ເມື່ອບໍ່ດົນມານີ້ ຫ້ອງການສຶກສາທິການ ແລະ ກິລາ ເມືອງໝອກ ແຂວງຊຽງຂວາງ ໄດ້ລົງປະເມີນຄູອາຈານສອນ ໂຮງຮຽນ ປະຖົມ, ມັດທະຍົມຕົ້ນ ແລະ ມສ ກຸ່ມເປົ້າໝາຍ ຈໍານວນ 20 ໂຮງຮຽນ ເຊິ່ງນໍາໂດຍທ່ານ ໄທວ່າງ ກ່າຊົວ ຫົວໜ້າຫ້ອງການສຶກສາທິການ ແລະ ກິລາ ເມືອງໝອກ ພ້ອມດ້ວຍໜ່ວຍງານທີ່ກ່ຽວຂ້ອງເຂົ້າຮ່ວມນໍາ.
ຜ່ານການຈັດຕັ້ງປະຕິບັດຕົວຈິງຂອງຄະນະທີມງານທີ່ລົງປະເມີນຄັ້ງນີ້ທີ່ເຫັນວ່າ ບັນດາໂຮງຮຽນເປົ້າໝາຍທີ່ຖືກປະເມີນ ໄດ້ມີຜົນງານພົ້ນເດັ່ນໃນຫຼາຍດ້ານ ເປັນຕົ້ນ ການບໍລິຫານຄຸ້ມຄອງໂຮງຮຽນ ແລະ ດ້ານການຮຽນ-ການສອນ ຂອງຄູ ແລະ ນັກຮຽນ ມີຄວາມເຂັ້ມແຂງ ແລະ ມີປະສິດທິພາບສູງຂຶ້ນກ່ວາກົ່າ ເມື່ອທຽບໃສ່ເມື່ອກ່ອນ, ການປະຕິບັດໂຄງການຫຼັກ ສູດການຮຽນ-ການສອນ ບັນລຸຕາມກະຊວງສຶກສາທິການ ແລະ ກິລາ ກໍານົດໃຫ້, ພ້ອມນັ້ນຍັງໄດ້ອີງໃສ່ 3 ລັກສະນະ 5 ຫຼັກມູນຂອງການສຶກສາ ເປັນແນວທາງໃນການຈັດຕັ້ງເຄື່ອນໄຫວໃຫ້ເປັນຮູບປະທໍາ, ຖືເອົາການສຶກສາເປັນໜ້າທີ່ຂອງໝົດທຸກຄົນໃນການຊຸກຍູ້ລູກຫຼານນັກຮຽນໃຫ້ໄດ້ເຂົ້າໂຮງຮຽນ ແລະ ຮຽນໃຫ້ຈົບ, ແຕ່ທັ້ງນີ້ທັ້ງນັ້ນ ບາງໂຮງຮຽນກໍຍັງຈະໄດ້ເອົາໃຈໃສ່ເປັນພິເສດໃນການສຶກສາອົບຮົມແນວຄິດການເມືອງໃຫ້ແກ່ຄູອາຈານກໍຄືເດັກນັກຮຽນ ເພື່ອໃຫ້ເຂົາ ເຈົ້າມີຄວາມອຸ່ນອຽນທຸ່ນທ່ຽງໃນການປະຕິບັດໜ້າທີ່, ມີຄວາມອຸ່ນອຽນທຸ່ນທ່ຽງໃນການສຶກສາຮໍ່າຮຽນ, ຫຼີກເວັ້ນອັດຕາຄ້າງຫ້ອງ ແລະ ອັດຕາປະລະການຮຽນຂອງນັກຮຽນ, ແຂ່ງຂັນກັນສອນດີ ສອນເກັ່ງ ແລະ ນັກຮຽນດີ ຮຽນເກັ່ງ ເພື່ອຍົກສູງບົດບາດຂອງໂຮງຮຽນໃຫ້ສູງຂຶ້ນ ແລະ ທຽບເທົ່າກັບບັນດາໂຮງຮຽນແຫ່ງອື່ນໆ.
ການລົງປະເມີນຄັ້ງນີ້ ຍັງສົ່ງຜົນດີໃຫ້ແກ່ຄູອາຈານສອນ ໃນການບຸກບືນຕົນເອງຕໍ່ໜ້າທີ່ວຽກງານ, ກະຕຸກຊຸກຍູ້ໃຫ້ເຂົາເຈົ້າມີຄວາມຫ້າວຫັນ ແລະ ມີຄວາມຮັບຜິດຊອບຕໍ່ໜ້າທີ່ ເພື່ອ ສຸມຈິດສຸມໃຈໃສໜ້າວຽກທີ່ໄດ້ຮັບມອບໝາຍໃຫ້ມີຜົນສໍາເລັດ, ແນໃສ່ເຮັດໃຫ້ຂະບວນການຮຽນ-ການສອນຢູ່ບັນດາໂຮງຮຽນເປົ້າໝາຍຂອງເມືອງໝອກໄດ້ຮັບການພັດທະນາດີຂຶ້ນ
ໂອກາດນີ້ທ່ານ ໄທວ່າງ ກ່າຊົວ ຍັງໄດ້ເນັ້ນໜັກໃຫ້ຜູ່ບໍລິຫານໂຮງຮຽນກໍຄືຄູອາຈານສອນພາຍໃນໂຮງຮຽນຈົ່ງຍົກສູງພາລະບົດບາດ ຄວາມຮັບຜິດຊອບຂອງຕົນ, ປະຕິບັດໜ້າທີ່ວຽກງານໃຫ້ມີຜົນສໍາເລັດ ແລະ ພັດທະນາຕົນເອງທາງດ້ານວິຊາສະເພາະໃຫ້ມີຄວາມເຂັ້ມແຂງຂຶ້ນກ່ວາເກົ່າ.
(ພາບ-ຂ່າວ: ສີອຳພອນ ສກມ ໝອກ)