ພະຍາກອນອາກາດເວລາ 7: 00 ໂມງຂອງວັນທີ 31 ສິງຫາ 2019 ຈາກກົມອຸຕຸນິຍົມ ແລະ ອຸທົກກະສາດລະບຸວ່າ: ຮ່ອງຄວາມກົດດັນອາກາດຕໍ່າຍັງພາດຜ່ານເຂດພາກເໜືອຫາພາກກາງຂອງປະເທດລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມດ້ວຍກຳລັງປານກາງຫາແຮງພັດປົກຄຸມ, ຊຶ່ງຍັງເຮັດໃຫ້ມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນໃນແຕ່ລະພາກ.
ສຳຫຼັບ ລະດັບນໍ້າຢູ່ເຂດຂົວເຊບັ້ງໄຟ ແຂວງ ຄຳມ່ວນ, ໃນເວລາ 7 ໂມງ ຂອງວັນທີ 31 ສິງຫາ 2019 ແທກໄດ້ 19 ແມັດ 86 ຊັງຕີແມັດ, ຍັງຂື້ນສູງກາຍເຂດອັນຕະລາຍ (ເຂດອັນຕະລາຍ: 18 ແມັດ 50 ຊັງຕີແມັດ) ແລະ ຄາດວ່າທ່າອ່ຽງຂອງລະດັບນໍ້າຂົວເຊບັ້ງໄຟ ຈະສູງຂື້ນຕື່ມອີີກ, ສະນັ້ນຈື່ງໃຫ້ຍົກຍ້າຍ ແລະ ໃຫ້ເກັບມ້ຽນວັດຖຸສິ່ງຂອງພ້ອມສັດລຽ້ງໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມສະພາບອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.
ສະພາບອາກາດຕົວຈິງ ປະຈຳວັນທີ 31 ສິງຫາ 2019 ແລະ ປະລິມານນໍ້າຝົນໃນ24ຊົ່ວໂມງຜ່ານມາ ຕົກແຮງກວ່າໝູ່ແມ່ນນິຄົມ34 ເມືອງປາກຊ່ອງ ແຂວງຈຳປາສັກ ແທກໄດ້116,8 ມິນລິແມັດ, ຮອງມາແມ່ນແຂວງສະຫວັນນະເຂດ ຍັງຕົກແຮງເປັນມື້ທີ່2 ແທກໄດ້109,8ມິນລິແມັດ, ປາກເຊ 90,7ມິນລິແມັດ.
ລະດັບນ້ຳ ສາຂາແມ່ນ້ຳຂອງ ແລະ ພະຍາກອນ ລະດັບນ້ຳ ປະຈຳວັນທີ 31 ສິງຫາ 2019 ເຫັນວ່າລະດັບນໍ້າຢູ່ຂົວເຊ(ເຊບັ້ງໄຟ)ລະດັບນໍ້າຍັງສືບຕໍ່ເພີ່ມຂຶ້ນ,ເຊັ່ນດຽວກັບແກ້ງກອກ(ເຊຈຳພອນ). ສ່ວນລະດັບນໍ້າຂອງ ແຕ່ທ່າແຂກ ຮອດປາກເຊແມ່ນສືບຕໍ່ເພີ່ມຂຶ້ນ ໂດຍສະເພາະປາກເຊ ເພີ່ມສູງຂຶ້ນໄວ.