ຫ້ອງການສາທາລະນະສຸກ ເມືອງຫາດຊາຍຟອງ ຮ່ວມມືກັບອໍານາດການປົກຄອງ ບ້ານດົງຄໍາຊ້າງ ສ້າງຂະບວນການທໍາລາຍໜອນນໍ້າຍຸງລາຍ ເພາະເຂດບ້ານດັ່ງກ່າວມີຈຳນວນຜູ້ຕິດເຊື້ອໄຂ້ຍຸງລາຍເຖິງ 100 ກວ່າລາຍ.
ເມື່ອວັນທີ 3 ສິງຫາ 2019 ໄດ້ມີພິທີເປີດຂະບວນການທຳລາຍໜອນນ້ຳຍຸງລາຍ ຢູ່ທີ່ບ້ານດົງຄໍາຊ້າງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ດຣ. ບຸນນະໄລ ສີຫາກູນ ຫົວໜ້າຫ້ອງການສາທາລະນະສຸກເມືອງຫາດຊາຍຟອງ, ທ່ານ ນາງ ຈິນດາວອນ ວັດທະນາ ນາຍບ້ານດົງຄໍາຊ້າງ ພ້ອມດ້ວຍບັນດາ ອສບ, ມີປະຊາຊົນ ແລະ ນັກສຶກສາຈາກວິທະຍາໄລກະສິກໍາ ຮ່ວມກັນສ້າງຂະບວນການ ກວ່າ 100 ຄົນ.
ທ່ານ ດຣ. ບຸນນະໄລ ສີຫາກູນ ໃຫ້ສໍາພາດວ່າ: ການສ້າງຂະບວນການທີ່ບ້ານດົງຄໍາຊ້າງ ຄັ້ງນີ້ເນື່ອງຈາກວ່າບ້ານດັ່ງກ່າວນີ້ມີຄົນເຈັບເພີ່ມຂຶ້ນສູງເກືອບເຖິງ 100 ກໍລະນີ ເພື່ອເປັນການຕ້ານ ແລະ ສະກັດກັ້ນບໍ່ໃຫ້ມີການແຜ່ລາມໄປຫຼາຍກວ່ານີ້, ພ້ອມທັງເລັງໃສ່ບໍ່ໃຫ້ຄົນເຈັບເສຍຊີວິດ. ສະນັ້ນ, ຫ້ອງການສາທາລະນະສຸກເມືອງຈຶ່ງໄດ້ສົມທົບກັບອໍານາດການປົກຄອງບ້ານ, ອາສາສະໝັກ ແລະ ພໍ່ແມ່ປະຊາຊົນພາຍໃນບ້ານດົງຄໍາຊ້າງ ໄດ້ຮ່ວມກັນຈັດຂະບວນການໃຫຍ່ເພື່ອທໍາລາຍແຫຼ່ງເພາະພັນໜອນນໍ້າຍຸງລາຍ ຄາດວ່າຈະໃຫ້ອັດຕາໜອນນໍ້າຕໍ່າລົງ ລວມທັງເຮັດໃຫ້ຈໍານວນຄົນເຈັບໄຂ້ຍຸງລາຍຫຼຸດລົງ ແລະ ສະກັດກັ້ນບໍ່ໃຫ້ແຜ່ລະບາດເພີ່ມຂຶ້ນ.
ລະດູຝົນຍັງອີກ 2 – 3 ເດືອນຂ້າງໜ້າ ມັນຈະເປັນເງື່ອນໄຂທີ່ຈະເຮັດໃຫ້ມີຄວາມສ່ຽງເກີດການລະບາດທີ່ຮ້າຍແຮງ ຈຶ່ງຕ້ອງໄດ້ມີການປະຕິບັດເປັນປະຈໍາທຸກໆອາທິດ ໂດຍລະດົມເອົາແຕ່ລະຂົງເຂດກຸ່ມບ້ານໃຫ້ຈັດຕັ້ງປະຕິບັດ 1 – 2 ບ້ານຕໍ່ອາທິດ ແລະ ອສບ ຈະມີການລົງກວດເປັນປະຈໍາ ເຊິ່ງໃນເມືອງຫາດຊາຍຟອງ ມີຜູ້ຕິດເຊື້ອພະຍາດໄຂ້ຍຸງລາຍກວມເອົາ 40 ບ້ານ ໃນ 60 ບ້ານ ດ້ວຍຈຸດພິເສດຂອງບ້ານດົງຄໍາຊ້າງ ເປັນບ້ານທີ່ໃຫຍ່, ແອອັດ, ມີການເຄື່ອນຍ້າຍ ເຂົ້າ – ອອກເປັນປະຈໍາ ແລະ ປະຊາຊົນສ່ວນໜຶ່ງຍັງບໍ່ທັນມີຄວາມເຂົ້າໃຈກ່ຽວກັບການປ້ອງກັນພະຍາດດ້ວຍຕົວເຂົາເຈົ້າເອງ ເຊິ່ງເປັນອຸປະສັກໃນການປຸກລະດົມ ນອກຈາກນີ້, ມີຫຼາຍຄົນຟ້າວນຳວຽກນຳງານຈຶ່ງບໍ່ປະຕິບັດ ແລະ ບັນຫາຫຼັກໆຄືບ້ານນີ້ມີເຮືອນເຊົ່າ – ຫ້ອງແຖວເປັນຈໍານວນຫຼວງຫຼາຍ, ໄປເຊົ້າກັບຄໍ່າຈຶ່ງກາຍເປັນບັນຫາ ໃຫຍ່ ທີ່ພວກເຮົາເຂົ້າບໍ່ເຖິງ.
ທ່ານ ນາງ ຈິນດາວອນ ວັດທະນາ ໃຫ້ສໍາພາດວ່າ: ການສ້າງຂະບວນການດັ່ງກ່າວມີ 63 ໜ່ວຍເຂົ້າຮ່ວມ ໂດຍໃຫ້ແຕ່ລະໜ່ວຍແຍກຍ້າຍກັນລົງໄປກັບ ອສບ ເພື່ອອະນາໄມ ແລະ ກວດຫາໜອນນໍ້າເພື່ອທໍາລາຍ ເຊິ່ງການເຮັດແບບນີ້ຈະເຮັດໃຫ້ປະຊາຊົນຕື່ນຕົວຫຼາຍຂຶ້ນ ພ້ອມທັງໃຫ້ເຂົາເຈົ້າໄດ້ມີສ່ວນຮ່ວມໃນການປະຕິບັດ 5 ປ ແລະ ເປັນການລົງໃຫ້ຄວາມຮູ້ແກ່ປະຊາຊົນແຕ່ລະຫຼັງຄາເຮືອນໃນການປ້ອງກັນພະຍາດໄຂ້ຍຸງລາຍອີກດ້ວຍ, ສ່ວນໜ່ວຍທີ່ພົບຜູ້ຕິດເຊື້ອຫຼາຍກວ່າໝູ່ແມ່ນໜ່ວຍ 37, 38, 39, 40, 41 ແລະ 42. ສະນັ້ນ, ທາງອໍານາດການປົກຄອງບ້ານພ້ອມດ້ວຍ ອສບ ຈຶ່ງໄດ້ລົງຕິດຕາມເຂດນີ້ຢ່າງໃກ້ຊິດເນື່ອງຈາກເປັນເຂດແອອັດ.
( ຂ່າວ: ທິບອຸສາ )
