ເຈົ້າໜ້າທີ່ແຂວງເຊກອງ ລົງຊຸກຍູ້ປະຊາຊົນເສຍຄ່າທຳນຽມທາງ - Laoedaily

ເຈົ້າໜ້າທີ່ແຂວງເຊກອງ ລົງຊຸກຍູ້ປະຊາຊົນເສຍຄ່າທຳນຽມທາງ

ເພື່ອເຮັດໃຫ້ການຈັດເກັບລາຍຮັບເຂົ້າງົບປະມານແຫ່ງລັດ ໄດ້ບັນລຸຕາມເປົ້າໝາຍ ຫຼາຍພາກສ່ວນທັງພາກລັດ, ອົງການຈັດຕັ້ງມະຫາຊົນ, ບັນດາຫົວໜ່ວຍທຸລະກິດ ພ້ອມດ້ວຍປະຊາຊົນລາວທຸກໆຄົນຕ້ອງ ມີສະຕິຕື່ນຕົວໃນການປະກອບສ່ວນພັນທະເສຍຄ່າທຳນຽມທາງໃຫ້ສຳເລັດຕາມກຳນົດເວລາທີ່ພາກສ່ວນກ່ຽວຂ້ອງກຳນົດໃຫ້ ແລະ ຕ້ອງເສຍໃຫ້ເປັນປົກກະຕິໃນທຸກໆປີ.

 

 

ໃນວັນທີ 2 ສິງຫາ 2019 ຜ່ານມາ ເຈົ້າໜ້າທີ່ຕໍາຫຼວດຈະລາຈອນ, ສ່ວຍສາອາກອນ ແລະທະນາຄານການຄ້າຕ່າງປະເທດລາວມະຫາຊົນ ແຂວງເຊກອງ ໄດ້ຮ່ວມກັນເປີດຂະບວນການຊຸກຍູ້ການເສຍຄ່າທໍານຽມທາງປະຈໍາປີ 2019 ຂຶ້ນ ໂດຍມີທ່ານ ພັນໂທ ຄໍາເຫຼັກ ໄຊຍະສິດ ຮອງຫົວໜ້າກົມຕໍາຫຼວດຈາລະຈອນກະຊວງປ້ອງກັນຄວາມສະຫງົບ, ຫົວໜ້າຄະນະຮັບຜິດຊອບລົງເຄື່ອນໄຫວຊຸກຍູ້ແນະນໍາການຈັດຕັ້ງປະຕິບັດການເສຍຄ່າທໍານຽມທາງ, ທ່ານ ນາງ ຄອນມະນີ ພິມມະສັກ ຮອງຫົວໜ້າກົມສ່ວຍສາອາກອນກະຊວງການເງິນ, ພ້ອມດ້ວຍວິຊາການກ່ຽວຂ້ອງຂັ້ນສູນກາງ, ແຂວງ, ເມືອງເຂົ້າຮ່ວມ.

 

 

ທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນປະຈໍາແຂວງເຊກອງໃຫ້ຮູ້ວ່າ: ເພື່ອປະຕິບັດຕາມແຜນການພັດທະນາເສດຖະກິດ-ສັງຄົມ ກໍຄືແຜນງົບປະມານແຫ່ງລັດປະຈໍາປີ 2019 ໂດຍສະເພາະແມ່ນແຜນການເກັບລາຍຮັບເຂົ້າງົບປະມານແຫ່ງລັດໃຫ້ບັນລຸຕາມເປົ້າໝາຍທີ່ວາງໄວ້ ແລະ ການປະຕິບັດພັນທະງົບປະມານແຫ່ງລັດກໍແມ່ນໜ້າທີ່ຂອງທຸກພາກສ່ວນທົ່ວສັງຄົມ ນັບທັງອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ບັນດາຫົວໜ່ວຍທຸລະກິດ ແລະ ພົນລະເມືອງລາວທຸກໆຄົນຕ້ອງມີສ່ວນຮ່ວມ.

 

 

ທັງນີ້, ການເປີດຂະບວນການເສຍຄ່າທໍານຽມທາງກັບທີ່ຜ່ານລະບົບທະນາຄານປະຈໍາປີ 2019 ກໍເພື່ອເປັນການປຸກລະດົມ, ຊຸກຍູ້ ແລະ ອໍານວຍຄວາມສະດວກໃຫ້ແກ່ອົງການຈັດຕັ້ງພັກ-ລັດ, ພະນັກງານ-ລັດຖະກອນ, ທະຫານ-ຕໍາຫຼວດ ແລະ ປະຊາຊົນບັນດາເຜົ່າໄດ້ມາເສຍຄ່າທໍານຽມທາງໃຫ້ເປັນຂະບວນຟົດຟື້ນ, ອັນສໍາຄັນແມ່ນການສ້າງຂະບວນການໃຫ້ເປັນແບບຢ່າງນໍາໜ້າສະແດງເຖິງສະຕິຕື່ນຕົວ ແລະ ຄວາມສະໝັກໃຈ ທີ່ປະກອບສ່ວນເຂົ້າງົບປະມານໃຫ້ແກ່ລັດ ກໍຄືການສ້າງສາ ແລະພັດທະນາປະເທດຊາດ.

 

 

ພ້ອມນີ້, ຍັງໄດ້ຮຽກຮ້ອງ ແລະ ເຊີນຊວນອົງການຈັດຕັ້ງທຸກພາກສ່ວນ ແລະ ພໍ່ແມ່ປະຊາຊົນບັນດາເຜົ່າໃນທົ່ວແຂວງໃຫ້ພ້ອມກັນມາປະກອບສ່ວນມອບພັນທະເຂົ້າງົບປະມານ ດ້ວຍການແຈ້ງເສຍຄ່າທໍານຽມທາງ, ຮັບປະກັນໃຫ້ໄດ້ໝາກຜົນ ປະສິດທິພາບສູງຕາມຈຸດປະສົງ ແລະ ລະດັບຄາດໝາຍແຜນການທີ່ວາງໄວ້.

ທົ່ວແຂວງມີຈໍານວນພາຫະນະທີ່ຂຶ້ນບັນຊີທັງໝົດ 15 ພັນກວ່າຄັນ ໂດຍຜ່ານການມາແຈ້ງເສຍໃນ 6 ເດືອນຕົ້ນປີ 2019 ມີທັງໝົດ 1 ພັນກວ່າຄັນເທົ່າກັບ 11% ສາມາດເກັບລາຍຮັບໄດ້ 300 ລ້ານກວ່າກີບ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ