ເລືອກກິນໝາກໄມ້ໃນລະດູຝົນແນວໃດເພື່ອປ້ອງກັນພະຍາດ - Laoedaily

ເລືອກກິນໝາກໄມ້ໃນລະດູຝົນແນວໃດເພື່ອປ້ອງກັນພະຍາດ

ເມື່ອເຂົ້າສູ່ໄລຍະກາງປີຝົນຟ້າກໍເລີ່ມເຂົ້າມາຕາມລະດູການ ແລະ ສຳລັບໃຜທີ່ມັກກິນໝາກໄມ້ເປັນກິດຈະວັດປະຈຳວັນ ຂໍແນະນຳໝາກໄມ້ທີ່ຄວນກິນໃນລະດູຝົນເພື່ອສຸຂະພາບທີ່ດີຂຶ້ນ ເມື່ອເວົ້າກ່ຽວກັບພະຍາດທີ່ມາກັບຍາມຝົນແລ້ວແມ່ນມີຫຼາຍຢ່າງ ແຕ່ພະຍາດທີ່ເປັນຫຼາຍທີ່ສຸດແມ່ນໜີບໍ່ພົ້ນພະຍາດໄຂ້ຫວັດ.

ດັ່ງນັ້ນ, ໝາກໄມ້ທີ່ຄວນເລືອກກິນແມ່ນຈະຕ້ອງເລືອກໝາກໄມ້ທີ່ມີວິຕາມິນ C ສູງ ເພື່ອຈະສາມາດຕໍ່ສູ້ກັບພະຍາດໄຂ້ຫວັດໄດ້ເປັນຢ່າງດີ ແລະ ຈະມີໝາກໄມ້ຊະນິດໃດແດ່ທີ່ຢູ່ໃນກຸ່ມຂອງໝາກໄມ້ແກ້ຫວັດ.

ເລີ່ມຕົ້ນທີ່ໝາກສີດາເປັນໝາກໄມ້ທີ່ມີວິຕາມິນ C ທີ່ສູງຫຼາຍ ແຕ່ຫຼາຍຄົນມັກຈະເຂົ້າໃຈວ່າແມ່ນໝາກກ້ຽງເປັນໝາກໄມ້ທີ່ມີວິຕາມິນ C ຫຼາຍ ເຊິ່ງໃນຄວາມເປັນຈິງແລ້ວຜູ້ທີ່ຕ້ອງການວິຕາມິນ C ສູງແມ່ນຈະຕ້ອງກິນໝາກສີດາ ເພາະໃນໝາກສີດາແມ່ນມີວິຕາມິນ C ສູງກວ່າໝາກກ້ຽງເຖິງ 4 ເທົ່າ ໝາກໄມ້ຊະນິດນີ້ຖືວ່າເປັນໝາກໄມ້ທີ່ສາມາດປ້ອງກັນໄຂ້ຫວັດໄດ້ເປັນຢ່າງດີ. ນອກຈາກນັ້ນ, ຢູ່ໃນໝາກສີດາຍັງມີສານ ( bioflavonoid ) ທີ່ຊ່ວຍໃນເລື່ອງຂອງເສັ້ນເລືອດຝອຍ ແລະ ຍັງຊ່ວຍໃຫ້ຜິວພັນສົດໃສມີນ້ຳມີນວນນຳອີກ.

ນອກຈາກໝາກສີດາຈະເປັນໝາກໄມ້ທີ່ແນະນຳແລ້ວຮອງມາ ກໍຄື: ໝາກກ້ຽງ ເຊິ່ງເປັນແຫຼ່ງສະສົມວິຕາມິນ C ເຊັ່ນກັນ ແຕ່ເວລາກິນຫ້າມເອົາໄຍມັນອອກ ເພາະໄຍໂຕນັ້ນຈະຊ່ວຍໃນເລື່ອງຂອງລະບົບຂັບຖ່າຍໄດ້ເປັນຢ່າງດີ.

ອີກໝາກໄມ້ຊະນິດໜຶ່ງທີ່ຢາກແນະນຳໃຫ້ກິນໃນລະດູຝົນ ຄື: ໝາກນັດ ເພາະມີວິຕາມິນ C ທີ່ຊ່ວຍບຳລຸງລະບົບພູມຄຸ້ມກັນຂອງຮ່າງກາຍໃຫ້ແຂງແຮງ ແລະ ຊ່ວຍໃນເລື່ອງລະບົບຍ່ອຍອາຫານໄດ້ນຳ. ນອກຈາກນີ້, ຍັງມີສານ ( antioxidant ) ທີ່ຊ່ວຍຊະລໍຄວາມແກ່ ແລະ ຄືນຄວາມສົດໃສໃຫ້ແກ່ຜິວພັນໄດ້ເປັນຢ່າງດີ.

ໝາກໄມ້ທັງໝົດນີ້ນອກຈາກຈະເໝາະສົມທີ່ຈະກິນໃນລະດູຝົນແລ້ວ ຍັງເໝາະສົມສຳລັບຜູ້ທີ່ກຳລັງຄວບຄຸມນ້ຳໜັກໄດ້ອີກດ້ວຍ ເພາະມີທັງວິຕາມິນ C ແລະ ກາກໄຍອາຫານສູງ.

( ຂໍ້ມູນຈາກ: KAPOOK.COM )

( ຮຽບຮຽງ: ນຸ້ມນິ້ມ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ