ຮູບເງົາ ຮັກນີ້ສີບົວ ພາກ 3 ຈະໄດ້ອອກອາກາດໃນກາງເດືອນໜ້າ - Laoedaily

ຮູບເງົາ ຮັກນີ້ສີບົວ ພາກ 3 ຈະໄດ້ອອກອາກາດໃນກາງເດືອນໜ້າ

ກາຍເປັນກະແສໂດ່ງດັງທາງໂຊຊ່ຽວມີເດຍກັບ ຮູບເງົາ ຮັກນີ້ສີບົວ ທັງພາກ 1 ພາກ 2 ແລະ ກຳລັງຜະລິດພາກ 3 ໂດຍໄດ້ ນາງເອກ ແອນນິຕ້າ ວິພາ ຢາການາກິ ທີ່ມາພ້ອມກັບບົດ “ ຂອງຂວັນ ” ແລະ ພະເອກ ເອ້ ໄຊບັນດິດ ອິນທະວົງ ຮັບບົດ “ ພູຜາ ”.

ທ່ານ ນາງ ລັກອານົງ ສຸລິຍະວົງ ຜູ້ຈັດການການຕະຫຼາດ ບໍລິສັດ ຢູນິລີເວີ ໃຫ້ສໍາພາດວ່າ: ທາງບໍລິສັດຕ້ອງການຜະລິດຮູບເງົາ ຈຶ່ງຊອກຫາຜູ້ຜະລິດໃຫ້ ເຊິ່ງໃນທຸກພາກຂອງຮູບເງົາຈະປ່ຽນຜູ້ກຳກັບທຸກປີ ແລະ ປ່ຽນນັກສະແດງຫຼັກທຸກປີ ເພາະຢາກໃຫ້ຜູ້ກຳກັບຫຼາຍໆທ່ານໄດ້ສະແດງຜົນງານ ແລະ ໃຫ້ນັກສະແດງໄດ້ສະແດງຜົນງານ ໂດຍເປົ້າໝາຍຫຼັກໆກໍເພື່ອຢາກໃຫ້ໄວໜຸ່ມລາວມີຄວາມກ້າສະແດງອອກຫຼາຍຂຶ້ນ.

ສ່ວນຜູ້ຜະລິດຈະຮັບໜ້າທີ່ປະສານງານໃນຫຼາຍໆຝ່າຍໃຫ້ຜູ້ກໍາກັບ ເພາະຜູ້ກໍາກັບບໍ່ມີບໍລິສັດເປັນຂອງຕົນເອງ. ສະນັ້ນ, ພາກ 1 ແລະ ພາກ 2 ແມ່ນ ມາຍມີເດຍ ເປັນຜູ້ຜະລິດ ສໍາລັບພາກ 3 ຜູ້ກຳກັບມີບໍລິສັດເປັນຂອງຕົນເອງ ຈຶ່ງໃຫ້ຮັບຜິດຊອບເປັນຜູ້ຜະລິດເອງ.

ສໍາລັບນັກສະແດງ “ ຍິງ ” ແມ່ນໄດ້ຈາກການປະກວດຄົ້ນຫາສາວຜົມງາມທີ່ບຸກຄະລິກກະພາບດີ, ມີຄວາມໝັ້ນໃຈ ແລະ ມີຄວາມສາມາດໃນການສະແດງ ເຊິ່ງຜູ້ທີ່ຊະນະເລີດຈະໄດ້ຮັບບົດເປັນນັກສະແດງນຳຍິງ ສ່ວນຜູ້ທີ່ບໍ່ໄດ້ຊະນະໂຄງການປະກວດ ແຕ່ມີຄວາມສາມາດດ້ານການສະແດງກໍຈະໄດ້ຮັບບົດອື່ນໆໃນເລື່ອງ. ສ່ວນນັກສະແດງ “ ຊາຍ ” ແມ່ນຈະເຮັດການທົດສອບໄປພ້ອມໆກັນ ໂດຍຈະຕິດຕໍ່ຫຼາຍໆໂມເດວລິ້ງ ໂດຍສົ່ງຕົວແທນມາທົດສອບ ແລະ ປະກາດປາກຕໍ່ປາກຜູ້ທີ່ສົນໃຈເພື່ອມາທົດສອບບົດ.

ການຄັດນັກສະແດງແມ່ນເບິ່ງຈາກຫຼາຍໆອົງປະກອບ ເຊັ່ນ: ທັກສະການສະແດງ, ບຸກຄະລິກກະພາບ ແລະ ລັກສະນະນິດໄສວ່າເໝາະສົມກັບບົດນັ້ນໆ ຫຼື ບໍ່. ກຳມະການໃນການຄັດເລືອກນັກສະແດງແມ່ນຜູ້ກຳກັບ, ຜູ້ຊ່ວຍຜູ້ກຳກັບ, ຄົນຂຽນບົດ ແລະ ຜູ້ສະໜັບສະໜູນຫຼັກກໍຄືຊັນຊິວນັ້ນເອງ.

ແຕ່ລະ ຊີຣີ ທາງບໍລິສັດຈະມອບແງ່ຄິດທີ່ແຕກຕ່າງກັນ ໃນພາກ 2 ເຮົາຈະສື່ເຖິງຄວາມຮັກທີ່ບໍ່ຫວັງຜົນຕອບແທນ, ບໍ່ຫວັງຄອບຄອງ, ຄວາມຮັກຄືການໃຫ້, ການເສຍສະຫຼະຂອງພະເອກ ແລະ ການເຮັດດີ ໂດຍບໍ່ຈຳເປັນໃຫ້ໃຜຮູ້; ສ່ວນໃນພາກ 3 ຈະສື່ເຖິງນາງເອກທີ່ມີປົມດ້ານຄວາມຮັກຈົນປິດກັ້ນຕົນເອງ ແຕ່ສຸດທ້າຍກໍຕ້ອງໃຊ້ຄວາມກ້າຫານເພື່ອເປີດໃຈອີກຄັ້ງ ນອກຈາກເລື່ອງຄວາມຮັກ ກໍຍັງຈະສື່ເຖິງເລື່ອງຄອບຄົວ ແລະ ມິດຕະພາບ ເຊິ່ງນາງເອກຈະຕ້ອງເລືອກລະຫວ່າງຄົນຮັກ ແລະ ໝູ່, ສື່ເຖິງການເບິ່ງຄົນອື່ນ ແລະ ຕັດສິນຄົນອື່ນພຽງເປືອກນອກ ເພາະພະເອກຖືກນາງເອກຕັດສິນວ່າເປັນຄົນເກເລ ຫຼື ບໍ່ຕັ້ງໃຈຮຽນ ແຕ່ທຸກຄົນອາດມີເລື່ອງລາວ ແລະ ເຫດຜົນອື່ນໆທີ່ເຮັດໃຫ້ເຂົາເປັນແບບນັ້ນ.

ຮັບບົດນາງເອກແມ່ນ ນາງ ວິພາ ຢາການາກິ ຫຼື ແອນນິຕ້າ ທີ່ມາພ້ອມກັບບົດບາດເປັນ “ ຂອງຂວັນ ” ແລະ ພະເອກແມ່ນ ທ້າວ ໄຊບັນດິດ ອິນທະວົງ ຫຼື ເອ້ ຮັບບົດບາດເປັນ “ ພູຜາ ”. ພະເອກຖືວ່າເປັນນັກສະແດງໃໝ່ເລີຍມີໂອກາດສະແດງ “ ຮັກນີ້ສີບົວ ” ເລື່ອງທຳອິດ ແລະ ນາງເອກແມ່ນເຄີຍເຂົ້າຮ່ວມການປະກວດສາວຊັນຊິວໃນປີ 2016 ແຕ່ປີນັ້ນບໍ່ໄດ້ຊະນະເລີດ ແຕ່ດີໃຈຫຼາຍເຖິງນ້ອງຈະບໍ່ຊະນະເລີດໃນປີນັ້ນ ກໍຍັງສະໝັກອີກຄັ້ງໃນປີນີ້ຈົນໄດ້ລາງວັນຊະນະເລີດ.

ຮູບເງົາ “ ຮັກນີ້ສີບົວ ” ພາກ 3 ຕອນນີ້ແມ່ນຢູ່ໃນຂັ້ນຕອນການຖ່າຍທໍາຕາມສະຖານທີ່ຕາມລໍາດັບ ແລະ ດຳເນີນການຖ່າຍທຳໄດ້ 40% ຄາດວ່າຈະໄດ້ອອກອາກາດໃນກາງເດືອນກັນຍາ 2019 ນີ້. ສາມາດຕິດຕາມການອອກອາກາດໄດ້ທາງ ຊັນຊິວລາວ ແຟນເພຈ໌ ແລະ ຍັງມີເພຈ໌ເພື່ອແຟນໆຊີຣີ ໂດຍສະເພາະ ທີ່ສາມາດຕິດຕາມຂໍ້ມູນ – ຂ່າວສານຂອງຊີຣີ ໄດ້ທີ່: www.facebook.com/SunsilkLao ແລະ www.facebook.com/onyoursidetheseries.

[ ຂ່າວ: ນຸ້ມນິ້ມ; ຮູບ: ຜູ້ຈັດການການຕະຫຼາດ ບໍລິສັດ ຢູນິລີເວີ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ