ໃນລະຫວ່າງວັນທີ 25-26 ກໍລະກົດ 2019 ຜ່ານມາ ສານປະຊາຊົນສູງສຸດ ໄດ້ຈັດພິທີສອບເສັງເປັນຜູ້ພິພາກສາຊັ້ນ 1 ຂອງສານປະຊາຊົນທົ່ວປະທດ ທີ່ສະຖາບັນຄົ້ນຄວ້າ ແລະ ຝືກອົມຮົມຂອງສານປະຊາຊົນສູງສຸດ ໂດຍການເປັນປະທານຂອງທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ, ຜູ້ພິພາກສາ ແລະ ຜູ້ຊ່ວຍຜູ້ພິພາກສາຈາກສານປະຊາຊົນທົ່ວປະເທດເຂົ້າຮ່ວມ ຈຳນວນທັງໝົດ 132 ທ່ານ, ຍິງ 49 ທ່ານ.
ການສອບເສັງເປັນຜູ້ພິພາກສາ ແມ່ນປະຕິບັດຕາມກົດໝາຍວ່າດ້ວຍສານປະຊາຊົນ ແລະ ກົດ ໝາຍວ່າດ້ວຍຜູ້ພິພາກສາສະບັບປີ 2017 ທີ່ກຳນົດກ່ຽວກັບມາດຕະຖານ ແລະ ເງື່ອນໄຂການເປັນຜູ້ພິພາກສາຊັ້ນ 1 ຕ້ອງໄດ້ຜ່ານການສອບເສັງ ເພື່ອເຮັດໃຫ້ຜູ້ທີ່ຈະເປັນຜູ້ພິພາກສາ ເປັນຜູ້ທີ່ມີຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ-ຈັນຍາທຳ ແລະ ມີຄວາມຮູ້ຄວາມສາມາດ ໃນການບໍລິການຮັບໃຊ້ປະຊາຊົນ ແລະ ຕັດສີນຄະດີໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທຳ.
ທ່ານ ບຸນຂວາງ ທະວີສັກ ໃຫ້ຮູ້ວ່າ: ຜູ້ເຂົ້າຮ່ວມສອບ ເສັງເປັນຜູ້ພິພາກສາ ແມ່ນພະນັກງານວິຊາການຂອງສານປະຊາຊົນ ທີ່ໄດ້ເຮັດວຽກວິຊາການກົດໝາຍຢ່າງໜ້ອຍ 3 ປີ ແລ້ວຜ່ານການຄັດເລືອກໃຫ້ມາຝຶກອົບຮົມຫຼັກສູດຜູ້ຊ່ວຍພິພາກສາ 45 ວັນ ຈຶ່ງໄດ້ຮັບການແຕ່ງຕັ້ງເປັນຜູ້ຊ່ວຍຜູ້ພິພາກສາ ຊ່ວຍຄົ້ນຄວ້າຄະດີ ຢູ່ສານປະຊາຊົນໃດໜຶ່ງ ເປັນເວລາຢ່າງໜ້ອຍ 3 ປີ ພ້ອມນັ້ນ, ຕ້ອງເປັນຜູ້ທີ່ມີຄວາມ ຫ້າວຫັນ ແລະ ໄດ້ຮັບການປະເມີນຕາມດຳລັດ 300 ແລະ ໄດ້ຮັບການພິຈາລະນາເຫັນດີຂອງຄະນະປະທານສານ ປະຊາຊົນ ທີ່ກ່ຽວຂ້ອງສົ່ງເຂົ້າ ຮ່ວມສອບເສັງເປັນຜູ້ພິພາກສາ ເຊິ່ງຖືວ່າຜູ້ກ່ຽວໄດ້ຜ່ານການ ປະຕິບັດວິຊາສະເພາະມາແລ້ວ ແລະ ເພື່ອເຮັດໃຫ້ການສອບເສັງຜູ້ພິພາກສາມີຄຸນນະພາບ.
ສານປະຊາຊົນສູງສຸດ (ສປສສ) ໄດ້ອອກຄໍາ ແນະນໍາສະບັບເລກທີ06/ ສປສສລົງວັນທີ 9 ຕຸລາ2018 ວ່າດ້ວຍການສອບເສັງເປັນຜູ້ພິພາກສາ ເປັນບອ່ນອີງໃນການສອບເສັງ ແລະ ໄດ້ແຕ່ງຕັ້ງຄະນະກຳມະການສອບເສັງ ເພື່ອເຮັດໜ້າທີ່ໃນການກະກຽມສອບເສັງ, ພິຈາລະນາເງື່ອນໄຂ ຜູ້ເຂົ້າສອບເສັງ, ຄົ້ນຄວ້າອອກຂໍ້ສອບເສັງ, ດໍາເນີນການສອບເສັງ ແລະ ອື່ນໆ.
ເພື່ອເຮັດໃຫ້ການສອບເສັງໄດ້ຕາມຄາດໝາຍ ການສອບເສັງໃນຄັ້ງນີ້ ປະກອບມີ 3 ຫົວບົດຄື: ຫົວບົດ ຈັນຍາບັນຂອງຜູ້ພິພາກສາ, ຫົວບົດກ່ຽວກັບການປະກອບ ການຄົ້ນຄວ້າສຳນວນຄະດີ ແລະ ການຕັດສິນຄະດີແພ່ງ ແລະ ຫົວບົດກ່ຽວກັບການປະກອບ, ການຄົ້ນຄວ້າສຳນວນຄະດີ ແລະ ການຕັດສິນຄະດີອາຍາ.
ພາຍຫຼັງສໍາເລັດການສອບເສັງ, ຜູ້ທີ່ຜ່ານການສອບເສັງ ຈະໄດ້ຜ່ານການປະເມີນຜົນງານແລ້ວ ນຳສະເໜີຄະນະປະຈຳສະພາ ປະຊາຊົນຂັ້ນແຂວງພິຈາລະນາ ຮັບຮອງແລະນຳສະ ເໜີສະພາ ຜູ້ພິພາກສາ ສປສສ ພິຈາລະນາຕົກລົງ ເພື່ອໃຫ້ປະທານ ສປສສ ສະເໜີຕໍ່ຄະນະປະຈຳສະພາ ແຫ່ງຊາດ ພິຈາລະນາແຕ່ງຕັ້ງ ເປັນຜູ້ພິພາກສາຕາມທີ່ໄດ້ ກຳນົດໄວ້ໃນມາດຕາ 53 ຂອງ ລັດຖະທຳມະນູນ.
ທີ່ມາ: ສານປະຊາຊົນສູງສຸດ
