ກົມອຸຕຸນິຍົມ ແລະ ອຸທົກກະສາດ ໄດ້ຄາດຄະເນພະຍາກອນອາກາດ ພາກເໜືອ-ກາງ ໃນວັນທີ 26 ສິງຫາ ຫາ 1 ກັນຍາ 2019 ລົງສະບັບເລກທີ 1192/ກອຕທ ໃນວັນທີ 26 ສິງຫາ 2019 ວ່າ: ໃນໄລຍະວັນທີ 26 ສິງຫາ ຫາ 1 ກັນຍາ 2019 ຮ່ອງຄວາມກົດດັນຕໍ່າຂອງອາກາດຮ້ອນ ທີ່ມີກຳລັງປານກາງ ຫາແຮງ ຍັງຈະພັດຜ່ານຢູ່ແຂວງພາກເໜືອ ຫາ ພາກກາງຂອງປະເທດລາວ. ພ້ອມດຽວກັນ, ລົມມໍລະສຸມຕາເວັນຕົກສ່ຽງໃຕ້ ມີກຳລັງປານກາງຈະພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ມີຝົນຕົກ, ຟ້າຮ້ອງໃນລະດັບຄ່ອຍ ຫາ ຕົກປານກາງເປັນບໍລິເວນກວ້າງຢູ່ໃນແຕ່ລະພາກ ແລະ ຕົກໜັກ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງພາກເໜືອລົງຫາ ພາກກາງ ແລະ ພາກໃຕ້.
ຈາກນັ້ນ, ວັນທີ 29 ສິງຫາ ຫາ 1 ກັນຍາ 2019 ລົມມໍລະສຸມຕາເວັນຕົກສ່ຽງໃຕ້ຈະມີກຳລັງແຮງເພີ່ມຂຶ້ນກາຍເປັນ ພາຍຸໝຸນເຂດຮ້ອນ ຢູ່ຟາກປະເທດຟິລິບປິນ, ຈະເຄື່ອນທີ່ຜ່ານທະເລຈີນໃຕ້ຕອນກາງ ແລະ ຈະມີທ່າອ່ຽງເຄື່ອນທີ່ເຂົ້າພາກກາງຂອງ ສສ ຫວຽດນາມ ແລະ ສືບຕໍ່ເຄື່ອນທີ່ຜ່ານພາກກາງ ຫາ ພາກເໜືອ ຂອງປະເທດລາວ ໃນໄລຍະວັນທີ 30 ສິງຫາ ຫາ 1 ກັນຍາ 2019 ເຊິ່ງຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍ ຫາ ປານກາງເປັນບໍລິເວນກວ້າງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນແຂວງພາກກາງ ແລະ ພາກເໜືອ.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອຳນາດການປົກຄອງ ແລະ ອົງການຈັດຕັ້ງທຸກພາກສ່ວນທີ່ກ່ຽວຂ້ອງທີ່ອາໄສຢູ່ລຽບຕາມແມ່ນໍ້າສາຂາ ຈົ່ງມີສະຕິ ແລະ ສືບຕໍ່ເກັບມ້ຽນ, ເຄື່ອນຍ້າຍວັດຖຸສິ່ງຂອງ ພ້ອມທັງສັດລ້ຽງ ໄປໄວ້ບ່ອນທີ່ປອດໄພ ເຊິ່ງຈະເຮັດໃຫ້ມີນໍ້າຖ້ວມອັ່ງ, ພ້ອມນີ້, ກໍ່ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດ ໃນໄລຍະ 1 ຫາ 4 ວັນຕໍ່ໜ້ານີ້.
