ເສັ້ນທາງ-ຂົວ ເມືອງນອງ ຖືກກະທົບຈາກພາຍຸໂພດູ, ຕອນນີ້ເລັ່ງລົງສຳຫຼວດປັບປຸງ - Laoedaily

ເສັ້ນທາງ-ຂົວ ເມືອງນອງ ຖືກກະທົບຈາກພາຍຸໂພດູ, ຕອນນີ້ເລັ່ງລົງສຳຫຼວດປັບປຸງ

ເມື່ອທ້າຍເດືອນສິງຫາ ເກີດຝົນຕົກໜັກຕິດຕໍ່ກັນເປັນຫຼາຍວັນ ເຮັດໃຫ້ຫຼາຍພື້ນທີ່ໃນແຂວງສະຫວັນນະເຂດ ປະສົບກັບນໍ້າຖ້ວມຂັງ ເນື່ອງຈາກໄດ້ຮັບອິດພົນຈາກພາຍຸໂພດູ. ດ້ວຍອິດທິພົນຂອງພາຍຸລູກດັ່ງກ່າວ ເຮັດໃຫ້ສະພາບພື້ນຖານໂຄງລ່າງຂອງແຂວງ ສະເພາະແມ່ນເມືອງນອງໄດ້ຮັບຜົນກະທົບຢ່າງໜັກເປັນຕົ້ນແມ່ນ ເສັ້ນທາງ ແລະ ຂົວບາງແຫ່ງຖືກນໍ້າເຊາະເຈື່ອນ, ຂາດບໍ່ສາມາດສັນຈອນໄດ້ນັບແຕ່ວັນທີ 28 ສິງຫາ ເປັນຕົ້ນມາ. ດ້ານການນໍາເມືອງໄດ້ລົງສໍາຫຼວດບ່ອນໄດ້ຮັບຜົນກະທົບ ແລະ ຫາຊ່ອງທາງແກ້ໄຂໃຫ້ກັບຄືນສູ່ສະພາບປົກກະຕິໂດຍໄວ.

*


ໃນວັນທີ 2 ກັນຍາ 2019 ນີ້ ການນຳເມືອງນຳ ເຊິ່ງໂດຍທ່ານ ແຕງອ່ອນ ຈັນທະລະນອງ ຮອງເຈົ້າເມືອງໆນອງ, ທ່ານ ກອງໄຊ ໄຊຍະຈັກ ຫົວໜ້າຫ້ອງການ ໂຍທາທິການ ແລະຂົນສົ່ງ ເມືອງນອງ ພ້ອມທິມງານໄດ້ລົງໄປສຳຫຼວດຈຸດດັ່ງກ່າວ ແລະໄດ້ຮັບແຈ້ງຈາກທາງຄະນະຈຸດສຸມແກ້ງລີ້ນ (ຂົວຈົມ ເຊສະໝູນ) ຢູ່ສົ້ນບ້ານ ແກ້ງລີ້ນ ໄດ້ຖືກນໍ້າເຊາະເຈື່ອນ ແລະ ຖືກຕັດຂາດໄປໃນຄ່ຳຄືນຂອງວັນທີ 29 ສິງຫາ 2019 ເຊິ່ງຂະໜາດຄວາມ ກວ້າງຂອງຂົວແມ່ນ 6 ແມັດ, ຍາວ 95 ແມັດ, ຈຸດທີ່ຖືກນ້ຳຕັດຂາດແມ່ນ ຢູ່ທາງສົ້ນຂົວເບື້ອງບ້ານ ປະຈະຕຽນ ຖືກຕັດຂາດໃນໄລຍະ 30 ແມັດ.

*

 

ດັ່ງນັ້ນ, ທາງການນໍາເມືອງພ້ອມດ້ວຍພາກສ່ວນກ່ຽວຂ້ອງ ໄດ້ປຶກສາຫາລືກັນເພື່ອແກ້ໄຂເຫດການ ເພື່ອໃຫ້ພໍ່ແມ່ປະຊາຊົນພາຍໃນເຂດຈຸດສຸມແກ້ງລີ້ນໄດ້ໄປມາຫາສູ່ກັນ ຈາກນັ້ນ, ຫ້ອງການໂຍທາທິການ ແລະ ຂົນສົ່ງເມືອງຈະໄດ້ປະສານກັບ ພະແນກໂຍທາທິການແຂວງເພື່ອຫາວິທີປັບປຸງປົວແປງຂົວໃຫ້ສາມາດສັນຈອນໄດ້ຕາມປົກກະຕິ ແລະ ກັບຄືນສູ່ສະພາບເດີມໂດຍໄວ.

*

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ