ພາຍຫຼັງ ທີ່ພົບພະຍາດອະຫິວາໝູອາຟຣິກາລະບາດຄັ້ງທຳອິດຢູ່ ສປປ ລາວ ຢູ່ເມືອງຕຸ້ມລານ, ແຂວງ ສະລະວັນ ຫຼັງຈາກນັ້ນກໍ່ລະບາດໄປໃນຫຼາຍແຂວງເປັນຕົ້ນແຂວງສະຫວັນນະເຂດ, ນະຄອນຫຼວງວຽງຈັນ, ຫົວພັນ, ຜົ້ງສາລີ ແລະ ຫຼ້າສຸດ ຢູ່ບ້ານໂຮມສຸກ ເມືອງ ໄຊ ແຂວງ ອຸດົມໄຊ ພົບໝູຕາຍຍ້ອນຕິດເຊື້ອອະຫິວາແລ້ວ 400 ກວ່າໂຕ ພ້ອມທັງປະກາດພື້ນທີ່ດັ່ງກ່າວເປັນເຂດສີແດງ.
ພາບປະກອບຂ່າວ
ທ່ານ ສີວິໄສ ບຸນສະຫວັດ ວ່າການຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄຊ ໄດ້ໃຫ້ຮູ້ວ່າ: ໃນວັນທີ 16 ກໍລະກົດ ຜ່ານມາຂະແໜງລ້ຽງສັດ ແລະ ການປະມົງ ພະແນກກະສິກຳແລະປ່າໄມ້ແຂວງອຸດົມໄຊ ໄດ້ຮັບການລາຍງານຈາກຜູ້ປະກອບການລ້ຽງໝູ ຢູ່ບ້ານໂຮມສຸກ ເມືອງໄຊ ແຂວງອຸດົມໄຊ ວ່າມີໝູເຈັບ ແລະ ຕາຍເປັນຈຳນວນຫຼາຍ.
ພາບປະກອບຂ່າວ
ຈາກນັ້ນ, ຂະແໜງລ້ຽງສັດ ກໍໄດ້ແຕ່ງຕັ້ງພະນັກງານສົມທົບກັບວິຊາການລ້ຽງສັດຫ້ອງການກະສິກຳ ແລະ ປ່າໄມ້ເມືອງໄຊລົງກວດພື້ນທີ່ ແລະ ສອບຖາມຜູ້ລ້ຽງທີ່ມີໝູເຈັບ ແລະ ຕາຍຈຳນວນ 9 ຄອບຄົວ ທີ່ລ້ຽງຢູ່ຈຸດດຽວກັນ. ຈາກນັ້ນ, ມາໃນວັນທີ 17 ກໍລະກົດ ວິຊາການໄດ້ເກັບຕົວຢ່າງເລືອດຈຳນວນ 3 ຕົວຢ່າງ ສົ່ງຫ້ອງວິໄຈພະຍາດສັດ ກົມລ້ຽງສັດ ແລະ ການປະມົງ. ມາຮອດວັນທີ 19 ກໍລະກົດ ຜ່ານການກວດວິໄຈຕົວຢ່າງແມ່ນພົບເຊື້ອພະຍາດອະຫິວາໝູອາຟຣິກກາ ຢູ່ບ້ານບ້ານໂຮມສຸກ ເຊິ່ງຈຸດທີ່ພົບການລະບາດ ແມ່ນ ກຸ່ມລ້ຽງໝູທີ່ລ້ຽງຢູ່ຈຸດດຽວກັນ ມີໝູລ້ຽງທັງໝົດ 660 ໂຕມາຮອດວັນທີ 22 ກໍລະກົດ 2019 ມີໝູຕາຍແລ້ວ 451 ໂຕ.
ພາບປະກອບຂ່າວ
ຕໍ່ສະພາບການດັ່ງກ່າວ ປັດຈຸບັນວິຊາການຫ້ອງການກະສິກຳ ແລະ ປ່າໄມ້ເມືອງໄຊ ແລະ ພາກສ່ວນກ່ຽວຂ້ອງໄດ້ລົງພື້ນທີ່ສຳຫລວດເກັບກຳຂໍ້ມູນ ແລະ ເຝົ້າລະວັງການລະບາດຂອງ ພະຍາດອະຫິວາໝູອາຟຣິກກາຢ່າງໃກ້ຊິດ ໂດຍກຳນົດເອົາເຂດດັ່ງກ່າວ ເປັນເຂດແດງໃນການເຝົ້າລະວັງເຄັ່ງຄັດ ຫ້າມເດັດຂາດບໍ່ໃຫ້ມີການເຄື່ອນຍ້າຍ.
ສຳລັບຈຸດທີ່ກວດພົບເຊື້ອແມ່ນຕ້ອງທຳລາຍໝົດ ແລະ ກໍານົດເອົາເຂດລັດສະໝີ 5 ກິໂລແມັດມົນທົນ ຈາກຈຸດກວດພົບເຊື້ອເປັນເຂດເຫຼືອງ ໂດຍບໍ່ອານຸຍາດໃຫ້ມີການເຄື່ອນຍ້າຍ ແລະ ຂ້າໝູທຸກປະເພດ, ຈາກເຂດເຫຼືອງ ອອກໄປແມ່ນກຳນົດເປັນເຂດຂຽວ, ຫ້າມມີການນຳເຂົ້າ ແລະ ສົ່ງອອກໝູທຸກຊະນິດ. ພ້ອມທັງແຈ້ງມາຍັງປະຊາຊົນພາຍໃນເມືອງ ໄຊ ຫ້າມມີການຈໍາໜ່າຍຊີ້ນໝູ ແລະ ບໍ່ຄວນບໍລິໂພກຊີ້ນໝູໃນຊ່ວງໄລຍະນີ້ ຈົນກວ່າສະພາບກັບຄືນສູ່ປົກກະຕິ ເພື່ອສະກັດກັ້ນການລະບາດຂອງພະຍາດດັ່ງກ່າວບໍ່ໃຫ້ແຜ່ລາມໄປສູ່ວົງກວ້າງ.
ພາບປະກອບຂ່າວ