ກະຊວງອຸດສາຫະກຳ ແລະ ການຄ້າ ຈະສຸ່ມໃສ່ 5 ມາດຕະການ ປະຕິບັດວຽກງານຈັດຕັ້ງ ກໍ່ສ້າງພັກ - ພະນັກງານ ໃຫ້ມີປະສິດທິພາບ - Laoedaily

ກະຊວງອຸດສາຫະກຳ ແລະ ການຄ້າ ຈະສຸ່ມໃສ່ 5 ມາດຕະການ ປະຕິບັດວຽກງານຈັດຕັ້ງ ກໍ່ສ້າງພັກ – ພະນັກງານ ໃຫ້ມີປະສິດທິພາບ

ກະຊວງອຸດສາຫະກຳ ແລະ ການຄ້າເນັ້ນ 5 ມາດຕະການ ໃນການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ – ພະນັກງານ ແລະ ວຽກງານກົງຈັກການຈັດຕັ້ງ.

ໃນວັນທີ 19 ກໍລະກົດ 2019 ກະຊວງອຸດສາຫະກໍາ ແລະ ການຄ້າ ( ອຄ ) ໄດ້ຈັດກອງປະຊຸມວຽກງານຈັດຕັ້ງ, ກໍ່ສ້າງພັກ – ພະນັກງານ ປະຈໍາປີ 2018 ແລະ ທິດທາງແຜນການປີ 2019 ຂອງຂະແໜງອຸດສາຫະກໍາ ແລະ ການຄ້າ ຂຶ້ນທີ່ກະຊວງ ອຄ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະພັກ ລັດຖະມົນຕີກະຊວງ ອຄ, ມີທ່ານຮອງລັດຖະມົນຕີ, ຫົວໜ້າກົມ – ຮອງຫົວໜ້າກົມ, ຫົວໜ້າພະແນກ, ຕາງໜ້າກະຊວງພາຍໃນ, ຕາງໜ້າຫ້ອງການອຸດສາຫະກຳ ແລະ ການຄ້າແຂວງ, ນະຄອນຫຼວງ, ພະນັກງານພາຍໃນກະຊວງ ອຄ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ນາງ ຈັນສຸກ ແສງພະຈັນ ກຳມະການພັກກະຊວງ, ຫົວໜ້າກົມຈັດຕັ້ງ – ພະນັກງານ ກະຊວງ ອຄ ໄດ້ຜ່ານບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານການຈັດຕັ້ງ, ກໍ່ສ້າງພັກ – ພະນັກງານ ປະຈຳປີ 2018 ແລະ ທິດທາງແຜນການປີ 2019 ຂອງຂະແໜງ ອຄ ວ່າ: ວຽກງານກໍ່ສ້າງພັກໃນໜຶ່ງປີຜ່ານມາ ໄດ້ມີການຈັດຕັ້ງກອງປະຊຸມເລົ່າມູນເຊື້ອວັນທີ່ສຳຄັນຕ່າງໆຂອງພັກ – ຂອງຊາດ ແລະ ສາກົນ, ເຜີຍແຜ່ເອກະສານ; ຈັດຕັ້ງກອງປະຊຸມເລົ່າມູນເຊື້ອ, ເຊື່ອມຊຶມແນວທາງນະໂຍບາຍຂອງພັກ, ມະຕິຕ່າງໆຂອງສູນກາງພັກ ແລະ ລະບຽບກົດໝາຍຂອງລັດ, ຂຶ້ນແຜນກຳນົດພະນັກງານນຳພາ – ຄຸ້ມຄອງ.

ປັບປຸງກົງຈັກການຈັດຕັ້ງຢູ່ຂັ້ນກະຊວງ ຍັງຮັກສາໂຄງປະກອບກົງຈັກການຈັດຕັ້ງຄືເກົ່າ ປະຕິບັດຕາມຄຳສັ່ງເລກທີ 03/ນຍ ລົງວັນທີ 09 ກຸມພາ 2018 ວ່າດ້ວຍການປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່, ໄດ້ສໍາເລັດການປັບປຸງສັບຊ້ອນ, ແຕ່ງຕັ້ງ, ສັບປ່ຽນບ່ອນປະຈໍາການ ເຊັ່ນ: ແຕ່ງຕັ້ງຂັ້ນຫົວໜ້າກົມ 3 ທ່ານ, ແຕ່ງຕັ້ງວ່າການແທນຫົວໜ້າກົມ ຫຼື ທຽບເທົ່າ 2 ທ່ານ, ແຕ່ງຕັ້ງຂັ້ນຮອງຫົວໜ້າກົມ 2 ທ່ານ, ແຕ່ງຕັ້ງຫົວໜ້າພະແນກ 7 ທ່ານ ແລະ ແຕ່ງຕັ້ງຮອງຫົວໜ້າພະແນກ 13 ທ່ານ. ນອກຈາກນີ້, ກໍເຫັນວ່າມີຫຼາຍໜ້າວຽກທີ່ເຮັດໄດ້ດີ. ແຕ່ຢ່າງໃດກໍຕາມ, ຄຽງຄູ່ກັບດ້ານດີທີ່ກ່າວມາຂ້າງເທິງນັ້ນ ກໍຍັງມີຈຸດອ່ອນທີ່ຈະຕ້ອງປັບປຸງ, ແກ້ໄຂ ແລະ ທາງຂະແໜງ ອຄ ໄດ້ເນັ້ນ 5 ມາດຕະການ ໃນການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ – ພະນັກງານ ແລະ ວຽກງານກົງຈັກການຈັດຕັ້ງປີ 2019 ນີ້ຄື:

1. ຄະນະພັກ, ຄະນະນໍາແຕ່ລະຂັ້ນຕ້ອງເຊີດຊູຄວາມຮັບຜິດຊອບ ເປັນເຈົ້າການເຊື່ອມຊຶມກໍາແໜ້ນທິດທາງໜ້າວຽກງານຈັດຕັ້ງກໍ່ສ້າງພັກ – ພະນັກງານ ເພື່ອຊີ້ນຳໆພາການຈັດຕັ້ງປະຕິບັດໃຫ້ເກີດຜົນຕົວຈິງ.2. ເປັນເຈົ້າການຄົ້ນຄວ້າເນື້ອໃນກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ເປັນແຜນການລະອຽດ ເພື່ອຈັດຕັ້ງປະຕິບັດຕາມພາລະບົດບາດ, ໜ້າທີ່ ຂອບເຂດ ຄວາມຮັບຜິດຊອບຂອງຕົນ ແລະ ຈັດຕັ້ງປະຕິບັດໃຫ້ປາກົດຜົນເປັນຈິງ, ມີຜົນສຳເລັດຕາມລະດັບຄາດໝາຍ.3. ຜູ້ເຮັດວຽກຈັດຕັ້ງແຕ່ລະຂັ້ນຕ້ອງເພີ່ມທະວີຄວາມຮັບຜິດຊອບເປັນເຈົ້າການໃນການເປັນເສນາທິການໃຫ້ຄະນະພັກຂອງຕົນໃນການຄົ້ນຄວ້າຫັນເປັນແຜນການ ແຜນງານໂຄງການລະອຽດ ເພື່ອຈັດຕັ້ງປະຕິບັດເປັນຂະບວນໃນວຽກງານຕົວຈິງ.
4. ຕ້ອງໄດ້ສຸມງົບປະມານ, ວັດຖຸອຸປະກອບຮັບໃຊ້ທີ່ຈໍາເປັນເຂົ້າໃນການເຄື່ອນໄຫວຈັດຕັ້ງປະຕິບັດວຽກງານດັ່ງກ່າວສົມເຫດສົມຜົນ ເພື່ອໃຫ້ວຽກງານນີ້ດຳເນີນຕາມແຜນການໃຫ້ສຳເລັດຜົນ.5. ຄະນະພັກ, ຄະນະນໍາແຕ່ລະຂັ້ນຕ້ອງມີການຊຸກຍູ້ກວດກາການຈັດຕັ້ງປະຕິບັດ ແລະ ຊີ້ນໍາການສະຫຼຸບຖອດຖອນບົດຮຽນລາຍງານເປັນແຕ່ລະໄລຍະຢ່າງເປັນປົກກະຕິ.

ໃນໂອກາດດຽວກັນນີ້, ທ່ານ ນາງ ເຂັມມະນີ ພົນເສນາ ໄດ້ມີຄຳເຫັນຊີ້ນຳ ໂດຍສະເພາະວຽກງານຈັດຕັ້ງພະນັກງານ ບໍ່ໃຫ້ຮັບພະນັກງານອາສາສະໝັກໃໝ່ ແລະ ຖ້າກົມໃດ ຫຼື ຂະແໜງໃດຍັງມີກໍໃຫ້ເກັບກຳລາຍງານ ເພາະຕາມຄຳສັ່ງເລກທີ 03/ນຍ ລົງວັນທີ 09 ກຸມພາ 2018 ວ່າດ້ວຍການປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່ ນັ້ນມີຈຳກັດ. ພ້ອມນັ້ນ, ທ່ານໄດ້ເນັ້ນສະມາຊິກພັກ – ພະນັກງານຮຽນຮູ້, ເຊື່ອມຊຶມບົດໂອ້ລົມຂອງ ທ່ານ ຈັນສີ ໂພສີຄຳ ກຳມະການກົມການເມືອງ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ຕໍ່ກອງປະຊຸມວຽກງານຈັດຕັ້ງ, ກໍ່ສ້າງພັກ – ພະນັກງານທົ່ວປະເທດ ປະຈຳປີ 2018 ໃຫ້ຮັບຮູ້ແນວທາງນະໂຍບາຍຂອງພັກ, ມະຕິຕ່າງໆຂອງສູນກາງພັກ ແລະ ລະບຽບກົດໝາຍຂອງລັດ ໃນການນຳໄປຈັດຕັ້ງປະຕິບັດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ