີ່ນ້ອງ, ປິ່ນປົວສຸຂະພາບ, ການແລກປ່ຽນຊື້ – ຂາຍເຄື່ອງອຸປະໂພກ – ບໍລິໂພກທີ່ບໍ່ຜິດລະບຽບກົດໝາຍຂອງສອງແຂວງສອງປະເທດ ແລະ ຢຶດໝັ້ນໄມຕີິຈິດມິດຕະພາບທີ່ໜັກແໜ້ນຕໍ່ສາຍພົວພັນ, ມິດຕະພາບ ແລະ ໃຫ້ຄວາມຊ່ວຍເຫຼືອເຊິ່ງກັນ ແລະ ກັນ.
ອົງການຈັດຕັ້ງກໍາລັງແຮງຕໍາຫຼວດແຂວງສາລະວັນ – ກວາງຈິ ຍິ່ງເພີ່ມພູນຄູນສ້າງ ແລະ ພັດທະນາໃນຫຼາຍດ້ານ ເຊັ່ນ: ມີການສຶກສາອົບຮົມປະຊາຊົນທີ່ຕັ້ງບ້ານເຮືອນລຽບຊາຍແດນ, ການຍົກຍ້າຍພູມລໍາເນົາ, ການຖາງໄຮ່ເຮັດສວນບໍ່ໃຫ້ມີການລ່ວງລໍ້າຊາຍແດນຂອງກັນ, ການແຕ່ງດອງກໍຕ້ອງໃຫ້ມີການປະກອບເອກະສານທີ່ຖືກຕ້ອງ, ການເຂົ້າ – ອອກຊາຍແດນໃຫ້ຖືກຈຸດ, ສືບຕໍ່ຮ່ວມມືດ້ານວຽກງານປັບປຸງກໍ່ສ້າງກໍາລັງ, ຍົກລະດັບດ້ວຍການບໍາລຸງ ແລະ ກໍ່ສ້າງພະນັກງານວິຊາການ – ວິຊາສະເພາະ, ຮ່ວມມືຕ້ານ – ສະກັດກັ້ນປາກົດການຫຍໍ້ທໍ້ຂອງສັງຄົມ, ການພົວພັນວຽກງານດ້ານຂໍ້ມູນ – ຂ່າວສານທີ່ເປັນຜົນດີຕໍ່ວຽກງານປ້ອງກັນຄວາມສະຫງົບ, ຄວາມປອດໄພຂອງສັງຄົມ, ສືບຕໍ່ປາບປາມພວກອາດຊະຍາກໍາຂ້າມຊາດ ເຊັ່ນ: ການຜະລິດ – ຂົນສົ່ງ, ການຄ້າຂາຍມົ້ວສຸມສິ່ງເສບຕິດ, ຄ້າມະນຸດ – ໂສເພນີ, ການຄ້າຂາຍອາວຸດ ແລະ ອື່ນໆ.
ຄຽງຄູ່ກັນນັ້ນ, ສອງອົງການຈັດຕັ້ງມີຄວາມເປັນເອກະພາບໃນທິດທາງດຽວ ທີ່ຈະໄດ້ພ້ອມກັນສຸມໃສ່ບໍາລຸງກໍ່ສ້າງພະນັກງານວິຊາການວິຊາສະເພາະໃຫ້ກ້າເກັ່ງ, ຮັບປະກັນວຽກງານຕົນ, ການຊອກຮູ້ວຽກງານພາຍໃນ ແລະ ນອກເຂດ, ໃຫ້ຮັບປະກັນທັນຕົວ ແລະ ໃຫ້ມີການເພີ່ມທະວີວຽກງານການຮ່ວມມືໃຫ້ເລິກເຊິ່ງແທດເຖິງອໍານາດການປົກຄອງຂັ້ນບ້ານ ແລະ ປະຊາຊົນ ເພື່ອບໍ່ໃຫ້ມີການກະທໍາຜິດທີ່ເປັນການລະເມີດສິດລະເມີດເຂດແດນທີ່ມີໄວ້ໃຫ້ກັນ. ພ້ອມນັ້ນ, ອົງການຈັດຕັ້ງລັດ, ອົງການຈັດຕັ້ງບ້ານ ແລະ ປະຊາຊົນໃຫ້ເປັນຫູເປັນຕາປົກປ້ອງຄຸ້ມຄອງເຂດນໍ້າແດນດິນ, ປົກປັກຮັກສາກວດກາລາດຕະເວນບັນດາເຫດການຕ່າງໆ ທີ່ອາດຈະເກີດຂຶ້ນລຽບຊາຍແດນຂອງສອງແຂວງສອງປະເທດໃຫ້ຢູ່ໃນ ຄວາມສະຫງົບໂດຍພື້ນຖານ.
( ໂດຍ: ໝອກໄຊ ຄຸນຕະບຸງ )
