ຮ່ວມກັນສະກັດກັ້ນເຕັມທີ່ ການລັກລອບຄ້າຂາຍຢາເສບຕິດລະຫວ່າງປະເທດ - Laoedaily

ຮ່ວມກັນສະກັດກັ້ນເຕັມທີ່ ການລັກລອບຄ້າຂາຍຢາເສບຕິດລະຫວ່າງປະເທດ

ໃນວັນທີ 12 ກໍລະກົດ 2019 ຜ່ານມາ ບັນດານັກການທູດ ແລະ ອົງການຈັດຕັ້ງສາກົນຢູ່ ສປປ ລາວ ໄດ້ລົງໄປຢ້ຽມຢາມການປະຕິບັດວຽກງານຂອງ ເຈົ້າໜ້າທີ່ລາວຢູ່ທີ່ດ່ານສາກົນຂົວມິດຕະພາບ ລາວ-ໄທ ແຫ່ງທີ 1 ເພື່ອເປັນການຊຸກຍູ້ໃນການປະຕິບັດໜ້າທີ່ຢ່າງເຂັ້ມງວດຕໍ່ບັນຫາ ລັກລອບຄ້າຂາຍຢາເສບຕິດລະຫວ່າງປະເທດ.

ອີງຕາມການລາຍງານຂອງ ສະຖານທູດອົດສະຕຣາລີ ໃຫ້ຮູ້ວ່າ: ການມາຢ້ຽມຢາມເບິ່ງການເຮັດວຽກທີ່ສໍາຄັນຂອງເຈົ້າໜ້າທີ່ພາສີ ແລະ ເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງໃນຄັ້ງນີ້ ແມ່ນເປັນການເຕືອນທີ່ສໍາຄັນຕໍ່ກັບຄວາມພະຍາຍາມຂອງໝົດທຸກຝ່າຍທີ່ມີສ່ວນຮ່ວມໃນການສະກັດກັ້ນ ແລະ ຕ້ານການລັກລອບຄ້າຂາຍຢາເສບຕິດລະດັບຊາດ.

 

ທ່ານ Jean-Bernard Carrasco, ເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ ໄດ້ກ່າວວ່າ: ໃນຂະນະທີ່ພວກເຮົາສະເຫຼີມສະຫຼອງຄົບຮອບ 25 ປີ ຂອງຂົວມິດຕະພາບແຫ່ງ ທໍາອິດ ເຊິ່ງປຽບດັ່ງຂອງຂວັນ ທີ່ປະເທດອົດສະຕຣາລີມອບໃຫ້ ປະຊາຊົນລາວ ແລະ ປະຊາຊົນໄທ. ຂົວແຫ່ງນີ້ ແມ່ນໂຄງສ້າງພື້ນຖານທີ່ສຳຄັນ ໃນການເຊື່ອມຕໍ່ປະຊາຊົນ ແລະ ເສດຖະກິດຂອງລາວ ແລະ ໄທ ລວມໄປເຖິງພາກພື້ນ, ເພື່ອຊ່ວຍໃຫ້ປະເທດລາວ ທີ່ບໍ່ມີຊາຍແດນ ຕິດກັບທະເລ ໄດ້ບັນລຸເປົ້າໝາຍຂອງຕົນ ທີ່ຈະເປັນດິນແດນເຊື່ອມໂຍງໃນອະນາຄົດ.

ທ່ານກ່າວຕື່ມອີກວ່າ: ຖ້າຫາກມີການເຊື່ອມໂຍງເພີ່ມຂຶ້ນ ກໍ່ນໍາມາພ້ອມສິ່ງທ້າທາຍ ເຊັ່ນ ບັນຫາການຄ້າຂາຍຢາເສບຕິດ. ສະນັ້ນ, ການຢ້ຽມຢາມຂອງບັນດາທູດຕານຸທູດ ແລະ ອົງການຈັດຕັ້ງສາກົນເຊັ່ນ: ສະມາຊິກຂອງ ກອງປະຊຸມວຽກງານຄວບຄຸມຢາເສບຕິດທີ່ຜິດກົດຫມາຍ ຫຼື IDSWG, ຫ້ອງການສະຫະປະຊາຊາດວ່າດ້ວຍຢາເສບຕິດແລະອາຊະຍາກໍາ ຫຼື UNODC, ຫ້ອງການກວດກາ ແລະ ຄວບຄຸມຢາ ເສບຕິດ (LCDC) ແລະ ບັນດາພາກສວ່ນທີ່ກ່ຽວຂ້ອງໄດ້ຮູ້ ແລະ ເຂົ້າໃຈເຖິງບົດບາດຂອງເຈົ້າໜ້າທີ່ພາສີລາວ ແລະ ຕໍາຫຼວດກວດຄົນເຂົ້າ-ອອກເມືອງ ຂອງລາວ ໃນການຕໍ່ຕ້ານການລັກລອບຄ້າຂາຍຢາເສບຕິດ.

 

 

ນອກຈາກນັ້ນ, ຜູ້ເຂົ້າຮ່ວມໄດ້ເຫັນການ ເຮັດວຽກຂອງໜ່ວຍງານຄວບຄຸມຫີບສິນຄ້າ ແລະ ການຄວບຄຸມການເຄື່ອນຍ້າຍຂອງສິນຄ້າ ເຊິ່ງໂຄງການຄວບຄຸມຫີບສິນຄ້າລະດັບໂລກນີ້ ແມ່ນເປັນການຮ່ວມມືກັນຂອງ ອົງການ UNODC ແລະ ອົງການພາສີໂລກສ້າງຂຶ້ນ, ໜຶ່ງໃນເປົ້າໝາຍການສ້າງຕັ້ງ ເພື່ອຢຸດຕິການລັກລອບຄ້າຂາຍ-ສົ່ງຜ່ານສິ່ງທີ່ຜິດກົດໝາຍ ໂດຍສະເພາະແມ່ນຢາເສບຕິດ.

ອີງຕາມຂໍ້ມູນຫຼ້າສຸດຂອງ ອົງການ UNODC ປີ 2015 ໃຫ້ເຫັນວ່າ: ລາວມີເນື້ອທີ່ທັງໝົດໃນການປູກຝິ່ນປະມານ 5.900 ເຮັກຕາ. ການນໍາໃຊ້ຢາເສບຕິດຍັງມີການເພີ່ມຂຶ້ນ, ສ່ວນໃຫຍ່ແມ່ນຢາປະເພດ opiate, amphetamine, ປະເພດຂອງສານເສບຕິດ ແລະ ສານຕັ້ງຕົ້ນ.

 

 

ຕໍ່ບັນຫາ ແລະ ສິ່ງທ້າທາຍ ດັ່ງກ່າວໄດ້ສ້າງແຜນແມ່ບົດເພື່ອຄວບຄຸມຢາເສບຕິດຢູ່ ສປປ ລາວໃນໄລຍະປີ 2016 ຫາປີ 2020 ເຊິ່ງໄດ້ກໍານົດບາງຂົງເຂດບູລິມະສິດລວມທັງການສ້າງ ແລະ ປັບປຸງເຄື່ອງມືທາງກົດໝາຍທີ່ກ່ຽວຂ້ອງກັບບັນຫາຢາເສບຕິດ ເຊັ່ນ: ການເກັບກໍາຂໍ້ມູນ ແລະ ການວິເຄາະ, ການສຶກສາ, ການຝຶກອົບຮົມ, ການເຜີຍແຜ່ກົດໝາຍ ແລະ ຜົນສະທ້ອນທາງລົບຈາກການໃຊ້ຢາເສບຕິດ, ການປິ່ນປົວ ແລະ ການຝຶກອົບຮົມດ້ານວິຊາຊີບ ສໍາລັບຜູ້ຕິດຢາເສບຕິດ, ການພັດທະນາທາງເລືອກ, ການປ່ຽນແທນການປູກຝິ່ນ, ການບັງຄັບໃຊ້ກົດໝາຍ, ການຄວບຄຸມສານຕັ້ງຕົ້ນ, ການວິເຄາະ ແລະ ການທົດສອບການນໍາໃຊ້ຢາເສບຕິດ, ການຮ່ວມມືລະຫວ່າງປະເທດ ແລະ ປັບປຸງກົງຈັກອົງ ການຈັດຕັ້ງຂອງຄະນະກໍາມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ ຢູ່ຂັ້ນສູນກາງ ແລະ ຂັ້ນທ້ອງຖິ່ນ.

 

 

ຂໍ້ມູນ: ໜັງສືພິມວຽງຈັນທາຍ Lao Press in Foreign Languages

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ