ການຈັດຕັ້ງປະຕິບັດແຜນງົບປະມານປີ 2019 ຂອງພະແນກການເງິນນະຄອນຫຼວງວຽງຈັນ ໄດ້ຮັບຕົວເລກມອບໝາຍທັງໝົດ 4.782,47 ຕື້ກີບ. ໃນນີ້, ສາມາດປະຕິບັດໄດ້ແລ້ວ 2.069,41 ຕື້ກີບ ເທົ່າກັບ 43,27% ຂອງແຜນການປີ, ສ່ວນ 6 ເດືອນທ້າຍປີ ໄດ້ສະເໜີດັດແກ້ງົບປະມານລາຍຮັບ – ລາຍຈ່າຍໃນຫຼາຍຂະແໜງການ.
ທ່ານ ຄຳພັນ ມາລາບັນດິດ ຫົວໜ້າພະແນກການເງິນນະຄອນຫຼວງວຽງຈັນ ລາຍງານໃນກອງປະຊຸມສະພາປະຊາຊົນນະຄອນຫຼວງເມື່ອບໍ່ດົນມານີ້ວ່າ: ການເກັບລາຍຮັບໃນໄລຍະ 6 ເດືອນຕົ້ນປີ 2019 ສາມາດປະຕິບັດໄດ້ແລ້ວ 2.069,41 ຕື້ກີບ ເທົ່າກັບ 43,27% ຂອງແຜນການປີ. ໃນນີ້, ພູດນະຄອນຫຼວງ ( ທ້ອງຖິ່ນ ) ປະຕິບັດໄດ້ 578,87 ຕື້ກວ່າກີບ ເທົ່າກັບ 42,64% ຂອງແຜນການປີ ເຊິ່ງຂະແໜງສ່ວຍສາອາກອນປະຕິບັດໄດ້ 551,65 ຕື້ກີບ, ການຄຸ້ມຄອງຊັບສິນຂອງລັດປະຕິບັດໄດ້ 26,65 ຕື້ກີບ, ລັດວິສາຫະກິດປະຕິບັດໄດ້ 547,36 ລ້ານກີບ ແລະ ລາຍຮັບອື່ນໆ 25,65 ລ້ານກີບ.
ສຳລັບພູດສູນກາງ ( ພາສີ ) ປະຕິບັດໄດ້ 1.490,54 ຕື້ກີບ ເທົ່າກັບ 43,52% ຂອງແຜນການປີ, ດ້ານລາຍຈ່າຍງົບປະມານທີ່ກະຊວງການເງິນ ມອບໃຫ້ນະຄອນຫຼວງວຽງຈັນ ຈັດຕັ້ງປະຕິບັດແຜນເບື້ອງຕົ້ນ 649,47 ຕື້ກີບ ສາມາດປະຕິບັດໃນ 6 ເດືອນຕົ້ນປີ 265,26 ຕື້ກີບ ເທົ່າກັບ 40,84% ຂອງແຜນການປີ.
ສ່ວນແຜນງົບປະມານ 6 ເດືອນທ້າຍປີຂອງນະຄອນຫຼວງ ຈະສູ້ຊົນເກັບລາຍຮັບໃຫ້ໄດ້ 4.611,23 ຕື້ກີບ ທຽບໃສ່ແຜນການປີ ເທົ່າກັບ 96,41% ເຊິ່ງພູດທ້ອງຖິ່ນ 1.357,67 ຕື້ກີບ. ໃນນັ້ນ, ສ່ວຍສາອາກອນ 741,72 ຕື້ກີບ, ການຄຸ້ມຄອງຊັບສິນຂອງລັດ 37,02 ຕື້ກີບ, ລັດວິສາຫະກິດລັດລົງທຶນ ແລະ ປະກັນໄພ 85,74 ລ້ານກີບ, ສ່ວນພູດສູນກາງ 3.253,56 ຕື້ກີບ ທຽບໃສ່ແຜນການປີ 95% ສູ້ຊົນໃນ 6 ເດືອນທ້າຍປີແມ່ນ 1.661,78 ຕື້ກີບ ເທົ່າກັບ 48,52% ຂອງແຜນການປີ, ດ້ານລາຍຈ່າຍແມ່ນ 225,01 ຕື້ກີບ.
ທ່ານ ຄຳພັນ ມາລາບັນດິດ ຍັງສະເໜີຕົວເລກດັດແກ້ 6 ເດືອນທ້າຍປີອີກວ່າ:
ສະເໜີດັດແກ້ຫຼຸດ:
1 ລາຍຈ່າຍງົບປະມານ ( ປົກກະຕິ ) ພາກ 60 ເງິນເດືອນ ແລະ ເງິນອຸດໜູນ ແຜນລວມເບື້ອງຕົ້ນທັງໝົດ 386,20 ຕື້ກີບ, ຄາດຄະເນປະຕິບັດໝົດປີ 375,70 ຕື້ກີບ, ຄາດຄະເນຈະຫຼຸດແຜນການປີ 10,50 ຕື້ກີບ. ໃນນີ້, ຂະແໜງປົກຄອງ 9 ຕື້ກີບ, ຂະແໜງສຶກສາ 1 ຕື້ກີບ ແລະ ຂະແໜງສາທາ 500 ລ້ານກີບ.
2 ລາຍຈ່າຍງົບປະມານ ( ປົກກະຕິ ) ຂອງຂະແໜງປົກຄອງ ພາກ 61 ເງິນນະໂຍບາຍ ແລະ ຊ່ວຍໜູນ ແຜນລວມເບື້ອງຕົ້ນ 21,30 ຕື້ກີບ, ຄາດຄະເນປະຕິບັດໝົດປີ 16,60 ຕື້ກີບ, ຄາດຄະເນຈະຫຼຸດແຜນການ 4,70 ຕື້ກີບ.
3 ລາຍຮັບ – ລາຍຈ່າຍງົບປະມານ ( ວິຊາການ ) ຂອງຂະແໜງປົກຄອງພາກ 61 ເງິນນະໂຍບາຍ ແລະ ຊ່ວຍໜູນ ແຜນລວມເບື້ອງຕົ້ນ 3,25 ຕື້ກີບ, ຄາດຄະເນປະຕິບັດໝົດປີ 1,25 ຕື້ກີບ, ຄາດຄະເນຈະຫຼຸດແຜນການ 2 ຕື້ກີບ.
ສະເໜີດັດແກ້ເພີ່ມ:
1 ສະເໜີພິຈາລະນາດັດແກ້ເພີ່ມແຜນລາຍຮັບ – ລາຍຈ່າຍວິຊາການ ຈໍານວນ 18,28 ຕື້ກີບ. ໃນນີ້, ພາກ 62 ( ເງິນບໍລິຫານລັດ ) 13,40 ຕື້ກີບ, ພາກ 66 ( ເງິນຊື້ຊັບສົມບັດຄົງທີ່ ) 1,93 ຕື້ກີບ, ພາກ 67 ( ເງິນລົງທຶນຂອງລັດ ) 4,95 ຕື້ກີບ.
2 ສະເໜີພິຈາລະນາດັດແກ້ລາຍຈ່າຍງົບປະມານ ( ປົກກະຕິ ) ຂອງຂະແໜງປົກຄອງພາກ 62 ເງິນບໍລິຫານລັດ ຈໍານວນ 13,70 ຕື້ກີບ.
3 ບ້ວງລາຍຈ່າຍເງິນບໍາເນັດເກັບລາຍຮັບເກີນແຜນປີ 2018 ຂອງນະຄອນຫຼວງວຽງຈັນ ພາກ 15 ຈໍານວນ 61,96 ຕື້ກີບ ເພື່ອຊໍາລະໜີ້ສິນບັນດາໂຄງການລົງທຶນຂອງລັດ, ນໍາໃຊ້ເຂົ້າໃນແຜນວຽກບຸລິມະສິດແກ້ໄຂຄວາມທຸກຍາກ, ວຽກຊຸກຍູ້ລາຍຮັບ, ການຊໍາລະໜີ້ຄ່າໄຟຟ້າ, ນໍ້າປະປາ, ໂທລະສັບ ແລະ ເພີ່ມເງິນບໍລິຫານຈັດຊື້ອຸປະກອນເຄື່ອງໃຊ້ຫ້ອງການທີ່ຈໍາເປັນ.
[ຂ່າວ: ສົມສະຫວິນ, ຮູບ: ສຸກສະຫວັນ ]
