ເຕືອນ! ຜູ້ຢູ່ລຽບເຂດຂົວເຊບັ້ງໄຟໃຫ້ລະວັງ ນ້ຳຂຶ້ນກາຍຈຸດລະວັງໄພແລ້ວ - Laoedaily

ເຕືອນ! ຜູ້ຢູ່ລຽບເຂດຂົວເຊບັ້ງໄຟໃຫ້ລະວັງ ນ້ຳຂຶ້ນກາຍຈຸດລະວັງໄພແລ້ວ

ເມື່ອອາທິດຜ່ານມານໍ້າຂອງ ແລະ ສາຂາແມ່ນໍ້າຂອງ ບາງສາຍມີລັກສະນະເພີ່ມຂຶ້ນ ແລະ ຫຼຸດລົງເລັກນ້ອຍ. ແຕ່ຫຼ້າສຸດ ວັນທີ 19 ສິງຫາ 2019 ກົມອຸຕຸນິຍົມ ແລະ ອຸທົກກະສາດລາຍງານວ່າ ລະດັບນໍ້າຢູ່ເຂດຂົວເຊບັ້ງໄຟ ແຂວງ ຄຳມ່ວນ, ໃນເວລາ 7:00 ໂມງຂອງມື້ນີ້ວັດແທກໄດ້ 17,89 ແມັດ ຂຶ້ນກາຍເຂດລະວັງໄພແລ້ວ (ເຂດລະວັງໄພ: 17,50 ແມັດ); ມະຫາໄຊ (ເຊບັ້ງໄຟ) ແທກໄດ້ 13,56 ແມັດ (ເຂດລະວັງໄພ: 14 ແມັດ) ແລະ ທ່າອ່ຽງລະດັບນໍ້າເຊບັ້ງໄຟຍັງຈະສືບຕໍ່ຂຶ້ນສູງຕື່ມອີກເປັນຕົ້ນແມ່ນ: ເຊບັ້ງໄຟ (ຕົ້ນແຫນ) ວັດແທກໄດ້ 11,70 ແມັດ (ເຂດລະວັງໄພ: 12 ແມັດ); ບ້ານໄຮ່ (ເຊບັ້ງໄຟ) ວັດແທກໄດ້ 10,72 ແມັດ (ເຂດລະວັງໄພ: 13,70 ແມັດ); ແກງກອກ (ເຊຈໍາພອນ) ວັດແທກໄດ້ 6,48 ແມັດ (ເຂດລະວັງໄພ: 7,50 ແມັດ)

 

ພາບປະກອບຂ່າວ

ດັ່ງນັ້ນ, ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ ແລະ ອຳນາດການປົກຄອງທີ່ອາໄສຢູ່ລຽບຕາມ ນໍ້າເຊບັ້ງໄຟ ແລະ ເຂດນໍ້າເຊຈຳພອນ ໃຫ້ມີສະຕິເຝົ້າລະວັງລະດັບນໍ້າ ແລະ ໃຫ້ເກັບມ້ຽນວັດຖຸສິ່ງຂອງພ້ອມສັດລ້ຽງໄປໄວ້ບ່ອນທີ່ປອດໄພ.

ຂະນະທີ່ ພະຍາກອນອາກາດເວລາ 7: 00 ໂມງຂອງວັນທີ 19 ສິງຫາ 2019 ລະບຸວ່າ: ລົມມໍລະສຸມຕາເວັນຕົກສ່ຽງໄດ້ມີກໍາລັງແຮງເພີ່ມຂຶ້ນພັດປົກຄຸມຢູ່ທົ່ວທຸກພາກຂອງປະເທດລາວ, ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍຢູ່ບາງທ້ອງຖິ່ນໃນເຂດພາກເໜືອ, ສ່ວນເຂດພາກກາງ ແລະ ພາກໃຕ້ຈະມີຝົນຕົກໃນລະດັບຄ່ອຍ ຫາ ປານກາງຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ.

 

ພາບປະກອບຂ່າວ

 

ພາກເໜືອດ້ານຕາເວັນອອກ (ຜົ້ງສາລີ, ວຽງໄຊ, ຊຳເໜືອ ແລະ ຊຽງຂວາງ) ຈະມີຝົນຕົກ ໃນລະດັບຄ່ອຍຢູ່ບາງທ້ອງຖິ່ນແຂວງ ຫົວພັນ ແລະ ຊຽງຂວາງ. ອຸນຫະພູມໃນລະຫວ່າງ 19-30 ອົງສາ.

ພາກເໜືອດ້ານຕາເວັນຕົກ (ອຸດົມໄຊ, ຫ້ວຍຊາຍ, ຫຼວງນໍ້າທາ, ເມືອງ ສິງ, ວຽງພູຄາ, ຫຼວງພະບາງ ແລະ ໄຊຍະບູລີ) ຈະມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍຢູ່ບາງທ້ອງຖິ່ນແຂວງ ຫຼວງນໍ້າທາ, ຫຼວງພະບາງ ແລະ ໄຊຍະບູລີ.

 

 

ພາກກາງ​ (ນະຄອນຫຼວງວຽງຈັນ, ໄຊສົມບູນ, ໂພນໂຮງ, ປາກຊັນ, ຫຼັກ20 ເມືອງ ວຽງທອງ, ນາກາຍ, ທ່າແຂກ, ສະຫວັນນະເຂດ ແລະ ເຊໂນ) ຈະມີຝົນຕົກ, ຟ້າຮ້ອງ, ຟ້າເຫຼື້ອມໃນລະດັບຄ່ອຍຢູ່ທົ່ວໄປ ແລະ ຕົກປານກາງ ພ້ອມຈະມີລົມພັດແຮງຢູ່ບາງທ້ອງຖິ່ນແຂວງ ວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ. ອຸນຫະພູມໃນລະຫວ່າງ 23-32 ອົງສາ.

ສະເພາະນະຄອນຫຼວງວຽງຈັນ: ອາກາດຮ້ອນ ແລະ ຈະມີຝົນຕົກ, ຟ້າຮ້ອງ, ຟ້າເຫຼື້ອມໃນລະດັບຄ່ອຍ ແລະ ມີລົມພັດແຮງເປັນບາງໂອາກາດໃນຕອນບ່າຍຫາກາງຄືນ. ອຸນຫະພູມໃນລະຫວ່າງ 25-33 ອົງສາ. ສຳລັບແຂວງໄຊສົມບູນ ຈະມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍ ແລະ ຕົກປານກາງ ພ້ອມຈະມີລົມພັດແຮງເປັນບາງໂອາກາດ.

 

ພາກໃຕ້ (ປາກເຊ, ປາກຊ່ອງ, ນິຄົມ34, ສາລະວັນ, ເຊກອງ, ທ່າແຕງ, ດາກຈຶງ ແລະ ອັດຕະປື) ຈະມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍຢູ່ເກືອບທົ່ວໄປ ແລະ ຈະມີລົມພັດແຮງຢູ່ບາງທ້ອງຖິ່ນແຂວງ ຕຳປາສັກ, ສາລະວັນ ແລະ ອັດຕະປື. ອຸນຫະພູມໃນລະຫວ່າງ 23-33 ອົງສາ. ສຳລັບເຂດພູພຽງບໍລິເວນ ຈະມີຝົນຕົກໃນລະດັບຕ່ອຍ ແລະ ຈະມີລົມພັດແຮງເປັນບາງໂອກາດ. ອຸນຫະພູມໃນລະຫວ່າງ 15-27 ອົງສາ.

 

 

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ