ສະພາການຄ້າ ແລະ ອຸດສາຫະກຳແຫ່ງຊາດລາວ ( ສຄອຊ ) ຈັດຊຸດຝຶກອົບຮົມໃນຫົວຂໍ້ “ ຫຼັກສູດການພັດທະນາບຸກຄະລາກອນຢ່າງມືອາຊີບ ” ເພື່ອເປັນການພັດທະນາບຸກຄະລາກອນໃນບັນດາຫົວໜ່ວຍທຸລະກິດໃຫ້ມີຄວາມເຂັ້ມແຂງ, ຍົກລະດັບຂີດຄວາມສາມາດໃຫ້ແກ່ພາກທຸລະກິດ.
ພິທີເປີດຊຸດຝຶກອົບຮົມດັ່ງກ່າວ ຈັດຂຶ້ນໃນວັນທີ 26 ສິງຫາ 2019 ທີ່ ສຄອຊ ໂດຍການເປັນປະທານຂອງ ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ, ມີ ທ່ານ ນາງ ໂທໂມະ ວາຕານາເບະ ຜູ້ປະສານງານສະມາຄົມສົ່ງເສີມການຮ່ວມມືດ້ານວິຊາການແບບຍືນຍົງແຫ່ງປະເທດຍີ່ປຸ່ນ ( AOTS ) ປະຈໍາພາກພື້ນ, ທ່ານ ຍຸດນະຣົງ ເອື້ອເຟື້ອ ວິທະຍາກອນ ແລະ ຄູຝຶກແຫ່ງສະມາຄົມສົ່ງເສີມດ້ານເຕັກໂນໂລຊີ ( TPA ) ແຫ່ງປະເທດໄທ ພ້ອມດ້ວຍສໍາມະນາກອນຈາກ 40 ບໍລິສັດເຂົ້າຮ່ວມ ເຊິ່ງການຝຶກອົບຈະດໍາເນີນໄປເປັນເວລາ 5 ວັນ ( 26 – 30 ສິງຫາ 2019 ).
ທ່ານ ນາງ ຈັນທະຈອນ ວົງໄຊ ກ່າວວ່າ: ຈຸດປະສົງ ແລະ ເປົ້າໝາຍຂອງການຈັດຝຶກອົບຮົມໃນຄັ້ງນີ້ ກໍເພື່ອເປັນການພັດທະນາບຸກຄະລາກອນຂອງລາວ ກໍຄືບັນດາຫົວໜ່ວຍທຸລະກິດຂອງລາວໃຫ້ມີຄວາມເຂັ້ມແຂງ. ພ້ອມນີ້, ຍັງເປັນການເພີ່ມຂີດຄວາມສາມາດໃຫ້ແກ່ພາກທຸລະກິດຄຽງຄູ່ກັບການພັດທະນາບຸກຄະລາກອນຂອງບໍລິສັດ ເພື່ອເພີ່ມປະສິດທິພາບຂອງການເຮັດວຽກໃນອົງກອນໃຫ້ເປັນລະບົບ ເພື່ອຈະສາມາດຕອບສະໜອງໄດ້ກັບຄວາມຮຽກຮ້ອງຕ້ອງການໃນດ້ານພັດທະນາຢ່າງບໍ່ຢຸດຢັ້ງ. ຄຽງຄູ່ກັນນັ້ນ, ມັນຍັງຈະເປັນການຊ່ວຍເພີ່ມຜະລິດຕະພາບຂອງການຜະລິດ ແລະ ເພີ່ມຂີດຄວາມສາມາດໃຫ້ບຸກຄະລາກອນເຮັດວຽກຢ່າງມືອາຊີບ ເຊັ່ນ: ບັນດາພະນັກງານໃນບໍລິສັດ, ຜູ້ຈັດການ ແລະ ຜູ້ບໍລິຫານໃຫ້ມີຄວາມເຂົ້າໃຈຢ່າງເລິກເຊິ່ງຕໍ່ກັບການຈັດລະບົບຂອງການເຮັດວຽກ ( 5S organization ), ການກວດກາຄຸນນະພາບຂອງການເຮັດວຽກ ແລະ ການຜະລິດ ( Kaizen production ) ເຊິ່ງບົດຮຽນດັ່ງກ່າວແມ່ນມີຄວາມສໍາຄັນ ແລະ ຈໍາເປັນທີ່ສຸດສໍາລັບທຸລະກິດຂອງ ສປປ ລາວ ເພື່ອເປັນຊ່ອງທາງເຮັດໃຫ້ທຸລະກິດຂອງລາວສາມາດແຂ່ງຂັນກັບພາກພື້ນ ແລະ ສາກົນໄດ້.
ທ່ານ ຍຸດນະຣົງ ເອື້ອເຟື້ອ ໃຫ້ສໍາພາດວ່າ: ໃນການດໍາເນີນທຸລະກິດໃດໜຶ່ງບຸກຄະລາກອນເປັນສິ່ງສໍາຄັນທີ່ສຸດທີ່ຈະຊ່ວຍຂັບເຄື່ອນການດໍາເນີນທຸລະກິດໄປໄດ້ ຍ້ອນແນວນັ້ນການຝຶກອົບຮົມໃນຫົວຂໍ້ “ ຫຼັກສູດການພັດທະນາບຸກຄະລາກອນຢ່າງມືອາຊີບ ” ຈຶ່ງເກີດຂຶ້ນ. ສໍາລັບຜູ້ເຂົ້າຮ່ວມຝຶກອົບຮົມໃນຄັ້ງນີ້ຈະໄດ້ຮັບຮູ້ເຖິງການພັດທະນາຄົນໃຫ້ມີຄວາມເຂັ້ມແຂງ, ມີວິໄນໃນການເຮັດວຽກຮ່ວມກັນ ໂດຍນໍາໃຊ້ ( 5S organization ) ຄື: ສະສາງ, ສະດວກ, ສະອາດ, ສ້າງມາດຕະຖານ ແລະ ສ້າງວິໄນ ເຊິ່ງບົດຮຽນໃນຄັ້ງນີ້ຜູ້ເຂົ້າຮ່ວມສາມາດນໍາໄປປັບໃຊ້ໃຫ້ເກີດປະໂຫຍດແກ່ອົງກອນຢ່າງຫຼວງຫຼາຍແນ່ນອນ. ນອກຈາກນີ້, ກໍຈະໄດ້ຮຽນຮູ້ການປັບປຸງວຽກດ້ວຍຕົວຂອງພະນັກງານ ໂດຍເນັ້ນໃຫ້ຄິດເອງ, ລົງມືປະຕິບັດເອງ ແລະ ສາມາດແກ້ໄຂບັນຫາດ້ວຍຕົນເອງໄດ້, ເວົ້າລວມແລ້ວແມ່ນການຝຶກໃຫ້ຄົນສ້າງຜົນງານຂອງຕົນເອງອອກມາຢ່່າງມືອາຊີບ ພ້ອມເຮັດໃຫ້ການດໍາເນີນທຸລະກິດຄ່ອງຕົວບໍ່ມີບັນຫາເລື່ອງບຸກຄະລາກອນ.
( ຂ່າວ: ເອຢິບ, ຮູບ: ຂັນທະລີ )
