ມະເຮັງເຕົ້ານົມ ເປັນພະຍາດຮ້າຍທີ່ເຊື່ອວ່າບໍ່ມີໃຜຢາກ ຈະໃຫ້ເກີດຂຶ້ນກັບຕົວເອງ ແລະ ເຖິງວ່າຄວາມສ່ຽງພະຍາດມະເຮັງເຕົ້ານົມຈະເກີດຂຶ້ນຈາກພຶດຕິກຳການຮັບປະທານອາຫານເປັນສ່ວນໃຫຍ່ ແຕ່ຮູ້ບໍວ່າຍັງມີອີກ 7 ໝາກໄມ້ຕ້ານມະເຮັງເຕົ້ານົມຢູ່ເທິງໂລກໃບນີ້ດ້ວຍ ເຊິ່ງຈະມີຫຍັງແດ່ໄປອ່ານພ້ອມໆກັນລີຍ!!
ໝາກພິລາ: ງານວິໄຈທາງການແພດສະຫະລັດອາເມລິກາພົບວ່າ ນໍ້າໝາກພິລາອຸດົມໄປດ້ວຍສານຕ້ານອະນຸມູນອິດສະຫຼະຫຼາຍ ຊະນິດທີ່ມີປະສິດທິພາບຂ້ອນຂ້າງສູງ ແລະ ຍັງມີໄຟໂຕນິວທຽນ ລວມເຖິງກົດເອນລາຈິກ ທີ່ມີຄຸນສົມບັດຊ່ວຍປ້ອງກັນການປ່ຽນແປງຂອງເຊລໃນຮ່າງກາຍມະນຸດ ແລະ ຢັບຢັ້ງການຂະຫຍາຍຕົວຂອງເຊລຜິດປົກກະຕິ ເຊິ່ງອາດຈະກາຍເປັນເຊລມະເຮັງໄດ້ ໂດຍສະເພາະເຊລມະເຮັງຜິວໜັງ, ມະເຮັງລຳໄສ້ ມະເຮັງຕັບ ມະເຮັງເຕົ້ານົມ ແລະ ມະເຮັງຕ່ອມລູກໝາກ. ນອກຈາກນີ້, ສະຖາບັນມະເຮັງແຫ່ງຊາດ ປະເທດ ສະຫະລັດອາເມລິກາ ຍັງບອກເພີ່ມເຕີ່ມດ້ວຍວ່າ ສານເອນລາຈິກໃນໝາກພິລາ ສາມາດປ້ອງກັນພະຍາດມະເຮັງປາກມົດລູກຂອງຜູ້ຍິງໄດ້ອີກດ້ວຍ
ໝາກກ້ຽງ ແລະ ໝາກໄມ້ຕະກູນໝາກກ້ຽງ: ຜົນການສຶກສາຂອງ Texas A&M University ເຜີຍວ່າ ນອກຈາກໝາກກ້ຽງຈະເຕັມໄປດ້ວຍວິຕາມິນຊີແລ້ວ ໃນໝາກກ້ຽງ ແລະ ໝາກໄມ້ຕະກູນໝາກກ້ຽງຍັງມີຄຸນສົມບັດຕ້ານມະເຮັງໄດ້ເປັນຢ່າງດີ ໂດຍສະເພາະກັບພະຍາດມະເຮັງເຕົ້ານົມ ເນື່ອງຈາກມີສານແຄໂຣທີນອຍຂ້ອນຂ້າງສູງນັ້ນເອງ
ໝາກຫຸ່ງ: ຈັດເປັນໝາກໄມ້ສີສົ້ມທີ່ອຸດົມໄປດ້ວຍເບຕ້າແຄໂຣທີນ ວິຕາມິນເອ ວິຕາມິນຊີ ແຄລຊຽມ ຟອດຟໍຮັສ ແລະ ທາດເຫຼັກ ມີຄຸນສົມບັດບຳລຸງສາຍຕາ ແລະ ຊ່ວຍຕ້ານມະເຮັງໄດ້ ຢືນຢັນຈາກງານວິໄຈຂອງມະຫາວິທະຍາໄລຟໍຣິດາທີ່ພົບວ່າ ຄຸນຄ່າທາງໂພຊະນາການຂອງໝາກຫຸ່ງມີລິດປ້ອງກັນພະຍາດມະເຮັງໄດ້ຢ່າງມີປະສິດທິພາບ ໂດຍສາມາດເຂົ້າໄປຢັບຢັ້ງການຈະເລີນເຕີບໃຫຍ່ຂອງເນື້ອງອກ ຫຼື ເຊລຜິດປົກກະຕິທີ່ມີແນວໂນ້ມຈະກາຍເປັນເຊລມະເຮັງ ແລະ ຍັງຢັບຢັ້ງໄດ້ທັງເຊລມະເຮັງເຕົ້ານົມ ມະເຮັງປາກມົດລູກ ມະເຮັງຕັບ ແລະ ມະເຮັງຕັບອ່ອນ
ແອັບເປີ້ນ: ຜົນການສຶກສາຈາກ University of California ຮ່ວມກັບ Genesis Prevention Center ເຜີຍວ່າ ຫາກກິນແອັບເປີ້ນໄດ້ມື້ລະ 1 ໜ່ວຍ ຈະຊ່ວຍຫຼຸດຄວາມສ່ຽງພະຍາດມະເຮັງເຕົ້ານົມໄດ້ຂ້ອນຂ້າງຫຼາຍ ເນື່ອງຈາກແອັບເປີ້ນມີສານຕ້ານອະນຸມູນອິດສະຫຼະຄ່ອນຂ້າງສູງ ລວມທັງຟຼາໂວນອຍ ໄຟເບີ ແລະ ສານອາຫານອື່ນໆ ທີ່ມີຄຸນສົມບັດຕ້ານມະເຮັງອີກນັບບໍ່ຖ້ວນ ແຕ່ທັງນີ້ກໍຕ້ອງກິນແອັບເປີ້ນແບບບໍ່ປອກເປືອກ ເພາະສັບພະຄຸນຂອງແອັບເປີ້ນທັງໝົດຢູ່ໃນເປືອກ
ໝາກໄມ້ຕະກູນເບີຣີ: ໝາກໄມ້ຊະນິດນີ້ອຸດົມໄປດ້ວຍສານຟຼາໂວນອຍ ສານຕ້ານອະນຸມູນອິດສະຫຼະ ແລະ ສານທີ່ມີຄຸນສົມບັດຕ້ານເຊລມະເຮັງຮ້າຍ ໂດຍຜົນການວິໄຈກໍພົບວ່າ ໝາກໄມ້ຕະກູນເບີຣີ ໂດຍສະເພາະບູເບີຣີມີສານເຄມີຈຳພວກແອນໂທໄຊຢານິນ (Anthocyanins) ສູງ ເຊິ່ງຊ່ວຍຊະລໍການເກີດເຊລມະເຮັງ ແລະ ຫຼຸດເຊລມະເຮັງເຕົ້ານົມໃນໜູທົດລອງໄດ້ເຖິງ 60-75% ເມື່ອທຽບກັບໜູທົດລອງທີ່ບໍ່ໄດ້ກິນບູເບີຣີເປັນປະຈຳ
ໝາກມັງຄຸດ: ສູນວິໄຈ ແລະ ພັດທະນາໝາກມັງຄຸດ ບໍລິສັດ ເອຊຽນ ໄຟໂຕຊູຕິກອນ ຈໍາກັດ (ມະຫາຊົນ) ແລະ ມະຫາວິທະຍາໄລຊຽງໃໝ່ພົບວ່າ ສານສະກັດຈາກ ໝາກມັງຄຸດຊ່ວຍສ້າງເຊລເມັດເລືອດຂາວຊະນິດ TH1 ແລະ TH 17 ເຊິ່ງມີຄຸນສົມບັດຊ່ວຍກຳຈັດ ແລະ ປ້ອງກັນການເກີດເຊລມະເຮັງເກືອບທຸກຊະນິດໄດ້ ບໍ່ເວັ້ນແມ້ແຕ່ມະເຮັງເຕົ້ານົມ ອີກທັງເຊລເມັດເລືອດຂາວ TH1 ຍັງເປັນສານກະຕຸ້ນພູມຄຸ້ມກັນໃນຮ່າງກາຍໃຫ້ແຂງແຮງ ສາມາດຊ່ວຍປ້ອງກັນພະຍາດໄດ້ດີຂຶ້ນ.
ແນວໃດກໍ່ຕາມ ໝາກໄມ້ທີ່ຊ່ວຍຕ້ານມະເຮັງເຕົ້ານົມ ນີ້ເປັນພຽງຕົວຊ່ວຍປ້ອງກັນພະຍາດຮ້າຍໄດ້ອີກທາງເລືອກໜຶ່ງເທົ່ານັ້ນ ແຕ່ສິ່ງທີ່ຈະກາລັນຕີໄດ້ວ່າເຮົາຈະບໍ່ປ່ວຍເປັນມະເຮັງເຕົ້ານົມກໍຄືການເບິ່ງແຍງສຸຂະພາບຂອງຕົວເຮົາເອງໃຫ້ດີໃນທຸກໆ ດ້ານໂດຍສະເພາະເລື່ອງອາຫານການກິນຂອງເຮົາເອງ ພະຍາຍາມຫຼີກລ້ຽງອາຫານປະເພດທອດ ປິ້ງໄໝ້ ອາຫານທີ່ມີໄຂມັນສູງ ແລະ ອາຫານແປຮູບຕ່າງໆ ທີ່ອາດເປັນປັດໄຈກະຕຸ້ນໃຫ້ເກີດເຊລມະເຮັງໃນຮ່າງກາຍເຮົາໄດ້ ນອກຈາກນີ້ຖ້າໝັ່ນອອກກຳລັງກາຍກັນເປັນປະຈຳໄດ້ກໍຈະຍິ່ງດີ
