ແຕ່ງຕັ້ງທ່ານ ເດດສັກດາ ມະນີຄໍາ ເປັນຫົວໜ້າພະແນກແຜນການ ແລະ ການລົງທຶນແຂວງຄຳມ່ວນຄົນໃໝ່ - Laoedaily

ແຕ່ງຕັ້ງທ່ານ ເດດສັກດາ ມະນີຄໍາ ເປັນຫົວໜ້າພະແນກແຜນການ ແລະ ການລົງທຶນແຂວງຄຳມ່ວນຄົນໃໝ່

ໃນວັນທີ 26 ສິງຫາ 2019 ຜ່ານມາຢູ່ທີ່ຫ້ອງປະຊຸມເຮືອນຮັບແຂກເລກ 01 ຂອງແຂວງຄໍາມ່ວນ ໄດ້ຈັດພິທີປະກາດການຈັດຕັ້ງຫົວໜ້າພະແນກແຜນການ ແລະ ການລົງທຶນແຂວງຄົນໃໝ່ໂດຍການເຂົ້າຮ່ວມຂອງທ່ານ ພົມມາ ພັນທະລັງສີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ , ທ່ານ ບົວຄໍາ ພິລາວົງ ຮອງຫົວໜ້າກົມຈັດຕັ້ງພະ ນັກງານ ກະຊວງແຜນການ ແລະ ການລົງທຶນ , ທ່ານ ນາງ ວຽງມະນີ ຈັນທະນະສິນ ຮອງປະທານສະພາປະຊາຊົນແຂວງ , ມີບັນດາທ່ານທີ່ຕາງໜ້າໃຫ້ພະແນກການອ້ອມຂ້າງແຂວງ ຕະຫຼອດເຖິງພະນັກງານວິຊາການພາຍໃນພະແນກດັ່ງກ່າວເຂົ້າຮ່ວມ .

ການປະກາດການຈັດຕັ້ງຫົວໜ້າພະແນກແຜນການ ແລະ ການລົງທຶນແຂວງໃນຄັ້ງນີ້ແມ່ນປະຕິບັດຕາມມະຕິຕົກລົງຂອງກອງປະຊຸມຄະນະປະຈໍາສະພາປະຊາຊົນແຂວງ ວ່າດ້ວຍການຮັບຮອງເອົາການສະເໜີຍົກຍ້າຍ ແລະ ແຕ່ງຕັ້ງຫົວໜ້າພະແນກແຜນການ ແລະ ການລົງທຶນແຂວງ ແລະ ປະຕິບັດຕາມຂໍ້ຕົກລົງຂອງເຈົ້າແຂວງສະບັບເລກທີ 237 – 238 / ຈຂ.ຄມ ວ່າດ້ວຍການຍົກຍ້າຍຫົວໜ້າພະແນກແຜນການ ແລະ ການລົງທຶນແຂວງໂດຍໄດ້ຕົກລົງຍົກຍ້າຍທ່ານ ດາວໄຫຼ ແກ້ວດວງດີ ຫົວໜ້າພະແນກແຜນການ ແລະ ການລົງທຶນແຂວງໄປຮັບຜິດຊອບໜ້າທີ່ໃໝ່ຢູ່ຫ້ອງວ່າການແຂວງ ແລະ ໄດ້ຕົກລົງແຕ່ງຕັ້ງທ່ານ ເດດສັກດາ ມະນີຄໍາ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງມາເປັນຫົວໜ້າພະແນກແຜນການ ແລະ ການລົງທຶນແຂວງຄົນໃໝ່ .

                                                                   ຂ່າວ-ພາບ : ແດງສະຫວັດ ແສນພານິດ .
ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ