ໂຄງການຕາຝັ່ງເຈື່ອນໄລຍະ 2 ຈະລົງມືກໍ່ສ້າງຕົ້ນປີໜ້າ - Laoedaily

ໂຄງການຕາຝັ່ງເຈື່ອນໄລຍະ 2 ຈະລົງມືກໍ່ສ້າງຕົ້ນປີໜ້າ

ນະຄອນຫຼວງວຽງຈັນ ກຽມເປີດຊອງປະມູນຫາບໍລິສັດທີ່ມີຄວາມເໝາະສົມເພື່ອລົງມືກໍ່ສ້າງໂຄງການຕາຝັ່ງເຈື່ອນໄລຍະ 2 ແຕ່ເຂດຫຼັກ 3 ຫາ ຫາດດອກແກ້ວ ຍາວປະມານ 12 ກິໂລແມັດ ເຊິ່ງໂຄງການຈະໃຫ້ໄດ້ລົງມືກໍ່ສ້າງໃນຕົ້ນປີ 2020.

ໃນປີ 2018 ນ້ຳຂອງໄດ້ໄຫຼລົ້ນຕາຝັ່ງເຂົ້າມາຫຼາຍບ້ານໃນນະຄອນຫຼວງທີ່ຢູ່ເຂດຕ່ຳ ນັບແຕ່ເຂດໜອງດາ ເມືອງສີໂຄດຕະບອງ ແລະ ໄດ້ມີການເຝົ້າລະວັງຢູ່ຫຼາຍເຂດ ໂດຍສະເພາະເຂດດອນຈັນ, ເຂດຫຼັກ 3 ວິທະຍາໄລເຕັກນິກ ລາວ – ເຢຍລະມັນ ແລະ ເຂດຫຼັກ 4 ທ່າເຮືອເກົ່າລົງໄປຫາແກ້ງປາຢ້າງ, ດອນເກີດ ແລະ ອີກຫຼາຍບ້ານຂອງເມືອງຫາດຊາຍຟອງ ເຊິ່ງໄດ້ໃຊ້ງົບປະມານພໍສົມຄວນໃນການກະກຽມຮັບມືເຫດການຄັ້ງນັ້ນເຊິ່ງໄດ້ສ້າງຄວາມເສຍຫາຍໃຫ້ຜົນລະປູກຂອງປະຊາຊົນເຂດແຄມຂອງເກືອບທຸກບ້ານ.

ທ່ານ ພູຂົງ ບັນນະວົງ ຫົວໜ້າພະແນກແຜນການ ແລະ ການລົງທຶນ ນະຄອນຫຼວງວຽງຈັນ ລາຍງານໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ນະຄອນຫຼວງວຽງຈັນ ຄັ້ງທີ 1 ທີ່ດຳເນີນລະຫວ່າງວັນທີ 24 – 26 ກໍລະກົດ 2019 ຜ່ານມາວ່າ: ນະຄອນຫຼວງວຽງຈັນ ກຽມຈັດການປະມູນໂຄງການກໍ່ສ້າງປ້ອງກັນຕາຝັ່ງເຈື່ອນ ໄລຍະ 2 ນັບແຕ່ເຂດຫຼັກ 3 ຫາ ຫາດດອກແກ້ວ ລວມ ຄວາມຍາວ 12 ກິໂລແມັດ ໂຄງການດັ່ງກ່າວແມ່ນໂຄງການເງິນກູ້ດອກເບ້ຍຕ່ຳຈາກ ສ.ເກົາຫຼີ ໃນມູນຄ່າ 67 ລ້ານໂດລາສະຫະລັດ ເຊິ່ງຈະເລີ່ມລົງມືກໍ່ສ້າງໃນຕົ້ນປີ 2020. ແນວໃດກໍຕາມ, ການລາຍງານຄັ້ງນີ້ບໍ່ມີການລະບຸເຖິງວັນ, ເວລາທີ່ຊັດເຈນໃນການປະມູນ ແຕ່ຄາດວ່າຈະໃນໄວໆນີ້ເພາະເຫຼືອເວລາບໍ່ພໍເທົ່າໃດເດືອນກໍຈະໝົດປີແລ້ວ.

ໂຄງການກໍ່ສ້າງປ້ອງກັນຕາຝັ່ງເຈື່ອນ ໄລຍະ 2 ມີມູນຄ່າ 67 ລ້ານໂດລາສະຫະລັດ ຈາກຈຳນວນ 300 ລ້ານໂດລາສະຫະລັດ ທີ່ ສປປ ລາວ ແລະ         ສ.ເກົາຫຼີ ໄດ້ຮ່ວມມືຍຸດທະສາດໄລຍະ 2016 – 2019 ໂດຍຈຳນວນເງິນທັງໝົດທາງລັດຖະບານ ສ.ເກົາຫຼີ ຈະສະໜອງຜ່ານກອງທຶນອົງກອນລັດສຳລັບກອງທຶນຮ່ວມມືເພື່ອພັດທະນາເສດຖະກິດ ( EDCF ).

ໂຄງການປ້ອງກັນຕາຝັ່ງເຈື່ອນແມ່ນ້ຳຂອງຢູ່ນະຄອນຫຼວງວຽງຈັນ ໄລຍະ 2 ເປັນໂຄງການສືບຕໍ່ຂອງໂຄງການໄລຍະທີ 1 ທີ່ ສ.ເກົາຫຼີ ໄດ້ໃຫ້ການສະໜັບສະໜູນທຶນໃນການຈັດຕັ້ງ ແຕ່ປີ 2008 ເປັນຕົ້ນມາ ແລະ ເຫັນໄດ້ຜົນສຳເລັດ ເຊິ່ງໂຄງການດັ່ງກ່າວສາມາດຊ່ວຍປ້ອງກັນນ້ຳຖ້ວມເຂດແຄມແມ່ນ້ຳຂອງ ແລະ ຍັງປະກອບສ່ວນໃນການພັດທະນາເສດຖະກິດ, ປັບປຸງຊີວິດການເປັນຢູ່ຂອງປະຊາຊົນຢູ່ນະຄອນຫຼວງວຽງຈັນໃຫ້ດີຂຶ້ນ ສາມາດດຶງດູດນັກທ່ອງທ່ຽວ ແລະ ນັກລົງທຶນໃຫ້ເພີ່ມຂຶ້ນ. ພ້ອມນັ້ນ, ສວນເຈົ້າອານຸວົງກໍກາຍເປັນສະຖານທີ່ພັກຜ່ອນ, ອອກກໍາລັງກາຍຂອງປະຊາຊົນ.

ຕາມການລາຍງານເບື້ອງຕົ້ນໂຄງການກໍ່ສ້າງປ້ອງກັນຕາຝັ່ງເຈື່ອນ ໄລຍະ 2 ມີຄວາມຍາວ 12 ກິໂລແມັດ ແຕ່ເຂດຫຼັກ 3 ເມືອງສີສັດຕະນາກ ໄປເຖິງຫາດດອກແກ້ວ ເມືອງຫາດຊາຍຟອງ ແລ້ວຍັງຈະກໍ່ສ້າງສວນສາທາລະນະເນື້ອທີ່ 4 ເຮັກຕາ ເພື່ອເປັນສະຖານທີ່ທ່ອງທ່ຽວ ພ້ອມທັງຈະກໍ່ສ້າງເສັ້ນທາງລຽບແຄມແມ່ນ້ຳຂອງຄວາມຍາວ 4,4 ກິໂລ ( ແຕ່ບ້ານຂຸນຕາທ່າໄປເຖິງເຂດເກົ້າລ້ຽວ ) ເພື່ອລະບາຍການສັນຈອນໃນເຂດດັ່ງກ່າວທີ່ນັບມື້ແອອັດ.

( ຂ່າວ: ສຸລິນ, ຮູບ: ສຸກສະຫວັນ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ